Memlekettik baqylaý júıesindegi ózgeris

Jaýapty vedomstvonyń basshysy úkimettik emes uıymdardyń ókilderimen onlaın formatta pikir almasyp, tehnıkalyq retteý jáne metrologııa, sondaı-aq tutynýshylardyń quqyqtaryn qorǵaý salasyndaǵy áriptestiktiń qorytyndylary jáne ony damytýdyń perspektıvalaryn talqylady.

Mınıstrdiń aıtýynsha, otandyq naryqty qaýipsizdigi kúmán týdyratyn ónimderden saqtaý úshin tehnıkalyq retteý quraldary qaıta qarastyryldy. Memlekettik baqylaý júıesin reformalaý otandyq, sondaı-aq ákelinetin ónimderdiń tolyq baqylaý sıklin kózdeıtin aqparattyq júıeni ázirleýden bastalypty.

Aıtalyq, kez kelgen ónimge baılanysty olqylyq anyqtalǵan jaǵdaıda qaýipsizdikti tekserý úshin ónim úlgilerine synama júrgizý normasy engizildi. Sol sekildi qaýipti ónimdi tárkileý nemese joıý syndy jedel qadaǵalaý tetikteri de qarastyrylǵan.

«Kásipkerlik sýbektilerine barmaı-aq tekserý jumystaryn júrgizý tájirıbesi qoldanylyp keledi. Adamnyń ómiri men densaýlyǵyna, sondaı-aq qorshaǵan ortaǵa qaýip tónbegen jaǵdaıda kez kelgen buzýshylyqty óz erkimen retteýge quqyq berilip otyr. Búginde jańa modelge sáıkes aýqymdy tekserý jumystary dızel otyny naryǵynda, avtohımııa óndirisi, qurylys materıaldary jáne elektr tehnıka saýda naryǵynda júrgizilip jatyr», dedi B.Sultanov.

О́nim sapasyn arttyrýda qoǵamdyq uıymdardyń da rólin kúsheıtý týraly aıtyldy. Buǵan qatysty oń mysal da jeterlik.

«Mysaly, shekarada júrgizilgen tekserýlerden keıin Sement qaýymdastyǵy sertıfıkattaý organdarynyń «kóleńkeli sertıfıkattardy» bergeni týraly faktilerdi anyqtaǵan.

Naryqtaǵy jalǵan sertıfıkattardyń jolyn kesý óndiristiń ósýine áser etti. Naqty aıtqanda, qaýymdastyqtyń aqparatyna sáıkes 11 mln tonnadan astam sement óndirilip, tarıhı rekord ornady.

Osyǵan uqsas jaǵdaı avtohımııa ónimderi saýdasynda da oryn alǵan. Salalyq qaýymdastyqtyń ótinishi boıynsha memlekettik baqylaýdyń nátıjesinde sapasyz salqyndatqysh suıyqtyqty satý deregi anyqtalyp, 6 mln teńgeden asa aıyppul salyndy», dedi Saýda jáne ıntegrasııa mınıstri.

Bıyl standarttaý josparyna sáıkes metallýrgııa óner­ká­si­binde (alıýmınıı profıli) 23 standart ázirlengeni belgili boldy. Bul talapty engizip, olardy qoldaný arqyly kem degende 18 aıdyń ishinde (esepteý ISO daıyndaǵan standarttardy qol­daný tıimdiligin anyqtaý ádistemesine sáıkes júrgiziledi) kásiporyndardyń tabysyn 6%-ǵa arttyrýǵa, qosymsha 50 jumys ornyn qurýǵa, shyǵarylatyn ónimniń assortımentin (alıýmınıı vıtrajdary, qasbetter) 10-nan 20-ǵa deıin ulǵaıtýǵa jol ashady dep alǵa tartty vedomstvo basshysy.

«Agrarlyq memleket retinde azyq-túlik ónimderin eksporttaıtynymyz málim. Bıyl BAÁ men Túrkııanyń halyqaralyq deńgeıde moıyndalǵan «halal» standarttary negizinde saýdaǵa qoıylatyn ónim men kórsetiletin qyzmetke baılanysty 6 standart ázirlendi. Bul Parsy shyǵanaǵy men Taıaý Shyǵystaǵy áleýetti eksporttyq naryqqa shyǵýǵa jáne jyl saıyn 180 mln dollar somasyna otandyq ónimdi ótkizýge múmkindik beredi», dedi B.Sultanov.

Budan basqa mınıstr aldaǵy 4-5 jylda 900-ge jýyq (882) synaq zerthanalarynyń úshten biri jańǵyrtylatynyn jetkizdi. Bul ekonomıkalyq ósim jónindegi ulttyq jobanyń aıasynda iske asyrylady. Quzyrly organ basshysy aıtqandaı, bıyl elordada shaǵyn turmystyq qurylǵylardan bastap júk kólikterine deıin arnaıy synaqtan ótkizýge qaýqarly kólemdi kameranyń jumysy jolǵa qoıylǵan.

Salalyq mınıstrlik kásipkerlerdi, ásirese sertıfıkattaý, zerthana sýbektilerin áriptestikke, zerthanalyq bazany jańǵyrtýǵa ınvestısııa salýǵa shaqyrdy.

Búginde Ulttyq akkredıtteý ortalyǵynyń aqparaty boıynsha Qazaqstanda ruqsaty bar synaq zerthanalarynyń sany – 882.