Qobyzben qaýyshtyrǵan kesh

«Máńgilik saryn» dep atalǵan konsertke Táttimbet atyndaǵy óner kolledjiniń qylqobyz klasy qabyrǵasynan 30 jyl ishinde túlep ushqan, búginde elimizdiń ár qıyrynda jemisti eńbek etip júrgen ónerpazdar qatysty.

Kesh baǵdarlamasynda Qobyz atasy Qorqyttyń kúıleri, óner ıesi Yqylas Dúkenulynyń shy­ǵar­­malary jáne halyq kom­po­­zıtorlarynyń týyndy­lary Táttimbet atyndaǵy akademııalyq ha­lyq aspaptar orkestriniń súıe­mel­deýimen tyńdarman qaýym nazaryna usynyldy.

Sonymen qatar mádenı is-sharada qobyz klasynyń negizin qalaǵan Jańqash Yqylas­uly Jumabekovtiń shákirt­teri – ha­lyq­aralyq jáne respýb­lı­ka­lyq baıqaýlardyń laýreattary óner­lerin ortaǵa salyp, kó­rer­men qaýymnyń qulaq qury­shyn qandyrdy.

Sondaı shákirtterdiń biri – Aqtóbe qalasynan osy keshke arnaıy kelgen Aıaýlym Jetpis­bae­va óziniń ustazyna degen zor qurmetin shynaıy sezimmen jet­kiz­di.

– Men Jańqash Yqylasulynan tálim alyp, Almaty qala­syna 2012 jyly attandym. Konser­va­torııaǵa túsip, qo­byz aspabyn jetik meńgerýdi jal­­ǵastyrdym. Qazir Aqtóbe qa­la­­syndaǵy Ǵazıza Jubanova atyndaǵy oblystyq fılarmonııa­da qyzmet etip júr­min. Osy mereı­toılyq konsertke men Medet Esbergenov esim­di zamanaýı saz­gerdiń «Kúz» shy­ǵar­ma­syn ala keldim, – dedi alystan at arytyp jetken shákirt.

Sondaı-aq Jańqash Juma­bekov­tiń taǵy bir shákirti, talant­ty ánshi Qazybek Ádikeı ustazy­nyń qurmetine «Qara-aı kózim», «Aǵajaı, Altaıdaı jer qaıda» syndy halyq ánderin tamyljyta oryndap berdi.

Sahna tórine kóterilgen Jańqash Jumabekov bul keshtiń ári­si Qoılybaı baqsy, berisi Dáýlet Myqtybaevtan qal­ǵan ónerdi sabaqtastyryp, nasıhat­taý turǵysynan uıymdas­ty­ryl­ǵan is-shara ekenin aıtty. Sondaı-aq ol qylqobyz sy­ny­byn bitirgen shákirtterdiń ba­ǵyn­dyrǵan belesterin, oryn­daýshylyq sheberlikterin tyń­darmanǵa tartý etýdiń de maq­sat­tyń biri bolǵanyn atap ótti.

– О́ıtkeni shákirt boıynda ustazǵa beımálim bolyp kelgen qyrlardyń osyndaı dúbirli sharalarda ashylýy ábden múmkin. Daryny men sheberligi úılesken tusta ǵana olar tanymaldylyqqa ıe bolady. Al qobyzshylar onyń ishinde men baýlyp ósirgen shákirtter tanymal bolsa, ol meniń de jeńisim dep bilemin, – dep aǵynan jaryldy maestro.

Keshte qylqobyzdyń únine ar­nalyp árlengen halyq áni «Daıdıdaý» tuńǵysh ret tyń­dar­man talqysyna usynyl­dy. Sonymen qatar Álqýat Qazaq­baevtyń «Shabyt» atty shy­ǵarmasy qylqobyzda orkestr­diń súıemeldeýimen birinshi ret oryndaldy.

Atalǵan keshte Qaraǵandy qalasynda qylqobyz óneriniń órken jaıýyna súbeli úles qosqan tulǵanyń biri, ánshi, Táttimbet atyn­daǵy óner kolledjiniń dı­­rektory bolǵan Meıirhan Adam­­­bekovtiń uly Aldanysh ta óziniń ónerimen kópshiliktiń yqy­la­syna bólendi. Ol úlken sahnalarda marqum ákesi jıi aıtatyn, halyqtyń súıikti ánderine aınalyp ketken «Saǵyndym», «Shaı­tankól» shyǵarmalaryn na­­­qy­shyna keltire oryndap berdi.

Buǵan qosa konsertte Tát­timbet atyndaǵy akademııalyq ha­lyq aspaptar orkestriniń súıe­meldeýimen de birneshe kúı oryn­dalyp, dástúrli ánshiler ánnen shashý shashty.

Sara Zeınelqyzy esimdi Qara­ǵan­dy qalasynyń turǵyny konsertten alǵan áserin bylaısha jetkizdi:

– Qobyzdan kúńirenip shyqqan kúı sazy ǵasyrlar únin, ómir tynysyn, halyqtyń sher-muńyn, armanyn baıandap turǵandaı. Adam balasynyń janyn titirken­diretindeı, jaqsy áser qaldy­ra­tyndaı ádemi konsert boldy. Qazaq óneri damı bersin.

Jalpy, eki saǵat boıy tyń­dar­man qaýymdy ýysynda usta­ǵan keremet keshte uzyn sany 30-dan astam týyndy oryndaldy.

QARAǴANDY