Aımaqtar • 30 Maýsym, 2022

Qııardan mol ónim alady

Abaı qalasynda qaraýsyz qalǵan shahta qurylys basqarmasynyń jylyjaıy bolatyn. Uzaq ýaqyttan beri qańyrap bos turdy. Osydan bes jyl buryn jergilikti kásipkerler Álııa Jumataeva men Qazbek Asylbekov osy nysandy jańǵyrtýdy qolǵa alǵan.

Qaırat Ábilda

«Kóz – qorqaq, qol – batyr» degen, aınaldyrǵan az ǵana ýaqyttyń ishinde tyndyrymdy jumystyń nátıjesinde bos turyp, azyp-toza bastaǵan jylyjaıdyń tamyryna qan júgire bastady.

Álııa Jumataeva áýeli ákimdikke nysandy satyp alý quqyǵymen senimgerlik basqarýǵa berý týraly ótinim túsirgenderin aıtady.

– Jylyjaıdyń esh jerde balansta joq ekeni belgili boldy. Aldymen nysandy ıesiz dep taný týraly sot otyrystary boldy. Sodan keıin ony memleket balansyna aýystyrdy. Keıin saýda-sattyq júrgizilip, jylyjaı bizge senimgerlik basqarýǵa berildi. О́tken jyldan bastap biz jóndeý jumystaryn bastadyq: áınekter ornattyq, jylytý jumystaryn júrgizdik, jumys oryndaryn qurdyq. Sóıtip, jylyjaı qalpyna keltirildi, – deıdi isker áıel.

Qazirgi ýaqytta jalpy aýdany myń sharshy metrden asatyn jylyjaıda segiz adam jumys isteıdi. Kásipkerler, eń aldymen, munda severın surypty bes myń qııar butalaryn ekti. Butadan orta eseppen tórt kılo ónim jınaý josparlanǵan. Al bir jyl ishinde jylyjaı qyzmetkerleri 70 tonna qııar jınamaqshy.

Kásipker Álııa Jumataevanyń aıtýynsha, jylyjaıda nıtrattardy qoldanbaıdy eken.

– Bizde ekologııalyq kásiporyn bar. Tamshylatyp sýarý júıesi jolǵa qoıylǵan. О́nimdi Qaraǵandy, Nur-Sultan qalalarynda satamyz, – deıdi ol.

Jylyjaı qyzmetkerleriniń mundaǵy alatyn ortasha eńbekaqysy 110 myń teńgeniń mańaıynda. Buǵan qosa taǵy 10 myń teńge aqy tólenedi. Al kózge túsken ozat qyzmetkerler mindetti túrde qarjylaı yntalandyrylyp otyrylady.

Severın surypty qııar ósiretin kásiporyn bolashaqta qyzǵaldaq pen pavlonııa egýdi josparlap otyr. Mysaly, kelesi jyldyń 8 naýryzyna qaraı 25 myń qyzǵaldaq ósirý josparda bar eken. Mamandardyń esebinshe, qazirgi ýaqytta qııar ósirýge aýa raıy qolaısyz, salqyn. Alaıda bul gúlder úshin eń qolaıly temperatýra kórinedi.

Gúl demekshi, kásipkerler kelesi jyly jylyjaıda 200 sharshy metr alańda pavlonııa ósirýge arnalǵan tálimbaq jabdyqtamaq. «Bul óte ádemi aǵash, terektiń balamasy. Bir jylda úsh metrge deıin boı kóteredi», deıdi Á.Jumataeva.

Jalpy, kásipkerlerge tıesili 500 sharshy metr bos alań bar. Osy oraıda olar taǵy bir jylyjaıdy úzdiksiz sıkl úshin jabdyqtaýdy josparlap otyr. Onyń bireýinde ónim egetin bolsa, ekinshisi bir jyldaı demalyp, tyńaıyp turady.

Qaraǵandy oblysy,

Abaı aýdany

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz