Qoǵam • 08 Sáýir, 2022

Aqynnyń baldyrǵandarǵa bazarlyǵy

Jýyqta elordadaǵy Ulttyq akademııalyq kitaphanada aqyn, respýblıkalyq «Aıgólek» balalar jýrnalynyń avtor-redaktory, Mádenıet qaıratkeri, Jýrnalıster odaǵy syılyǵynyń laýreaty, Túrki álemi aqparat salasynyń úzdigi Qymbat Ábildáqyzynyń «Men – Táýelsizbin!» jyr jınaǵynyń tusaýkeseri bolyp ótti.

Suńǵat ÁLIPBAI

Qymbat Ábildáqyzy BAQ-tyń úsh salasy: televızııada – 2 jyl, Qazaq radıosynda – 14 jyl, ózi ashqan Qazaqstandaǵy eń alǵashqy táýelsiz balalar basylymy «Aıgólek» balalar jýrnalynda 18 jyl jas urpaqtyń bolashaǵy úshin adal ter tógip keledi. Q.Ábildáqyzynyń ár taqyrypqa arnaǵan óleń, taqpaqtary balalardyń júregine jyly, tiline jeńil, tez jattalady, patrıottyq sezimin, rýhyn kóteredi. Oǵan dálel – respýblıkalyq deńgeıdegi shyǵarmashylyq baıqaýlarda bas báıgelerdi ıelenýi. Optımıst, pozıtıvti kózqaras ıesi, qoǵam qaıratkeri, maıtalman maman «Aıgólek» jýrnalynyń oqyrmandary – jas jetkinshekter qurmetine bólenýde.

Qazaqqa janashyrlyqpen, janyn sala eńbek jasaıtyndardyń biri – Qymbat Ábildáqyzynyń jyr jınaǵynyń tusaýkeserine arnalǵan is-sharanyń maqsaty – oqyrmandardy ádebıetti súıýge jáne óleń qudiretin baǵalaı bilýge baýlý, qazaq aqyn-jazýshylarynyń shyǵarmalaryn nasıhattaý, aqynnyń otbasylyq óleńderin jastarǵa tanystyrý arqyly dástúrli otbasy qundylyqtaryn dáripteý, órenderdiń óz boıyndaǵy talantyn ashýǵa, ǵylymı izdeniske beıimdelýge, tulǵa bolyp qalyptasýyna jol ashar taǵylymdy-tanymdyq orta qalyptastyrý.

Ic-sharaǵa aqyn, jazýshy, satırık, Halyqaralyq «Alash» ádebı syılyǵynyń ıegeri Kópen Ámirbek, Parlament Májilisiniń depýtaty Maqpal Mysa, alashtanýshy ǵalymdar, professorlar Tursyn Jurtbaı, Aıgúl Isimaq, Eýrazııa ulttyq ýnıversıtetiniń professory Serik Negımov, Qazaqstannyń eńbek sińirgen qaıratkeri Seıdahmet Quttyqadam, aqyn, jyraý, Baıanǵalı Álimjan, qoǵam qaıratkeri Sádibek Túgel, t.b zııaly qaýym ókilderi men oqyrmandar, kitaphanashylar qatysyp, Qymbat Ábildáqyzynyń shyǵarmashylyǵy, jas jetkinshekterge jasap jatqan eńbegi, osy joldaǵy tabandylyǵy týraly pikirlerin aıtty. Áli sııasy da keppegen jańa kitaptyń tusaýyn kesti.

Kezdesýdiń bir qyzyqty jeri, batys jáne basqa da óńirlerden «Aıgólek» jýrnalyn oqyp ósken kóptegen jas arnaıy kelip qatysyp, Qymbat Ábildáqyzyna ózderiniń júrekjardy lebizderin bildirdi, syı-sııapattaryn jasady.

Kezdesý barysynda «Aıgólek» jýrnalynyń búgingi oqyrmandary – astanalyq oqýshylar óz ónerlerin kórsetip, kezdesýdiń shyraıyn keltirdi.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz