Kanada bıligi sherýshilerdi tarata bastady

Bastapqyda qańtar aıynyń sońynda kanadalyq júk kóligin júrgizýshiler AQSh-qa qatynaý úshin mindetti vaksınalaý pasporttaryn engizýge nemese sapardan keıin karantınde otyrýǵa mindetteýge narazylyq bildirgen bolatyn. Artynsha bul aksııa koronavırýsqa qarsy sharalar men Djastın Trıýdo úkimetiniń saıasatyna qarsy jalpy narazylyqqa aınaldy.

Sherýshiler Ottavanyń ortalyq kóshelerin úsh apta boıy jaýyp tastap, ýaqytsha shatyr quryp jaıǵasqan edi. Alaıda osy mańaıda turatyn azamattar tártipsizdikter men qatty dybystarǵa shaǵymdanǵan. Olar syrtta shyǵa almaı, óz úılerinde qamalyp otyrǵanyn aıtady.

Kanada astanasynyń bıligi men polısııasy budan bylaı jaǵdaıdy baqylaı almaıtynyn jáne narazylyqty toqtatý úshin qosymsha resýrstar qajet ekenin moıyndap, Ottava úkimeti qalada tótenshe jaǵdaı jarııalady. Osy jaǵdaıda ǵana el úkimeti sherýdi taratý úshin batyl áreketter jasaı alady.

Kanadalyq polıseıler «tazartý» operasııasyn juma kúni tańerteń bastady. Buǵan deıin Kanada úkimeti narazylyqqa shyqqandardy kúshpen taratýǵa múmkindik beretin Tótenshe jaǵdaılar týraly zań qabyldady. Operasııa kezinde 170 adam qamaýǵa alyndy. Qarsylyq kórsetken keıbir narazylardy polıseıler qolyn baılap áketýge májbúr bolǵan. Sonymen qatar ortalyqtan 53 kólik quralyn súırep shyǵarǵan.

Senbide polısııa parlamenttiń aldyndaǵy jáne premer-mınıstr keńsesiniń janyndaǵy alańnyń kóp bóligin tazartý úshin burysh spreıi men shý granatalaryn qoldanǵan. Polısııanyń málimetinshe, senbide qamaýǵa alynǵandardyń keıbiri oqqaǵar kıgen, al sómkeleri men kólikterinen tútin granatalary men basqa da janǵysh zattar tabylǵan.

Ottava polısııasynyń ýaqytsha bastyǵy Stıv Bell polısııa kamerasyna túsken narazylyq bildirýshiler jaýapqa tartylatynyn málimdedi.

«Biz sizderdi anyqtaýǵa tyrysamyz jáne qarjylyq sanksııalar salamyz, qylmystyq aıyptaýlar bolady. Tergeý taǵy birneshe aıǵa sozylady», dedi S.Bell.

Polısııa ókilderi operasııa kezinde zańsyz narazylyq bildirýshilerge aımaqtan ketýge eskertý jasaǵanyn, habardy ashyq ári naqty jetkizgenin aıtady.

Sonymen qatar Kanadanyń Ontarıo provınsııasynyń joǵarǵy soty túrli elderden narazylardy qoldaý úshin jibergen mıllıondaǵan dollardy, sonyń ishinde krıptovalıýta jáne túrli bank shottaryn buǵattaý týraly sheshim qabyldandy. Shottardy buǵattaý Ottava turǵyndary men bıznesmenderdiń talap-aryzy negizinde qabyldanǵan. Advokat Pol Champtyń sózine qaraǵanda, mundaı shara kanadalyq sot isi tarıhyndaǵy alǵashqy sheshim bolǵan.

Premer-mınıstrdiń orynbasary Krıstııa Freland dúısenbide ótken baspasóz máslıhatynda bankter na­ra­zy­lyqtarǵa qatysy bar kez kelgen adamnyń jeke shotyn eshqandaı sot sheshiminsiz buǵattaı alady dep málimdedi. Ol sondaı-aq Kanadanyń «Terrorızmdi qarjylandyrý» erejelerin keńeıtip, oǵan krıptovalıýta men kraýdfandıng platformalary da qosylatynyn habarlady.

Hakerler osyǵan deıin GiveSendGo kraýdfandıng platformasynda júk kóligi júrgizýshilerin qoldaý maqsatynda jalpy quny 8,4 mıllıon dollar bolatyn 93 myń qaıyrymdylyq tólem kelip túskenin jarııalaǵan.

El úkimetiniń tótenshe jaǵdaı jarııalaý týraly sheshimin synaǵandar da bar. Kanadanyń azamattyq bos­tan­dyqtar qaýymdastyǵy bul qadam eldegi demokratııa men azamattyq bostandyqqa qaýip tóndiredi degen pikirde.

Keıbir sarapshylar jergilikti toptyń qalypty na­ra­zylyq aksııasynyń halyqaralyq qozǵalysqa ulasyp, qoǵam turaqtylyǵyna úlken qaýip tóndirýine Facebook-tiń de úlesi bar dep esepteıdi. Kraýdfandıng jarııalap, halyqtan aqsha jınaý, túrli heshtegter arqyly oqıǵanyń saıası sıpatyn arttyryp jibergender bar degen de pikir aıtyldy.

Dese de, kóptegen synı pikirge qaramastan, baqy­laý­dan shyqqan sherýdi úkimet polısııa kúshimen taratýǵa sheshim qabyldap otyr.