Syrqattaný deńgeıi tómendep keledi

«Pandemııa bastalǵannan beri álemde koronavırýs ınfeksııasynyń 220 mln-nan asa jaǵdaıy tirkeldi, ókinishke qaraı 4,5 mln-nan asa adam qaıtys boldy. Qazaqstanda 8 qyrkúıekte koronavırýstyń oń nátıjesimen 824 myńnan asa jáne koronavırýstyń teris nátıjesimen 71 myńnan asa jaǵdaı tirkeldi. KVI-men aýyratyn naýqastardyń shamamen 88 paıyzy saýyǵyp shyqty», dedi Densaýlyq saqtaý birinshi vıse-mınıstri Marat Shoranov.

Onyń aıtýynsha, epıdemııalyq jaǵdaı matrısasyna sáıkes, Qazaq­stannyń 12 óńiri «qyzyl aımaq­ta» ornalasqan. Sońǵy aptada «sary aımaqqa» 4 oblys aýys­ty. Bul – Shyǵys Qazaqstan, Jam­byl, Sol­tús­tik Qazaqstan jáne Qyzyl­or­da oblystary. «Jasyl aımaqta» Túrkis­­tan oblysy tur. Soń­ǵy eki aptada epıdemııalyq jaǵdaı­dyń birtindep turaqtanýy baıqa­la­dy. Tamyz aıy­men salystyr­ǵanda syrqattaný deń­geıi 1,4 ese tómendedi.

Mınıstrlik málimeti boıynsha birinshi komponentpen 6 928 646 adam, ekinshi komponentpen 5 755 817 adam vaksına saldyrdy. Sondaı-aq M.Shoranov elimizde 15 qyrkúıek kúni tumaýǵa qarsy vaksınalaý bas­talatynyn aıtty.

«Jaqyndap qalǵan JRVI, ıaǵnı tumaý maýsymyna aıryqsha toqtalyp ótkim keledi. Bıyl bıýdjet qara­jaty esebinen Reseıde shyǵarylǵan «Grıppol+» vaksınasynyń 2,5 mln dozasy satyp alyndy. Vaksına quramynda aldaǵy maýsymǵa qarsy shtamm bar. Bul respýblıkanyń jalpy turǵyndarynyń 13 paıyzyn qamtýǵa múmkindik beredi», dedi ol.

Osyǵan oraı elimizdiń Bas mem­lekettik sanıtar dárigeriniń qaý­lysy qabyldanǵan.

«Memlekettik bıýdjet qarajaty esebinen halyqtyń eń álsiz toby vaksınalanatynyn atap ótkim keledi. Olar – medısına qyzmetkerleri, medısınalyq uıymdarda dıspanser­lik esepte turǵan balalar, jetim bala­lar jáne ata-anasynyń qam­qor­ly­ǵynsyz qalǵan balalar jáne basqalar. Buǵan qosa jumys berý­shi­lerdiń jáne halyqtyń jeke qara­jaty esebinen de vaksınalaý júr­giziledi», dedi M.Shoranov.

Onyń aıtýynsha, reseılik vaksınadan bólek Qazaqstan aýmaǵynda taǵy 3 óndirýshiniń 4 vaksınasy tirkelgen. Atap aıtqanda, Sanofı-Paster (Fransııa) óndirgen «Vak­sıgrıp Tetra», Inflıývak (Nı­der­land) men Sınovak Bıotek (Qytaı) kompanııalary óndirgen vaksınalardy da alýǵa bolady.

Densaýlyq saqtaý birinshi vıse-mınıstri koronavırýspen birneshe ret aýyrǵandardyń sanyn atady.

«Koronavırýspen qaıtalap aýyr­ǵandardyń sany 23 myń adamdaı bolady. Byltyrǵy naýryzdan bastap qaıtalap aýryp, emdelgenderdiń sany – osynsha. Sonyń ishinde 3 200 adam – stasıonarlyq em alǵandar. Qalǵan 20 myń adam jeńil formada aýryp, emhana deńgeıinde em alǵan», dedi M.Shoranov.

Sanıtarlyq-epıdemıologııalyq baqylaý komıteti tóraǵasynyń oryn­basary Záýre Ahmetova Qazaq­stan­da koronavırýsqa qarsy qol­da­ny­latyn vaksınalardyń tıim­di­li­gi týraly statıstıkany aıtty. Onyń aıtýynsha, vaksınanyń b­irin­­shi komponentin alǵannan keıin aýyrǵandardyń úlesi 0,1 paıyz bolsa, ekinshi komponentin alǵan­nan ke­ıin aýyrǵandardyń úlesi – 0,2 paıyz.

