Biz bul Táýelsizdikti aıtar tusta muqabasyn myńjyldyqtardyń shańy kómgen altyn tamyrly tarıhty alǵa tartatynymyz belgili. Álbette sol shejireli baıannyń keıingi otyz jylyn mejeli mindetterimizdi aıqyndap, jarqyn jetistikterimizdi júıeli zerdelep bergen tegeýrindi tulǵa, Elbasy Nursultan Nazarbaevpen baılanystyratynymyz anyq. Shırek ǵasyrdan astam shejireli jolda kemeńger kóshbasshy kósheli memleket qura bildi. Eldi basqarýda tolaǵaı tabysqa jetýde tek maqsatty qadamdar jasady.
Táýelsizdik – keshegini ulyqtaý men keleshekti umytpaýdan turady. Búgingi Qazaqstannyń esimi – egemen, besigi – beıbit táýelsiz memleket der edik.
Biz – sonaý Uly dalanyń Turandaı asqaq qasıetti tórinde tý kótergen kóshpeli kók túrik babalarymyzdyń tekti urpaǵymyz.
Ata-babamyzdan amanatqa qalǵan asyl qundylyǵymyz azattyqty búginde kúımeli kerýenge teńesek, baısaldy kóshtiń sanatker kóshbasshysy – ol Elbasy Nursultan Nazarbaev!
Bul kúnde Qazaqstan jer-jahanǵa jaqsy atymen tanylyp, jasampaz isterimen jurtqa úlgi bolyp otyr. Alty qurlyq Alash tórine jınalyp jalpyadamzattyq taqyryptardy jappaı talqylaıtyn dárejege jettik. Elbasynyń sarabdal saıasatynyń arqasynda saıası qadamdarymyz satylap ósip, ekonomıkalyq ekpinimiz erekshe artty. Rýhanı baı muralarymyz zerdeli urpaqtyń zeıinin ashyp, jadymyzda kóne tarıhtyń kómbesi jańǵyrdy.
Munyń barlyǵyna Elbasydaı teńdessiz tulǵanyń tegeýrindi isteri temirqazyq bolyp kelgenin ár kez aıtyp otyrýymyz kerek. Ultty uıystyrýda, jurtty jumyldyrýda Tuńǵysh Prezıdenttiń eseli eńbegi árqashan el esinde. Baǵdarly bolashaqqa bet alǵan memlekettiń bási bıik, basy azat bolýǵa tıis. Alashtyń asqaq aqyny Sultanmahmut Toraıǵyrulynyń:
«Alash týy astynda, Kún sóngenshe sónbeımiz!» degen aıbyndy sózi ár qazaqtyń aıbaryn asyratyn rýhty sóz. Alash muraty – azattyqtyń tuǵyryn bıik, shyǵyryn berik etý. Biz sol jolda bir jaǵadan bas, bir jeńnen qol shyǵara bilýimiz mańyzdy. Búginde Elbasy qurǵan memlekettik ınstıtýttar turaqty damyp kele jatqanyn jaqsy bilemiz. Elbasy baǵyty – erteńgi Qazaqstannyń baǵdary. Ilkimdi istermen ilgeri qadam jasaý – el halqyn izgilik pen irilikke tárbıeleıdi.
El egemendiginiń eleýli jyldarynda Elbasy Nursultan Nazarbaevtyń bastamasymen júzege asqan josparly qadamdarymyz ushan-teńiz. Kemel kóshbasshynyń kóregen saıasaty ózi qabyldaǵan túrli baǵdarlamada anyq kórindi. Ana tilimizdiń aıasy keńip, ata tarıhymyzdyń arnasy ulǵaıdy. Bir sózben aıtqanda, baıyrǵy tarıh búginnen bolashaqqa bet túzedi. Elbasy belgilep bergen mejeli mindetterdi minsiz atqarýymyz mańyzdy.
Elbasynyń dara bolmysy dana sheshim shyǵarýda qatelesken joq. Elbasy joly – egemen elimizdiń ekinshi tynysyn ashqan altyn dańǵyl.
