Halyq aldyndaǵy jaýapkershilik

Alyp terrıtorııamyzdyń ıgi­ligin kórý úshin aldymen ag­rarlyq saıasatty damytý ma­ńyzdy. Al agrarlyq saıasat aýyl-aımaqta jatyr. Osyny eskergen Prezıdent aýyldyń jyldar boıy qordalanǵan máselelerin júıeli túrde sheshýdi qolǵa alýdy tapsyrdy. Aýylǵa eń aldymen qoldy bolǵan jerin – jaıylymy men egisin qaıtarý kerek. Ekinshi aýyl sharýashylyǵyn júrgizýge qajetti, máselen sýmen qamtý sekildi keleli isterdi sheshý de kún tártibinde turǵan ózekti suraqtyń biri. Sýsyz eginshilik te, baý-baqsha da, mal sharýashylyǵy da alǵa baspaıtyny belgili. Sondaı-aq eskirgen tehnıkalardy jańalaý qajettigi týyndap otyr. Sharýa qojalyqtaryna naqty qoldaý kórsetý úshin osyndaı alǵa bastyrar máseleler tez arada sheshilýge tıis. Qazir aýyl sharýashyly­ǵyn damytý úshin memlekettik baǵdarlamalar ázirlendi, qarjy qarastyrylǵan desek te, aýyl-aımaqqa odan beter kóńil bólý eldiń jaǵdaıyn jaqsartady. El turǵyndarynyń 40 paıyzyn óńirlerde, salt-dástúrimizdiń qaımaǵy buzylmaǵan aýyldardaǵy turǵyndar quraıdy. Prezıdenttiń qabyldap otyrǵan sheshimi osy aýyl-aımaqty aldaǵy 5 jylda órkendetýdi kózdep otyr.

Ulyqtaý rásimi kezinde Prezı­dent kótergen mańyzdy máseleniń biri – zańsyz shyǵarylǵan kapıtaldy qaıtarý. Shetel asyp ketken qarjyny qaıtarý úshin arnaıy zań jobasy ázirlenbek. Qazaq «Ketken maldan qaıyr joq, eger izdegeni bolmasa» deıdi. Memleket basshysy Qasym-Jomart Toqaev aýyl baılyǵynan túsken túrli tabystyń barlyǵyn shetel asyp ketýine jol bermeý qajetin aıtyp otyr. Árıne, ketken aqshaǵa izdeý salyp, qaıtqan qarjynyń ózin el múddesine, memlekettik baǵdarlamalarǵa, strategııalyq túrli tetikterge qoldana bilý bul da aýqymdy jumysty qajet etedi. Osy ýaqytqa deıin áleýmettik teńsizdiktiń áserinen qoǵamda senimsizdik, teris kózqaras beleń alǵany jasyryn emes. Sondyq­tan shetelge ketken el baıly­ǵyn, qazynasyn el birligin shashyp almaı qaıtadan jınaqtaý qazirgi Memleket basshysynyń alǵa qoıǵan birden-bir maqsaty bolyp otyr.

Buǵan qosa Prezıdent shaǵyn jáne orta bıznestiń damýyna kedergi keltiretinderdiń bári qatań jaýapqa tartylatynyn aıtyp keledi. Qasym-Jomart Toqaev bul jerde lıberaldyq saıasatty júrgizý jaıyn sóz etip otyr. Memleket árbir kásipkerdiń qyzmetine aralaspaıdy jáne onyń árbir isine kedergi bolmaýyn qadaǵalaıdy, ásirese, bıznes ıelerine moratorıı jarııalaý qatań baqylanady. Mundaı jaǵdaılar ókinishke qaraı elimizde boldy. Sondyqtan bul máseleni Prezıdent beker qozǵap otyr­ǵan joq. Eldi alǵa jyljytatyn kásipkerliktiń kózi – shaǵyn jáne orta bıznes, sol sebepti olardyń jumys jasaýyna tolyq múmkindik berýimiz kerek. Olardyń kásibi arqyly sapaly taýar shyǵaryp, sapaly qyzmet kórsetý arqyly eldegi ónerkásip, ekonomıka salasy damı berý kerek. Sondyqtan da Prezıdent memleket pen kásipkerlik áriptestik deńgeıde bolý kerek degen qaǵıdatty ustanyp otyr.

Elimiz osy jyly áleýmettik, qoǵamdyq kúızelisti bastan keshirdi. Osy kezde túsken júk pen jaýapkershilikti bılik elmen birge kóterdi. Bir-birin estý, bir-birin qoldaý, konstrýktıvti dıalog qurý arqyly túrli bastamalarǵa qol jetkizdi. Bul sózsiz Ata Zańymyzdaǵy óz­gerister, qurylymdyq, kons­tıtýsıonaldyq, demokratııalyq ózgeristerdiń barlyǵy saıası reforma arqyly júzege asty, sonyń alǵashqy legi retinde Konstıtýsııalyq zańnamalar bekitildi. Elimizde saıası ómir qaıta jańǵyrýdy bastan ótkerip jatyr. Bul – saıası partııalardyń dúnıege kelip, árbir bılik organdaryna ádiletti saılaý joldary arqyly ótip, árbir turǵynnyń múddesin qorǵaıtyn depýtattardy, árbir turǵynnyń muń-muqtajyn tyńdaıtyn úkimet ókilderin qaıtadan qalpyna kel­tirý. Osynyń barlyǵy sóz­siz azamattyq qoǵamnyń zań qurýy­men baılanysty. Son­dyq­tan aldaǵy Prezıdentimizdiń 7 jyldyq mer­­ziminde halyq ıgiligine saı ju­mystar atqaryl­maq, ony bılik óz moınyna alady dep senemiz. Prezıdenttiń ustanymy halyq, tarıh, ar-ojdan aldyndaǵy jaýapkershilik, onyń maqsat-múddesi de osy.

Maqsat JAQAÝ,

saıasattanýshy