Ońtaılysy – onlaın oqý

Osyndaı sebepten sońǵy bir aptada kún saıyn vırýs­ty juqtyrýshylar sany 500-den túspeı tur. Máselen, 19 qańtarda munaıly óńirdiń 568 turǵynynan qaýipti indettiń belgisi anyqtalyp otyr. Onyń ishinde Atyraý qalasynda – 396, Teńiz ken ornynda jumys isteıtin 61 jumysshy bar. Son­daı-aq Qyzylqoǵa aýdanynda – 30, Jylyoıda – 21, Inderde – 20, Qurmanǵazyda – 16, Mahambette – 15, Isataıda – 14, Maqat aýdanynda 5 naýqas tirkeldi.

«Qazir «qyzyl aımaqtaǵy» Atyraý oblysynda 3 443 adam úı jaǵdaıynda emdelip jatyr. Jylyoı aýdanynda ornalasqan «Teńiz» ken ornyndaǵy ınfek­sııalyq stasıonarda – 501, mo­dýldik aýrýhanada – 171, aýdan­dardaǵy stasıonarlarda – 48, al №2 oblystyq aýrýhanada – 42, ftızıopýlmanologııalyq ortalyqta 30 adam hattamaǵa sáıkes em-dom alý úshin oqshaý­lanǵan», dep málimdedi oblystyq densaýlyq saqtaý basqarmasynyń baspasóz qyzmeti.

О́ńirdegi 2 360 tósektik oryn­ ınfeksııalyq stasıonarlarda 801 adam (júkteme – 33,9%) jatyr. Stasıonarlardyń 106 orynǵa eseptelgen jansaqtaý bólim­she­lerinde koronavırýspen aýyryp jatqan 12 naýqastyń jaǵdaıy aýyr dep baǵalanyp otyr. Onyń ishinde eki pasıent ókpeni jasandy jeldetý apparatyna qosylǵan. Bul bólim­shelerdegi júkteme – 11,3%.  Soń­ǵy eki kúnde qaýipti vırýs­ty juqtyrǵan 3 naýqas qaıtys bolǵan.

Dárigerler bir eldi ǵana emes, jahan jurtyn qaýiptiń qa­ýyzyna syıdyrǵan juqpaly indettiń taralýyn vaksına saldyrý ǵana tejeı alatynyn joqqa shyǵarmaıdy. Osy oraıda óńirde COVID-19 ınfeksııa­syna qarsy vaksınalardyń birinshi komponentin 262 250 adam saldyrǵany belgili bolyp otyr. Vaksınalardyń ekinshi komponentin ektirgender sany 245 198 adamǵa jetipti. Alaıda Pfizer ekpesin alǵandar men qaı­tadan vaksına saldyrýdyń kór­setkishi áli tómen ekeni baı­qalady. Máselen, júkti áıelder men bala emizip otyrǵan analarǵa, 12-18 jas ara­ly­ǵyndaǵy jas­óspirimderge ar­nal­ǵan Pfizer vaksınasyn 3 891 adam ektirgen. Al 16 560 adam ǵana reavksınalaýdan ótken.

«Qyzyl aımaqtaǵy» tur­ǵyn­dardyń qaýipti vırýsqa shaldy­ǵýyn tejeý úshin karantındik shek­teýler talaby kúsheıtildi. Bas sanıtar dárigerdiń mindetin at­qarýshy A.Bekeshevanyń qaýly­symen 600-den asa oqýshysy bar mektepterdegi sabaq onlaın for­matqa kóshirilse, 600-ge deıin oqýshy oqıtyn mektepter sa­baqty shtattyq rejimde ótkizip jatyr.

«Kolledjder men joǵary oqý oryndarynyń stýdentterin oqytý aralas oqytý formatyna – barlyq dáris onlaın, tá­jirıbelik, zerthanalyq, se­mınarlyq sabaqtar ıkemdi kes­te boıynsha shtattyq rejimde, vaksınalanǵan oqýshylar men tolyq vaksınalaý kýrsyn aıaq­taǵan stýdentterdi oqý orny ákim­shiliginiń qaraýy boıynsha shtattyq rejimde oqytýǵa jol beriledi. Epıdemııalyq táýekel aımaǵyna qaramastan mektepten tys qosymsha bilim berý uıym­darynda jeke sabaqtar shtattyq rejimde, toptyq – 10 adamǵa deıin, múmkindigi shekteýli balalar men eresekter úshin túzetý (korreksııa) ortalyqtarynda, ból­melerde jeke jáne 8 adamǵa deıingi toptyq sabaqtar shtattyq rejimde ótkiziledi», delingen jańa qaýlyda.

Mundaı shekteý oqýshylardyń koronavırýs ınfeksııasyn juq­tyrmaýy úshin qolǵa alynyp otyr. Demek «qyzyl aımaqtaǵy» oqý­shylarǵa ońtaılysy – onlaın oqý.

Atyraý oblysy