Aqqýdy qutqaryp qaldy

Batys Qazaqstan oblysynda qańtardyń alǵashqy aptasyna deıin kún jyly boldy. Tek sońǵy kúnderi ǵana aýa raıy kúrt sýytyp, aıaz birden 30 gradýsqa jetti. Oral qalasynda 9-11 qańtarda 1-9 synyptar kún sýytýyna baılanysty oqýdan bosatylsa, 10 qańtar kúni búkil mektep oqýshylary túgelimen onlaın oqýǵa kóshti.

Mine, osy kúnderi Egindikól aýylynda turatyn Mahambet aýyl irgesindegi bulaq basynda jalǵyz aqqý júrgenin kórip qalady. Qus tóresiniń óz úıirinen, jubynan qalaı adasyp qalǵany belgisiz. Bulaq mańy qalyń qamys pen qoǵa, yq-panasy kóp jer. Alaıda qatty aıazda qustyń qanatyna muz qatyp, jaǵdaıy qıyndaı bastaǵan. Aqqýdy alystan baqylap, qorǵan bolyp júrgen ormanshy jigit qustyń múshkil halin kórip, ustap alyp úıine ákelipti. Jyly jerde qatqan muzdy eritip, tamaq-sýyn beripti.

«Aqqýdyń qımyly shıraq, kóńili sergek. Bir jaq topshysynda sál isik baıqalatyn sııaqty, biraq qanatyn qaǵyp, erkin qımyldap júr. Qorada jem-sýyn berip, ýaqytsha baǵyp otyrmyn. Bul qustyń endigi taǵdyry ne bolady? Oblys ortalyǵyna jetkizýim kerek pe?» dep Mahambet Oral qalasyndaǵy ekobelsendilerge suraý salǵan eken.

Batys Qazaqstan oblysynda ekologııalyq máselelermen shuǵyldanyp, kóptegen ıgi istiń basynda júrgen «Telegeı» qoǵamdyq birlestiginiń músheleri ózara aqyldasyp, aqqý qus sol Egindikólde, ormanshynyń úıinde bola bergeni durys degen qorytyndyǵa keldi. Bári oıdaǵydaı bolsa, jazǵytury jyl qustary kelgende erkindikke jiberiledi. Oǵan deıin oraldyq belsendiler Egindikólge jem-dán jiberip, kómektesip turmaqshy.

Mahambet Rahmadenuly Qaraǵash orman sharýashylyǵynda 13 jyldan beri qyzmet etedi. Tabıǵat aıasyndaǵy jabaıy janýarlardy qorǵaý – onyń áý bastan tańdap alǵan taǵdyry deýge bolady. Onyń qorǵaýyndaǵy orman alqabynda elik, qaban sekildi janýar­lar kóbeıip ósip keledi. Alaıda Mahambet buǵan deıin aqqý baǵyp kórmegen eken.

Batys Qazaqstan oblysy