Tańdaý Ábdiǵalıulyna tústi

Konstıtýsııalyq reformanyń talabyna sáıkes Berik Ábdiǵalıulymen birge óńir basshysynyń qyzmetinen úmitker retinde Qaraǵandy oblysy ákiminiń orynbasary Serik Shaıdarovtyń kandıtatýrasy máslıhat depýtattarynyń talqysyna túsken bolatyn. Al jergilikti depýtattar aldynda eki úmit­ker­diń kandıdatýrasyn Memleket basshysy Qasym-Jomart Toqaevtyń tapsyrmasymen Jez­qazǵanǵa arnaıy kelgen Prezıdent Ákimshi­liginiń Basshysy Murat Nurtileý tanystyrdy.

Ulytaý oblysynyń ákimi bolǵan Berik Ábdiǵalıuly bıyl 51 jasqa tolady. Onyń eki joǵary bilimi bar: Ál-Farabı atyndaǵy Qazaq ulttyq ýnıversıteti men Reseı Federa­sııa­synyń Prezıdenti janyndaǵy halyq sharýashylyǵy jáne memlekettik qyzmet akademııasyn támamdaǵan.

Jergilikti depýtattarǵa Ulytaý oblysyn áleýmettik-ekonomıkalyq turǵyda damytý jónindegi baǵdarlamasy unaǵan Berik Ábdiǵalıulyna atalǵan óńirdiń tynys-tirshiligi jaqsy tanys. Mysaly, ol 2010 jyly Ulytaý aýdanynyń ákimi laýazymynda qyzmet etti. Odan keıin 2010-2012 jyldar aralyǵynda Jezqazǵan qalasynyń ákimi boldy. Al 2019-2021 jyldary ol ekinshi márte Ulytaý aýdanyn basqardy.

Qazaqstan jurtshylyǵyna tarıhshy retinde jaqsy tanymal Berik Ábdiǵalıuly jeke
10 kitaptyń jáne eki eńbektiń birlesken avtory. Olardyń qatarynda jańa ákim avtory jáne jetekshisi bolyp sanalatyn «Jeltoqsan – 1986 jyl» 10 tomdyǵy jáne «Alash áskeri. Aq Armııa quramyndaǵy qazaq bólimi» atty súbeli eńbegi bar. Sondaı-aq ol kóptegen ulttyq jobanyń avtory jáne jetekshisi.

Sonymen, Ulytaý oblysynyń turǵyn­dary atynan sheshim qabyldaǵan jergilikti máslıhattar depýtattary Berik Ábdiǵalıuly­nyń kandıdatýrasyn basym daýyspen qoldady. Jezqazǵan – Sátbaev – Ulytaý óńiriniń aktıvi óndiristik, kólik-logıstıkalyq jáne týrıstik áleýeti zor jańa oblystyń ósip-órkendeýine múmkindiktiń mol ekenin atap ótip, jańa ákimniń el úmitin aqtaıtynyna senim bildirdi.

Ulytaý oblysy