«Koronavırýspen aýyrǵan­dar­dyń statıstıkasyn qarasaq, 99,9 paıyzy – vaksına almaǵandar. Tek 0,1 paıyzy ǵana vaksına alǵannan keıin aýyrǵan. Onyń sany – 20 211 adam. Vaksınalardyń túrine qaraı jiktesek, birinshi komponent alyp aýyrǵandardyń sany – 7 070 adam. Onyń ishinde Spýtnık V alǵan 6 108 adam (0,1 paıyz). Bul vaksınany 5 669 855 adam alǵan. QazVac vasınasyn 172 707 adam alǵan. Onyń ishinde 172 adam aýyrǵan (0,1 paıyz). Hayat-Vax alǵandar sany – 529 349 adam. Onyń ishinde 553 adam aýyrǵan (0,1 paıyz). CoronaVac ekpesin alǵandar arasynda 218 adam aýrý juqtyrǵan (0,1 paıyz). Jalpy, bul vaksınany alǵandar sany – 249 373 adam», dedi Z.Ahmetova.

Al ekinshi komponent alǵannan keıin 13 141 adam aýyrǵan eken. Bul – 0,2 paıyz. Onyń ishinde Spýtnık V alǵan 4 912 195 adamnyń 11 101-i aýyrǵan (0,2 paıyz). QazVac vasınasynyń ekinshi komponentin alǵan 113 730 adamnyń 231-i aýyrǵan (0,2 paıyz). Hayat-Vax alǵandar sany – 472 463 adam. Onyń ishinde 1 448 adam aýyrǵan (0,1 paıyz). CoronaVac ekpesin alǵandardyń 341-i aýrý juqtyrǵan (0,15 paıyz).

Sonymen qatar brıfıng barysynda jalǵan vaksına pasportyn satyp alǵandarǵa qaıta ekpe alý múmkindigi týraly sóz boldy.

«Densaýlyq saqtaý mınıstrligi birinshi kezekte halyqty ımmýndaýdy sapaly júrgizýge múddeli. Sondyqtan ondaı olqylyqtardyń jolyn barynsha qatań túrde kesý kerek. О́zderińiz bilesizder, Ishki ister mınıstrligimen birlesken jumys júrip jatyr. О́ńirlerdiń bárinde derlik jalǵan vaksına pasportyn jasaǵan medısına qyzmetkerleriniń ústinen qylmystyq is qozǵaldy. Vaksına pasportyn zańsyz jolmen satyp alý áreketterimen áli de kúrese beremiz. Ázirge jalǵan vaksına pasporty bar azamattardan qaıta ekpe alý týraly ótinish túspedi. Bir kezde zańsyz tásilge júgingen, endi naǵyz vaksına alǵysy keletinderden óti­nimder kelgen joq. Júgingen jaǵ­daıda ondaı azamattarmen ju­mys isteýge daıynbyz. Biraq bul jerde birqatar normatıvtik-zańna­malyq máselelerdi atqarý kerek. Iаǵnı tıisti quzyrly organdardyń tıisti maquldaýy kerek. Biryńǵaı sheshim shyqqan kezde ol týraly málimdeımiz», dedi M.Shoranov.

Sondaı-aq mamandar elimizdegi 18 jasqa tolmaǵan balalarǵa vaksına tek ata-anasynyń ruqsatymen ǵana jasalatynyn jetkizdi.

«Eń birinshi ata-anasy qajetti má­li­met alady jáne qolhat berý ar­qy­­ly jasalady. Osyǵan baılanys­ty mektep aıasynda qandaı da bolsyn ekpe jasalatyn bolsa, ata-ana­­lar jı­nalysy ótedi. Búgin­gi tań­­da ba­la­lar arasynda ekpe salý júr­­­gi­zi­lip jatqan joq. Osy­ǵan baı­­la­­nys­ty biz ata-analar­dy jal­ǵan aq­pa­rattarǵa senbeýge shaqy­ra­­myz», dedi Qoǵamdyq densaýlyq saq­­taý ulttyq ortalyǵy basqarma tór­aǵa­synyń orynbasary Aınagúl Qýatbaeva.