Búgin – Abaı Qunanbaıulynyń týǵan kúni

Ǵylymı ortada qazaqtan shyqqan uly oıshyldyń týǵan kúni týraly eki túrli nusqa tarasa da, jyldar boıy 10 tamyz resmı túrde Abaı Qunanbaıulynyń týǵan kúni retinde tańbalanyp keldi. Abaıdyń 175 jyldyq mereıtoıy qarsańynda búgingi aıtýly kún kúntizbege Abaı kúni retinde resmı bekitilgen.

«Qazaqstan Respýblıkasyndaǵy merekelik kúnderdiń tizbesin bekitý týraly» Qazaqstan Respýblıkasy Úkimetiniń 2017 jylǵy 31 qazandaǵy №689 qaýlysyna tolyqtyrý engizý týraly «Qazaqstan Respýblıkasyndaǵy merekeler týraly» 2001 jylǵy 13 jeltoqsandaǵy Qazaqstan Respýblıkasy Zańynyń 4-babyna sáıkes Qazaqstan Respýblıkasynyń Úkimeti QAÝLY ETEDI:

1. «Qazaqstan Respýblıkasyndaǵy merekelik kúnderdiń tizbesin bekitý týraly» Qazaqstan Respýblıkasy Úkimetiniń 2017 jylǵy 31 qazandaǵy № 689 qaýlysyna (Qazaqstan Respýblıkasynyń PÚAJ-y, 2017 j., № 53, 343-qujat) mynadaı tolyqtyrý engizilsin: kórsetilgen qaýlymen bekitilgen Qazaqstan Respýblıkasyndaǵy merekelik kúnderdiń tizbesi: mynadaı mazmundaǵy 22-1-tarmaqpen tolyqtyrylsyn: «22-1. Abaı kúni – 10 tamyz». 2. Osy qaýly alǵashqy resmı jarııalanǵan kúninen keıin qoldanysqa engiziledi», delingen Úkimet qaýlysynda.

Aqynnyń 175 jyldyq mereıtoıy aıasynda 2020 jyly álemniń 70-ke jýyq elinde Abaı toıyna arnalǵan 250-den astam túrli is-shara ótti.

Abaı Qunanbaıuly ǵulama ǵalym, oıshyl aqyn, aǵartýshy ustaz retinde ultymyzdyń tuǵyry bıik maqtanyshy.

Abaı shyǵarmashylyǵy - álemdik týyndylar qatarynda oryn alǵan halqymyzdyń baǵa jetpes murasy men rýhanı azyǵy.

Qala ákimdiginiń resmı saıtynda habarlanǵandaı, búgin elordada bul birqatar mádenı is-shara uıymdastyrylady.

«Atameken» Qazaqstan kartasy» etno-memorıaldyq kesheninde aqynǵa arnalǵan «Abaı dara, Abaı dana qazaqta» atty dáris ótedi.

Sáken Seıfýllın mýzeıinde «Abaı álemi» atty poezııa keshi uıymdastyrylady. Kesh barysynda zertteýshilermen, abaıtanýshylarmen kezdesý ótip, aqynnyń shyǵarmalary men óleńderi oqylady.

Ortalyq qalalyq kitaphanada saǵat 11:00-de bastalatyn «Abaı dana, Abaı dara qazaqta» atty poezııa saǵatynda aqyn shyǵarmashylyǵymen tolyǵyraq tanysýǵa bolady. Osynda saǵat 12:00-de «Abaı – uly tulǵa» taqyrybynda taǵy bir is-shara ótedi. Onda elorda turǵyndary kórnekti aǵartýshynyń ǵylym men mádenıetke qosqan úlesin baǵalaýǵa, onyń patrıot, azamat jáne aqyn retindegi tulǵasynyń mańyzdylyǵy týraly túsinikterin keńeıtýge múmkindik alady.

Saǵat 12:00-de №2 qalalyq kitaphanada Muhtar Áýezovtiń «Abaı joly» shyǵarmasyna arnalǵan ádebı saǵat ótedi.

Uly aqynnyń qalyptasýy týraly tyńdap qana qoımaı, ómiri týraly ádebı kompozısııany Qýyrshaq teatrynda tamashalaýǵa bolady. Munda saǵat 16:00-de K.Ejembektiń «Jaryq sáýle» qoıylymy sahnalanady.

Sondaı-aq qala turǵyndary men qonaqtary «ALJIR» memorıaldy-murajaı kesheninde «Abaıdyń qýǵyn-súrginge ushyraǵan urpaqtary men týystary» kórmesin tamashalaı alady. Kórmede Abaıdyń týystary men urpaqtarynyń fotosýretteri kórsetiledi.

Al Ortalyq kitaphana «Aqqýǵa únin qosqan – kemel daryn» atty kórmeler sıklin bastaıdy. Kórmede Abaıdyń ǵana emes, halqymyzdyń ózge de jazýshylary men aqyndarynyń shyǵarmashylyǵymen tanysýǵa bolady.