Álem • 11 Aqpan, 2022

Somalıde qurǵaqshylyq kúsheıdi

«Balalardy qutqarý» uıymynyń sońǵy jarııalanǵan esebine sáıkes Somalıde keıingi onjyldyqta qatty qurǵaqshylyq daǵdarysy ótip jatyr. Sonyń saldarynan mıllıondaǵan adam ash, halyqtyń kóbi tamaq pen sý izdep úılerinen ketýge májbúr.

Svetlana ǴALYMJANQYZY

Somalıdegi 18 aımaqtyń 15-inde 12 000-nan astam adam qatysqan suhbat júrgizilgen. Halyqaralyq qaıyrymdylyq uıymy júrgizgen saýalnama nátıjesi kóptegen otbasy eshqashan toıyp tamaq ishpeıtinin, tipti únemi ash júretinin kórsetti.

Jeke sharýashylyqtardyń úshten birinen astamynda keminde bir adam 24 saǵat boıy tamaqsyz qalady. 10 adamnyń altaýyna jýyǵy maldyń qyrylýyna baılanysty tabys kózin joǵaltqanyn habarlady. Sonymen birge 2021 jylǵy qarashada júrgizilgen esepke sáıkes eki aıǵa sozylǵan byltyrǵy qurǵaqshylyqta 700 000-ǵa jýyq túıe, eshki, qoı jáne iri qara ólgen.

«Balalardy qutqarý» uıymynyń Somalıdegi óńirlik dırektory Mohamýd Mohamed «ashtyqqa negizgi sebep – klımattyń ózgerýi» deıdi.

«Somalıde qurǵaqshylyq qashan da boldy, al somalı halqy árqashan onymen kúresý joldaryn biletin. Buǵan deıin olar shamalary jetkenshe kúresip, mal jutqa ushyrap, shyǵyndaryn eseptep, sodan keıin qaıta qalpyna keletin. Biraq qazir jaǵdaı basqasha. Bul adam ólimi sıklin ózgertip, Somalı balalaryn bolashaǵynan aıyrady», deıdi sarapshylar.

Somalı klımattyń ózgerýi boıynsha álemdegi eń osal elderdiń qataryna kiredi. Sońǵy onjyldyqta memleket 2011, 2016 jáne 2021 jyldary úsh úlken qurǵaqshylyq daǵdarysyn bastan ótkerdi.

2011 jyly Birikken Ulttar Uıymy Somalıde jut bastalǵanyn jarııalady, onda 3,7 mıllıon adam azyq-túlik qaýipsizdiginiń daǵdarystyq deńgeıine tap boldy. Bıyl olardyń sany 4,6 mıllıon bolady dep boljanýda.

BUU-nyń daǵdarysqa qarsy turý úshin 1,5 mıllıard AQSh dollaryna jýyq kómek berý týraly úndeýiniń donorlar tek 2,3 paıyzyn jınap berdi. Halyqaralyq uıym máseleni sheship, halyqty qutqarý úshin tez arada iske kóshý kerek deıdi.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz