Aımaqtar • 18 Qańtar, 2022

Jetisý: jaǵdaı turaqtaldy ma?

69 ret kórsetildi

Jetisýdaǵy dúrbeleńniń dabysy alystaǵanmen, aımaqta áli de terrorlyq qaýiptiń «qyzyl deńgeıi» saqtalyp otyr. Qazir óńirde áleýmettik nysandar men qoǵamdyq kóliktiń jumysy tolyq qalpyna kelip, adamdardyń boıyndaǵy úreı seıile bastaǵandaı. Alaıda oblys ortalyǵy mańyndaǵy aýyldarda áskerıler qosymsha operasııalar júrgizip jatqany jóninde aqparat ta bar.

Jalpy, jappaı tártipsizdik kezinde Almaty oblysynda 337 adam medısınalyq kómekke jú­gingeni anyqtaldy. Onyń ishinde jaraqat alǵandardyń 13-i áskerı qyzmetker. Oqıǵada zardap shekkender qatary Taldyqorǵan qalasynda kóp bolyp tur. Osy kúnderi oblys ortalyǵyndaǵy kóp salaly aýrýhanaǵa 114 adam kómek surap júgingen.

– Bizdiń mekemege zardap shekken 114 adam júginip, onyń 25-i aýrýhanaǵa jatqyzyldy. Qalǵandaryna tıisti ambýla­to­r­lyq em jasaldy. Kúrdeli kezeńde aýrýhanada dárigerlerdiń kúsheıtilgen brıgadasy jumys istep, zardap shekkenderge joǵa­ry deńgeıde medısınalyq kó­mek kórsetti. Qazir aýrýhanaǵa túsken 25 adamnyń 15-i jazylyp shyqty. Operasııa jasalǵan 10 adam ońaltý em sharalaryn qabyldaýda. Olardyń densaýlyǵy birte-birte túzelip keledi, – deıdi Taldyqorǵan qalalyq kóp salaly aýrýhanasynyń dırektory Jumahan Moldaǵulov.

Aıtpaqshy, Almaty oblysy­nyń ákimi Qanat Bozymbaev atal­ǵan kóp salaly aýrýhanaǵa baryp, búlik kezinde zardap shekken azamattardyń densaýlyq jaǵdaıyn bildi. Ákim jaralanǵan qarapaıym azamattarmen jáne kúshtik qurylymdar ókilderimen tildesti. Qyzmettik mindetterin adal oryndap, qaısarlyq pen batyrlyqtyń úlgisin kórset­kenderi úshin áskerı mamandarǵa alǵys bildirdi. Olardyń otbasylaryna barlyq qajetti kómek kórsetiletinin aıtty.

О́kinishke qaraı, jetisýlyqtar «qańtar qyrǵyny» kezinde qaza bolǵan jerlesterin jer qoınyna tapsyryp jatyr. Sonyń biri Almaty qalasyndaǵy jappaı tártipsizdikke toıtarys kezinde buzaqylar qolynan mert bolǵan shekara qyzmetiniń arnaýly maqsattaǵy utqyr is-qımyldar tobynyń tehnık-júrgizýshisi, 22 jastaǵy Shavkat Armıdınov bolatyn. 2000 jyly 21 shildede Uıǵyr aýdany, Úlken Dıqan aýy­lynda dúnıege kelgen jas jaýyn­ger 2020 jyly Qordaıdaǵy shekara beketinde áskerı boryshyn ótep, keıinnen sol bólimde kelisimshartpen qyzmetke qalaǵa ketken. Jaqynda Otan aldyndaǵy boryshyna adal bolyp, el tutastyǵyn saqtaý jolynda erlikpen qaza tapqan jas ulannyń denesi óziniń týǵan jeri – Úlken Dıqan aýylyna jetkizilip, aýdan jurtshylyǵy ony aqtyq saparǵa shyǵaryp saldy.

Sondaı-aq jappaı tártipsizik saldarynan oblystaǵy 120 kásip­kerlik nysany zardap shekken kórinedi. Negizgi shyǵynǵa batqan kásipkerler Taldyqorǵan qalasy, Qarasaı, Jambyl, Aqsý aýdandarynan anyqtalǵan. Aldyn ala esepteýler boıynsha keltirilgen zalaldyń jalpy somasy 8,5 mlrd teńgeden asyp otyr. Máselen, oblys ortalyǵynda «Qaraǵash» saýda úıi men ondaǵy 5 býtık, Sulpak turmystyq tehnıka dúkeniniń 3 jelisi, 2 Technodom tehnıka dúkeni, Small sýpermarketi, polısııa departamenti men oblys ákimdiginiń ashanalary zardap shekti, Qarasaı aýdanynda «Aport» saýda jáne oıyn-saýyq ortalyǵynda 70-ke jýyq dúken men býtık jáne «Altyn orda» bazarynyń 20-ǵa jýyq saýda dúkeni, sondaı-aq 2 janarmaı beketi, Aqsý aýdanynda 1 kásiporyn, Jambyl aýdanynda 1 janarmaı quıý stansasy jáne basqa da nysandar tonalyp, órtelgen.

 

Almaty oblysy

Sońǵy jańalyqtar

Uqsas jańalyqtar