Sýretshi

Bir kúni kóshede ketip bara ja­typ, top balanyń ishinen júzi nur shashyp turǵan uldy kóredi. Ǵaısanyń beınesi. Sýretshi balany ertip alyp, Paıǵambar obrazynda álgi náresteniń júzin qa­byrǵaǵa kóshirdi. Biraq sýretshi Iýdaǵa úlgi bolatyn jandy tappaı qınalady. Ol tipti ondaı ob­­razdy «Ǵumyrymnyń sońyna deıin kezdestirmeıtin shyǵarmyn» dep oılaıdy. Jyl artynan jyl ótedi. Sýretshi ábden qartaıady. Kóp jyldaryn shýly sharaphanalarda ótkizedi. Sóıtken kúnderdiń birinde óńi júdeý, kıimi qyryq shoqpyt áldekim qısalańdap kelip tabaldyryqtan attar-attamastan «Sharap, sharap!» dep qulaı ketedi. Sýretshi ony súıep turǵyzyp, be­tine qaraǵanda, júregi zý ete qa­lady. Munyń júzinen adamzat ále­mindegi opasyzdyq, ozbyrlyq, qyl­mys ataýlyǵa qymsynbaı baratyn qara júrek qanypezerlik men­mundalap turǵandaı edi. Iý­danyń beınesi.

Qart sýretshi álgi jandy dereý sheberhanasyna alyp ketip neshe jyldan beri toqtap turǵan sýretin aıaqtaýǵa kirisedi. Bir kúni álgi jigittiń kenet sıqy qasha sas­qa­laqtap, óń-túsi ózgerip sala be­redi. Qantalaǵan kózderi óziniń sý­retine úreılene qadalyp qalady. Qart sýretshi onyń bulaısha ala­surǵanynyń mánin túsinbeı: «Sa­ǵan ne boldy? Bári durys pa?» deıdi. Álgi adam basyn salbyratyp, eki alaqanymen betin basyp, qystyǵyp jylap jiberedi. Biraz ýaqyttan keıin ol basyn kóterip, qart sýretshige qadala qarap:

«Siz shynymen-aq meni umytyp qaldyńyz ba? Talaı jyldyń aldynda siz meni Qasıetti náreste Isanyń da sýretin salǵanda osynda alyp kelgen edińiz ǵoı» deıdi.

Keıipker taǵdyrymen qansha­lyqty oınaýǵa bolady?

Esimizge Oskar Ýaıldtyń «Do­rıan Greı portreti» túsedi. Ja­nyn Ibiliske satqan keıipker esh qartaımaıdy. Ýaqyttyń adam be­tine túsiretin shımaı-ájimi jyldar boıy keıipkerdiń maıly boıaýmen salynǵan portretine túsedi. Ýyzdaı jas Dorıan ǵumyrynyń sońynda kúnáhar shaldyń beınesi keskindelgen portretti pyshaqtap jatady...

Jo-joq. Olaı emes. Úı jınap júrgen ká­nızaktar jap-jas Dorıannyń beınesi salynǵan kar­tınanyń qasynda ózine-ózi qol jum­saǵan, beti ájim-ájim qa­rııany taýyp alady.

Álgi sýretshi Ǵaısanyń sýretine sol balany nysan etpegende, onyń taǵdyry múldem basqasha óriler me edi?! Iá, M.Býlgakovtyń «Master ı Mar­garıtasyndaǵy» Iýdeıanyń besinshi prokýra­tory Pontıı Pılatty Sheberdiń, ıaǵnı jazýshynyń eki myń jyldan keıin bosatatyny sııaqty...

Shyǵarma desek te shyndyq, bálkim Ǵaısa bop týý – taǵdyr, Iýda bop ólý – tálkek.

Sizdiń keıipkerińiz kim?

Siz kimniń keıipkerisiz?