Dımash pen Djekson

Qazaqtyń Abaıy, orystyń Pýshkıni, nemistiń Getesi qaıda qaldy demeı me? Odan Imanbektiń de, álgindeı kózqarastaǵy adamdardyń da eshteńesi ketpeıdi. Másele qazirgi óner men mádenıetke degen kóz­qaras­tyń ózgergendiginde shyǵar.

Biz mynadaı ǵajap sáıkestiktiń ústinen tústik. Ánshiligine álem jurtshylyǵy tańyrqaǵan bizdiń Dımash Qudaıbergendi de, zamanynda jer-jahanǵa dańqy jaıyl­ǵan Maıkl Djeksondy da tanystyryp jatpaımyz oqyrmanǵa. Alaıda ekeýin jaqyndastyratyn dúnıe az emes eken. Dı­mash Maıkl Djeksonǵa elikteıdi desek artyq bolar, biraq sahna perisin asa qur­met­tep, ónerin joǵary baǵalaıtyny anyq. Tipti Dımash Maıkldyń ónerine artyq qaraıtynyn suhbattarynda da jasyrmaı aıtyp júredi. «Men Maıkl Djeksonnyń, Djekı Channyń, Lýchano Pa­varottıdiń jankúıerimin. Olardyń bar­lyǵy tabandylyq pen mańdaı terdiń arqasynda tabysqa jetken. Bárinen de mańyz­dysy, olar álemdik deń­geıdegi juldyzdar bolsa da, erekshe kishi­peıil, baýyrmal jandar. Sondyqtan men olardy úlgi tutamyn», degen bir suh­batynda.

Sondaı-aq alǵashqy jeke konsertinde Dımash Qudaıbergen sahna patshasy Maıkl Djeksonǵa qurmet kórsetti. Ol Maıkl Djeksonnyń Billie jean, Dangerous ánin aıtyp, ataqty «aı júrisin» beınelegeni de tyńdarmandarynyń esinde shyǵar. Al myna sáıkestikke tap bolǵanda, osynyń bári jaı bolyp qalǵanyn nege jasyraıyq?

Bul derekti Kalıfornııa shtatynyń (AQSh) seksenge aıaq basqan Sılvııa Sandoval atty turǵyny óz aýzynan áńgimelegeni beınetaspada júr. Sılvııa jas kezinde medbıke bolyp jumys istegen. Ári jas kúninen Maıkl Djeksonnyń óneri dese ishken asyn jerge qoıatyn tyńdarmany eken. Sondyqtan bolar, álde basqa, ol biraz ýaqyt sahna juldyzynyń úıinde turypty. Sonda Maıkl áldebir konsertinen keıin oǵan óziniń sýreti salynǵan plakatqa qoltańbasy men datasyn qatar jazyp, syıǵa tartady. Sonymen ómir jalǵasa beredi. Maıkl dúnıe salǵanda bul kisi de bir adamdaı qaıǵyrady. Arada 24 jyl ýaqyt ótkende teledıdardan Dımashtyń daýysyn estıdi ǵoı bizdiń keıipker. Qaıran qalady. «Án salǵandaǵy daýysy bylaı tursyn, asyqpaı, bappen sóılegeni de Maıklǵa keledi», deıdi Sılvııa. Esine kezinde Maıkl syıǵa tartqan plakat túsedi.

Bir kúni Kalıfornııada dostarymen demalyp júrgen Sılvııa tý syrtynan Dımashty kórip qalyp, dostarynan ony toqtatýyn surap, tildesedi. «Qurmetti Dımash, mende osydan 24 jyl buryn maǵan Maıkl Djekson syıǵa tartqan plakat bar qoltańbasymen. Sony saǵan keterińde áýejaıǵa jetkizip bersem qalaı qaraısyń?» dese, bizdiń Dımash: «Joq, ony men qazir alǵym keledi», depti.

Dımash pen Sılvııa ertesine jolyǵy­syp, jádiger ıesin tabady. Mundaǵy eń ǵajaby – plakattaǵy ánshiniń sýreti men qoltańbasy emes, ony syıǵa tartqan kún, aı, jyl – Dımashtyń týǵan kúni bolyp shyǵady (24.05.1994). Jáne Maıkl Sıl­vııaǵa: «Bir kúnderi bul plakatty bireýge bergiń kelse, meni qurmet tutatyn janǵa syılarsyń», dese kerek.

Basqa qurlyqtyń ókili, arany alyp muhıt bólip jatsa da ónerden ushqyn atqan rýhanı baılanysqa eshteńe bóget bola almaıdy eken ǵoı. Maıkl plakatqa qoltańba qaldyryp jatqanda ózinen keıin tańǵajaıyp álemdik ánshi dúnıege kelip jatqanyn sezbese de, bir dúnıe belgisine jarar degen senim bolǵan shyǵar. «Qudaısyz qýraı synbaıdy» deıdi qazaq. 

Aıtpaqshy, Maıkl bul plakatty ramkadan shyǵaryp jatqanda baıqamaı shetin jyrtyp alypty. «Shet jaǵynda eptegen jyrtylǵan tusyn jamap bereıin», depti Dımashqa Sılvııa bererde.

Dımash «joq, bul maǵan Maıkldyń qoly jyrtqanymen qundy», dep jaýap qatqan eken.

«Siz bul plakatty qalaı satyp jiber­megensiz?» dep qaıran qalypty Dımash.

«Qazir de satyp jibersem kesh emes, qaldyryp ketesiń be?» depti.

Árıne Dımash oǵan kelispegen. Mun­daı zattardyń baǵasy kún ótken saıyn artatyny anyq qoı. Bálkim óner jármeńkesinde aýksıonǵa qoıylar ma edi? Bastysy shırek ǵasyrdan soń jádiger ıesin taýyp tur. Demek bul tegin bolmaǵany.