Qasıetti Semeıdiń Qaınar aýylynan túlep ushqan ónerli óren bolmysyna, sýretkerlik kózqarasyna Alash arystaryna qut meken bolǵan kıeli topyraqtyń quty qonyp, rýhy daryǵandaı. Ony Farhad qoltańbasynan shyqqan ár spektakl aıshyqty dáleldep beredi. Qýantarlyǵy sol, jas rejısser qandaı qoıylymdy qolǵa alsyn, onyń árqaısysynyń astarynda ulttyq rýh pen qazaqy bolmystyń ıisi ańqyp turady. Sonysymen de Farhadtyń sahnadaǵy izdenisi eshqashan kóziqaraqty kórermen nazarynan tys qalǵan emes, sezimi bar talǵampaz qaýymdy selt etkizbeı ótkeni sırek. M.Áýezovtiń «Qaragózi», I.Jansúgirov «Qulager», H.Altaı men H.Oraltaı «Altaıdan aýǵan el», Ý.Shekspırdiń «III Rıchard» pen «Lır patshasy», B.Soqpaqbaev «Meniń atym Qoja», Á.Nurshaıyqov «Mahabbat, qyzyq mol jyldar» shyǵarmalary negizinde jazylǵan týyndylar jas rejısser tabıǵatyn jan-jaqty tanytatyn tini myqty, rýhy bıik, kórkemdik deńgeıi joǵary tabysty jumystar sanatynda.
Ásirese Farhad qoltańbasynda kórermenimen qaýyshqan «Qulagerdiń» orny erek. Ondaǵy Qulager taǵdyry arqyly berilgen Alash arystarynyń ókinishke toly ómiri men sahnalyq astarly aıshyqtaý tásilderi hám sımvoldyq sóıletý tilimen kestelengen kórkemdik sheshimder kórýshisin bir sát te beıjaı qaldyrmaıdy. Kerisinshe jan álemińdi álemtapyryq kúıge túsirip, kókiregińe ashy óksik tyǵady. «Qaragózi» de dál solaı. Al «Mahabbat, qyzyq mol jyldar» men «Meniń atym Qojadaǵy» romantıkalyq hám lırıkalyq atmosferany seziný úshin atalǵan qoıylymdardy tek sahnadan baryp kórý kerek.
Ǵ.Músirepov atyndaǵy Qazaq memlekettik akademııalyq balalar men jasóspirimder teatry sahnasyna sony serpin ákelgen Ý.Shekspırdiń «Lır patshasy» – ol óz aldyna bólek áńgimeniń arqaýy. Rejısserdiń aıtýly jumysy kásibı teatr synshylary men óner mamandarynyń baǵalaýymen jyl sońynda Mádenıet jáne sport mınıstrligi tarapynan taǵaıyndalǵan óner salasyndaǵy tuńǵysh ulttyq syılyq – «Umai» úzdikteriniń qatarynan kórindi.
Bul – Farhadtyń alǵashqy júldesi emes. Buǵan deıin de talaı festıvalderde top jaryp, talantymen kópti tańdaı qaqtyryp júrgen talantty jastyń ár jumysy qalyń kórermenniń jiti nazarynda.
Onyń aıqyn dáleli – Farhad Máskeý teatr mamandarymen shyǵarmashylyq tyǵyz qarym-qatynasta. 2017 jyly «TMD, Baltyq elderi jáne Grýzııa jas rejısserleri zerthanasyna qatysyp, paıdaly dáristen shabyttanǵan sýretker óziniń jeke «StarDrama» shyǵarmashylyq zerthanasyn ashty. Zerthananyń alǵashqy qoıylymy 1986 jylǵy Jeltoqsan kóterilisi týraly «86» saýndramasy boldy. Aıtýly shyǵarma «Otkrovenıe» festıvalinde silkinis týdyryp qana qoımaı, Rýmynııaǵa joldama aldy. Sondaı-aq jas daryn GITIS Reseı teatr óneri ýnıversıteti uıymdastyrǵan VIII Halyqaralyq stýdenttik óz betinshe rejısserlik jumystar baıqaýynda qazylar tóreligine Oralhan Bókeıdiń «Shyraǵyń sónbesin» jáne Ýılıam Shekspırdiń «III Rıchard» qoıylymdaryn usynyp, Gran-prı júldesin qanjyǵasyna baılady. GITIS marapatyn rejısser «Energııasy, temperamenti jáne rejısserlik oılaýdaǵy aıryqsha qoltańbasy» úshin jeńip aldy.
О́ziniń jastyǵyna qaramaı Farhat Moldaǵalı búginde irgeli óner ordasy – Ǵ.Músirepov atyndaǵy Qazaq memlekettik akademııalyq drama teatrynyń kórkemdik jetekshisi, Memlekettik «Daryn» jastar syılyǵynyń laýreaty, Tuńǵysh Prezıdent qory stıpendııasynyń ıegeri. Qara shańyraqta qaıtalanbas týyndylaryn ómirge ákelip qana qoımaı, jastar teatrynyń kórkemdik kemeldikke umtylýyna da qaltqysyz qyzmet etip keledi.
