Aýyl • 18 Mamyr, 2022

Qazaq úshin aýyldyń orny erekshe

Alataý – Eltaı aýyldyq okrýginiń aýmaǵyna kiretin aýyl. Jympıty – Aqsaı jolymen kelip, Tasqudyqtyń tusynan ońǵa burylyp, 8 shaqyrymdaı júrseńiz, borly taýdyń qarsy betindegi júrekteı jumyr jurtqa tap bolasyz. Aýylǵa kirý úshin ótkelden ótesiz. Syldyraǵan bulaq sizdi ońaı jibere qoıar ma eken? Mindetti túrde aıaldaısyz, aq sýdy alaqanǵa alyp, júzińizge basasyz.

Egemen Qazaqstan

Osydan 5-6 jyl buryn Alataýdan da tútin shyqpaı qala ma dep alań qyldyq. Halyqqa taýdyń etegindegi týǵan mekendi qıyp ketý ońaı bolǵan joq. Qar men balshyqtan kóz ashpaıtyn jol qatynasy amalsyzdan bir sheshim qabyldaýǵa májbúr etti. Sońǵy sheshim – kóshý edi. Halyq qozǵaldy. Úıler buzyldy. Keshegi uzyn kósheden kóshken jurttyń orny ǵana qaldy. Tek bir ǵana úıden tútin shyǵyp turdy. Ol – Málik Sárkeevtiń úıi edi.

Eltaı aýyldyq okrýginiń ákimi Rashıd Baıyrovpen birge Alataýǵa attandyq.

«Oıly-qyrly jerlermen, ytqyp-ytqyp júgirgen» aq qoıandaı aq «Nıvamen» borly taýdyń baýraıyna da jettik. Málik aǵamyzdyń mal túgendep kelip, jırenin shiderlep, otqa jiberip jatqan beti eken. Ol 2015 jyly jeke sharýashylyq quryp, sonyń jumysyn qolǵa alypty. Tabyssyz da emes kórinedi. Erinbegenge, kózin tapqanǵa qaı jerde de jumys bar ǵoı. «Qazir jalǵyz emespin. Alataýǵa 5 birdeı sharýashylyq irge saldy. Tórt túlik úshin qolaıly óńir ǵoı. El kóbeıedi dep oılaımyn», deıdi «Stan» qojalyǵynyń ıesi.

Málik aǵamyz baıqaǵan bir dúnıe bar eken. Senbi men jeksenbi bolsa, Alataýǵa kólik aǵylatyn kórinedi. «Kelgender beıit basyna aıaldaıdy. Keıin eski kósheni aralap, úıleriniń oryndaryna toqtaıdy. Bir kezderi osy Alataýdan kóshken otbasylary ekeni birden belgili. Saǵynysh qoı!», deıdi Málik aǵa.

Arǵy jaqtaǵy qyratta tóte jazýmen naqyshtalǵan kóne qulpytastar qaraıady. Qarsy bette borly taý tur. Eteginde syldyrap bulaq aǵyp jatyr. Biz syldyrady deımiz, bálkim ol saǵynyshtyń ánin aıtyp jatqan shyǵar...

Baýyrjan ShIRMEDINULY

Batys Qazaqstan oblysy,

Syrym aýdany

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz