Ekonomıka • 02 Maýsym, 2022

Sáýir aıyndaǵy saýda-sattyq

195 ret kórsetildi

Sáýirdiń sońynda «Astana» halyqaralyq qarjy ortalyǵynyń bırjasyndaǵy (AIH) kompanııalardyń jalpy naryqtyq kapıtaldandyrýy 24,9 mlrd dollardan asty. Bırjadaǵy saýda-sattyq kólemi 21 599 206 dollardy qurap, naýryzdaǵy kórsetkishpen salystyrǵanda 2,8 ese artty. Sáýirdegi naryqtyq belsendilik bir jyl burynǵy kórsetkishten (22 910 467 dollar) sál tómen bolyp shyqty.

Sáýirdiń sońyndaǵy jaǵdaı boıynsha, AIH-tiń resmı tizimine 84 emıtenttiń 126 baǵaly qaǵazdar shyǵarylymy kirdi. Onyń ishinde 2 ETF (Exchange traded funds) pen 17 ETN (Exchange traded notes) bar. 18 qazaqstandyq jáne 12 halyqaralyq broker AIH-tiń saýda músheleri bolyp sanalady. AIH-tiń Ortalyq depozıtarııinde ınvestorlardyń 306 myńnan astam shoty ashyldy. Shottardyń sany Jusan Invest brokeriniń 128 myńnan asa shot ashýy esebinen aıtarlyqtaı ulǵaıdy.

Sáýirdiń sońynda AIH-te úlestik quraldar lıstıngi bar kompanııalardyń («Qazatomónerkásip», Polymetal, «Halyq bank», Ferro-Alloy Resources Limited, «SentrKredıt Banki», Kaspi.kz) jalpy naryqtyq kapıtaldandyrýy 24,9 mlrd dollardan asty.

2022 jylǵy sáýirde AIH-tiń resmı tizimi «Halyq banktiń» jalpy somasy 200 mln dollardy quraıtyn, ký­pon­dyq mólsherlemesi 2,5 paıyz úsh jyldyq oblıga­sııa­larynyń lıstıngimen tolyqty. Otandyq bank sektory kóshbasshysynyń oblıgasııalaryn shyǵarý 500 mln dollar somasyndaǵy oblıgasııalyq baǵdarlamasynyń birinshi transhy bolyp sanalady.

AIXQI ındeksi 932.51 pýnktten 863.49 pýnktke deıin, ıaǵnı 7,4 paıyzǵa tómendedi. 9 kompanııanyń úsheýi ǵana aıdy oń nátıjemen aıaqtady. Eń jaqsy ósimdi Kaspi.kz aksııalary kórsetti, olardyń ósýi 22,4 paıyzdy qurady. Kaspi.kz qunynyń ósýine kompanııa qyzmetiniń oń nátıjesi qozǵaý saldy. 2022 jyldyń 1-toqsanyndaǵy taza paıda 117 mlrd teńgege jetti. Bul ótken jyldyń 1-toqsanyna qaraǵanda 49 paıyzǵa kóp. Buǵan qosa Kaspi.kz kompanııasynyń dırektorlar keńesi London qor bırjasynda 100 mln dollar som­asyna ǵalamdyq depozıtarlyq qolhattardy satyp alý baǵdarlamasyn bekitkenin habarlady.

Central Asia Metals aksııalarynyń baǵasy azdap ósti (+1,7 pa­ıyz). Bazalyq metaldarǵa ósken suranys kompanııa bız­nesiniń uzaq merzimdi keleshegine oń áserin tıgizýde. «Bank SentrKredıttiń» aksııalary sáýirdi jasyl aımaqta aıaq­ta­dy (+1,41 paıyz). Bank sáýirde «Alfa-Bankpen» qarjy ıns­tı­tý­tynyń Qazaqstandaǵy enshiles bankin satyp alý boıynsha túbe­geıli ýaǵdalastyqqa qol jetkizdi. Soǵan sáıkes «Bank SentrKredıt» reseılik banktiń enshiles uıymynyń 100 paıyz jaı aksııalaryn satyp alyp, onyń jańa aksıonerine aınalady.

«Qazaqtelekom» aksııalarynyń quny azdap tómendedi (-0,64 paıyz). «Halyq Bank» aksııalary sáýirdi quldyraýmen aıaqtady (-6,32 paıyz). Aksıonerlerdiń jınalysynda qabyldanǵan 2021 jylǵa dıvıdend tólemeý týraly sheshimdi naryq teris qabyldady. Sonymen qatar sáýirde «Halyq Bank» 330 mlrd teńge kólemindegi «Sberbank» portfeliniń bir bóligin satyp alǵanyn atap ótken jón.

Sáýirdiń qorytyndysy boıynsha Kcell aksııalary -17,64 paıyzǵa tómendedi. Kompanııa basqarmasynyń tóraǵasy telekom-operator aksııalarynyń qunyna yqtımaldy áser etetin faktorlar bolýy sebepti naryqtyń mundaı jaýabyn negizdeýdiń qıyn ekenin atap ótti. Olardyń qataryna irgeli makroekonomıkalyq kórsetkishter men geosaıası táýe­kelderdi jatqyzýǵa bolady. 2022 jyldyń 1-toqsany bo­ıynsha jarııalanǵan eseptilikke sáıkes, qarjylyq kórsetkishter turaqty bolyp qalyptasty.

KazTransOil-dyń jarııalanǵan eseptiligi men dıvıdendter tóleý jónindegi jarııalanǵan sheshimi naryqtyń kútkenindeı bolmady. Aıdyń qorytyndysy boıynsha munaı qubyry kompanııasynyń aksııalary aıtarlyqtaı tómendedi (-21,13 paıyz). Joǵary geosaıası shıelenistiń Polymetal aksııalaryna qysymy jalǵasýda. Ol sáýirde -27,08 paıyz joǵaltty. Naryq sonymen birge Reseıge qarsy qoldanylǵan sanksııalardyń «Qazatomónerkásipke» áser etý áleýetin de joǵary baǵalap otyr. Onyń aksııalary sáýirde -14,05 paıyzǵa tómendedi. Sanksııalyq rejim ázirge ýran salasyna áser etken joq. Alaıda «Qazatomónerkásip» oryn alǵan jaǵdaıdyń barlyq yqtımaldy táýekelderi muqııat baǵalanyp otyrǵanyn resmı habarlady. Kompanııada táýekelderdi barynsha azaıtýǵa jáne óz aksıonerleriniń múddesin qorǵaýǵa kúsh salynatyny atalyp ótti.

Sońǵy jańalyqtar

Bıyl mektep formasy ózgermeıdi

Bilim • Búgin, 16:14

Dollar qymbattady

Ekonomıka • Búgin, 15:54

Jetisý oblysynyń TJD basshysy taǵaıyndaldy

Taǵaıyndaý • Búgin, 15:08

Aralda jol apatynan bir adam kóz jumdy

Oqıǵa • Búgin, 11:35

Qazaqstannyń eksport kólemi artty

Ekonomıka • Búgin, 09:52

Uqsas jańalyqtar