Qoǵam • 21 Qazan, 2021

Qazaqstanda kómir qory kólemi 34 mlrd tonnaǵa jýyq – IIDM

Búgingi tańda elimizdiń kómir salasy elektr energııasynyń shamamen 70%-yn óndirip, koks-hımııa óndirisiniń tolyq júktemesin qamtamasyz etedi. Kommýnaldyq-turmystyq sektor men el halqynyń otynǵa qajettiligin tolyq qanaǵattandyrady. Salada 30 myńǵa jýyq adam jumys isteıdi, dep habarlaıdy Egemen.kz.

Gaýhar QAPASh

Kómir qory boıynsha Qazaqstan kóshbasshy elderdiń ondyǵyna kiredi. Qor kólemi 33,9 mlrd tonnany quraıdy. Barlanǵan kómir qorynyń 90%-dan astamy Qazaqstannyń soltústik-shyǵysynda jáne ortalyq bóliginde shoǵyrlanǵan. Táýelsizdik jyldary óndirýshi kásiporyndar 2,7 mlrd tonnadan astam kómir óndirdi. Shamamen 0,8 mlrd tonna jaqyn jáne alys shetelge eksporttaldy.

QR Indýstrııa jáne ınfraqurylymdyq damý vıse-mınıstri Rýslan Baımıshev óz sózinde vedomstvo úshin ishki naryqty, onyń ishinde halyq pen kommýnaldyq-turmystyq sektordy kómirmen qamtamasyz etý mańyzdy ekenin atap ótti.

«2021 jyldyń 9 aıynyń qorytyndysy boıynsha elimizdiń kómir óndirýshi kompanııalary 79,1 mln tonna kómir óndirdi. Bul ótken jyldyń sáıkes kezeńimen salystyrǵanda 1,4%-ǵa kóp. Búgingi tańda kommýnaldyq-turmystyq sektor boıynsha kómir qorymen qamtamasyz etý 96%, turǵyndardy qamtý 84,4%-dy quraıdy. Iаǵnı jaǵdaı turaqtandy. Barlyq ótkizý pýnktterinde jetkilikti mólsherde kómir bar», dep atap ótti vıse-mınıstr.

Sonymen qatar, vıse-mınıstr kómir salasynda iske asyrylyp jatqan jobalar týraly aıtyp berdi. Iri jobalardyń biri – «Bogatyr» kesiginde kómir óndirýdiń sıkldyq-aǵyndyq tehnologııasy». Ol kásiporynnyń óndiristik qýatyn jylyna 42 mln tonnadan 48 mln tonnaǵa deıin ulǵaıtýǵa múmkindik beredi. О́ndiristi odan ári ártaraptandyrý maqsatynda «Shubarkól kómir» AQ-da arnaıy koks, kómir shaıyry men maı óndiretin jańa zaýyt salý jobasy iske asyrylýda. Sondaı-aq «ArselorMıttal Temirtaý» AQ kómir qabattarynan metannan elektr-jylý energııasyn óndirý jobasyn iske asyrýdy josparlap otyr.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz