Aımaqtar • 06 Mamyr, 2022

Qaraǵandyda maıdangerlerge qurmet kórsetildi

О́kinishke qaraı, ýaqyt ozǵan saıyn keshegi kúndeı kúrkirep ótken soǵystyń kózi tiri kýágerleri azaıyp-aq keledi. Máselen, búginde Qaraǵandy oblysynda tarıhta «Uly Otan soǵysy» degen atpen qalǵan qandy qyrǵyndy kózimen kórgen 24 maıdanger ǵana qalypty... Uly jeńistiń 77 jyldyǵyna oraı kenshiler astanasynda oblystyń ákimi Jeńis Qasymbek maıdangerlermen, tyl eńbekkerlerimen jáne ardagerler uıymdarynyń basshylary kezdesip, olardy merekemen quttyqtady, dep jazady Egemen.kz oblys ákiminiń baspasóz qyzmetine silteme jasap.

Qaırat Ábilda

– Jeńis kúni óziniń qasıetti boryshyn adal atqarǵan mıllıondaǵan soldat pen ofıserlerdiń ómirimen, tyl eńbekkerleriniń jaýdy jeńýge ólsheýsiz úles qosqan jankeshti eńbegimen óteldi. Qaraǵandylyqtar sonaý qyrqynshy jyldary jeńisti jaqyndatý jolynda erliktiń eren úlgisin kórsetken jerlesterin oryndy maqtan etedi. Biz álemdik jáne ulttyq tarıhtyń shejiresine ózderiniń esimderin altyn áriptermen jazǵan erlerge qurmet kórsetip, basymyzdy ıip alǵys aıtamyz, – dedi óńir basshysy.

Oblys ákiminiń qabyldaýynda bolǵan ardagerler arasynda ǵumyr jasy 99-ǵa kelgen maıdanger Búrkit Esjanov ta boldy. Aqsaqal kezdesýde sóz sóılep, elimizdiń beıbit zamanda órkendep ósýine tilektistigin bildirdi.

Ushqyshtar ýchılıshesin bitirgen Búrkit Esjanov soǵysqa 19 jasynda attanǵan. Ol Máskeýdi nemis-fashısterinen qorǵap, Kýrsk shaıqasyna qatysqan. Soǵystan keıin soltústik-shyǵys Qytaı men Mońǵolııany japon mılıtarısterinen azat etýge at salysty.

Kezdesýge qatysqan eń egde maıdangerdiń biri 95 jasqa kelgen Nıkolaı Kýrılenko boldy. Temirtaýda turatyn aqsaqal áli tyń eken: belsendi ómir saltyn ustanyp, velosıpedpen serýenge shyǵyp turatyn kórinedi.

Eske sala ketsek, oblysta maıdangerlerdiń árqaısyna bir mıllıon teńgeden syılyq jasaldy. Sonymen qatar, bir jolǵy materıaldyq kómek tyl eńbekkerlerine, qorshaýda bolǵan Lenıngrad turǵyndaryna, konslager tutqyndaryna, erikti jaldamalylarǵa, soǵysta qaza tapqandardyń jesirleri men áıelderine kórsetildi.

Kezdesýden keıin oblys basshysy 97 jastaǵy Marııa Shınkevıch pen 99 jastaǵy Suńǵat Sattyǵulov syndy maıdangerlerdiń úılerine arnaıy baryp, qurmet kórsetti.

Maıdanǵa 19 jasynda attanǵan Marııa Shınkevıch atqyshtar dıvızııasynyń mergeni bolypty. Chehoslovakııa jerin jaýdan azat etip, Uly Jeńisti Praga qalasynda qarsy alǵan. Al 293-shi atqyshtar dıvızııasynyń mınomet esebiniń komandıri bolǵan Suńǵat Sattyǵulov Stalıngrad túbindegi shaıqastarǵa qatysyp, Mınsk qalasyn nemisterden azat etipti. Maıdan dalasynda eki ret aýyr jaraqat alǵanyna qaramastan, soǵysqa qaıta oralyp otyrǵan.

Maıdangerlerge arnalǵan bir mıllıon teńgelik kómek bıýdjet esebinen bolsa, «Qazaqmys», «ArselorMıttal Temirtaý», «Jáırem» KBK syndy iri ónerkásiptik kompanııalar men jekelegen kásipkerler de qarap qalmaı, ardagerlerge 63 mıllıon teńgeniń demeýshilik járdemin kórsetti.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz