Saıasat • 06 Jeltoqsan, 2022

Azyq-túlik baǵasyn turaqtandyrýǵa arnaldy

Premer-Mınıstrdiń orynbasary – Saýda jáne ıntegrasııa mınıstri Serik Jumanǵarın áleýmettik mańyzy bar azyq-túlik taýarlarynyń baǵasyn turaqtandyrý máseleleri jóninde keńes ótkizdi.

Egemen Qazaqstan

Keńeske qatysýshylar 2022 jylǵy jeltoqsanda jáne 2023 jylǵy kóktemde baǵanyń kúrt ósýine jol bermeý aıasynda qabyldanyp jatqan jedel jáne júıeli sharalardyń barlyq spektrin qarastyrdy. Jedel is-sharalarda deldaldardy anyqtaý jáne baǵa tizbegin taldaý jónindegi óńirlik komıssııalardyń jumysyna úlken ról beriledi. Bul komıssııalardyń jumysynda áli de nátıje joq.

«Negizgi azyq-túlik ónimderin satýdyń deldaldyq shemalaryn tergeý jónindegi óńirlik komıssııalardyń jumysy júıesiz, qarasha aıynda barlyǵy 25 otyrys ótkizildi. Atap aıtqanda, Túrkistan, Qyzylorda, Qaraǵandy, Shyǵys Qazaqstan, Almaty oblystarynda jáne Astanada ótken aıda birde-bir otyrys ótpedi. Tıisinshe, olardyń jumysy nátıjeli emes. О́tken aptada Almaty oblysynda ÁMAT sanatyndaǵy 6 ónim boıynsha (kúrish, súzbe, tuz, taýyq eti, maılylyǵy 2,5% aıran, 1-sanattaǵy jumyrtqa) baǵa 0,7%-ǵa, Astanada 0,5%-ǵa (1-sorttaǵy un, 1-surypty unnan jasalǵan nan, sábiz, pııaz, qant) qymbattady. Saýda komıteti Oral qus fabrıkasynan jumyrtqa satyp alyp, ony saýda ústemesinen asyryp satý faktilerin anyqtady. Mundaı faktiler basqa aımaqtarda da anyqtalyp otyr», dedi Saýda komıteti tóraǵasynyń mindetin atqarýshy Aıdar Ábildabekov.

Aýyl sharýashylyǵy vıse-mınıstri Jeńis О́serbaı turaqtandyrý qorlary jumysynda qoldanýǵa bolatyn úsh kezeńnen turatyn jańa tásilderdi usyndy. Statıstıkaǵa sáıkes, bıylǵy azyq-túlik ınflıasııasyna qant (2022 jyldyń 11 aıynda 71,9%) jáne jemis-kókónis ónimderiniń (2022 jyldyń mamyr-shilde aılary) baǵasynyń kúrt ósýi áser etti. Jańa tásilder, sonyń ishinde maýsymaralyq kezeńde kókónis baǵasynyń kúrt ósýin boldyrmaýǵa jáne kelesi maýsymǵa daıyndyq kezinde negizgi azyq-túlik óndirýshilerine qoljetimdi qarjylandyrýdy bólýge baǵyttalǵan.

«Demalys kúngi jármeńkelerdi qaıta jandandyryp, adamdarǵa ústeme jáne deldaldarsyz qajetti taýarlardy satyp alý úshin jaǵdaı jasaý qajet. Men óńirlerge deldaldyq shemalar men baǵa belgileý tizbekterin zertteý úshin aptasyna keminde úsh ret óńirlik komıssııa otyrystaryn ótkizýdi tapsyrǵan edim. Nátıjesinde qazir Saýda komıteti olardyń qyzmetin tekserip otyr. Barlyq zań buzýshylyqtar birden baıqalady, kóterme jáne bólshek saýda baǵalaryn salystyrý jetkilikti. О́ńirlik komıssııalar ózderiniń negizgi fýnksııalaryn oryndamaıdy, dál osy kezde jedel jáne ýaqtyly jumys isteý qajet. О́z kezeginde Aýyl sharýashylyǵy mınıstrligi turaqtandyrý qorlarynyń jumysyn qaıta formattaý jónindegi jumysty jalǵastyrýy qajet», dep túıindedi S.Jumanǵarın.