Aımaqtar • 24 Qańtar, 2023

Poıyz apatynyń zalaly

39 ret kórsetildi

Jańa jyl aldynda, dálirek aıtqanda, 28 jeltoqsanda astyq tıelgen 19 vagon relsten shyǵyp ketip, myńdaǵan tonna bıdaı aq qar, kók muzǵa shashyldy. Qaraǵandy oblysynyń Qarabas stansasynda bolǵan oqys oqıǵanyń áli kúnge taraptardy pátýalastyrar bir baılamy shyqqan joq.

Qazaqstan kásipkerler qaýym­das­tyǵy «Qazaqstan temir joly» AQ-nyń BAQ-ta tergep-tekserýsiz kásipkerlerdi aıyptaýyna narazy. Oǵan qosa qaýymdastyqtyń málim­deýinshe, apattan soń ile-shala tek­se­re­tin arnaıy komıssııa quryl­ma­ǵan. Komıssııa tek 10 kúnnen keıin ǵana jumysyn bastaǵan. «Bul – vagon ıesi jáne bıdaı tasymaldaýshylar quqyǵyn óreskel buzý», deıdi «Aq jol» Qazaqstan-demokratııalyq partııasy Qaraǵandy oblystyq fılıalynyń tóraǵasy, Qazaqstan kásipkerler qaýymdastyǵynyń basshysy Ermek Ábildın. Kásipkerlerdiń aıtýynsha, apatqa «Qazaqstan temir jolynyń» tozyǵy jetken ınfraqurylymy sebep bolǵan. Sondyqtan olar apattyń tolyq tergelip, ádil sheshimi shyǵýyn suraıdy.

Apat bolǵan kúni «Qazaqstan temir joly» AQ málimdeme jasaǵan edi. «Aldyn ala málimetter boıynsha va­gon­dardyń joldan shyǵyp ketýine jeke menshikke tıesili birinshi astyq tasymaldaýshy dońǵalaq jubynyń keptelip qalýy sebep bolǵan. Bul jaǵdaıdy tekserý úshin «Qazaqstan temir joly» UK» AQ-da arnaıy komıssııa quryldy», dep málimdedi ult­tyq kompanııanyń baspasóz qyzmeti.

Qazaqstan kásipkerler qaýym­das­tyǵynyń basshysy Ermek Tóleý­uly QTJ-nyń júk vagondaryn ta­sy­mal­daýǵa qabyldarda ony tek­­se­rip ala­tyndyǵyn aıtady. Sol ýa­qytta esh­qandaı eskertý jasal­ma­ǵan, aqaý tabylmaǵan.

«QTJ tekserip, ruqsat bergen. Endi kelip, kásipkerlerdi aıyptap otyr. Eń soraqysy, bul ýchaskede apat osymen ekinshi ret tirkelip otyr. Bir aı buryn aǵash tıelgen 14 vagon joldan shyǵyp ketken bolatyn. Tipti bıyl 8 qańtarda taǵy bir apat boldy. Eger mundaı jaǵdaı on jylda bir kezdesse, úndemes edik. Biraq munyń jıi ekenin kórip otyrmyz. Demek proble­ma bar», deıdi Ermek Tóleýuly. Kásipkerlerdiń quqyn qorǵap júrgen qaýymdastyq kásipkerlerdi aıypty etýge úzildi-kesildi qarsy.

Osy oraıda «Aq jol» demokra­tııa­lyq partııasynyń múshesi, Májilistiń burynǵy depýtaty Erlik О́mirǵalı Premer-mınıstr Á.Smaıylov pen Bas prokýror B.Asylovqa depýtattyq saýal da joldady.

«Qazaqstan temir joly» Ulttyq kompanııasynyń vagondar joldan shyǵyp ketken alǵashqy saǵattarda-aq vagon ıelerin kináli retinde taýyp, BAQ ókilderine eshbir dálelsiz sondaı málimdeme berýi – óreskeldik.

Osy arada atalǵan vagondardy «QTJ» UK-nyń júk tıelgen va­gon­dar­­dy tasymaldaýǵa (kommer­sııa­lyq jáne tehnıkalyq jaǵdaıyna) jáne vagondardyń júk kóterý shegine qa­tys­ty esh eskertý jasamaı qabyl­da­ǵanyn atap ótken jón. Onyń ústine vagondar tolyqtaı jańa. Zaýyttyń kepildik merzimi áli ótpegen. Alǵashqy depolyq jóndeýge de jetken joq. Ondaı jóndeý úsh jyldan soń jasa­lady.

Osy arada 2-3 saǵatta arnaıy ter­geý júrgizip, aıypty jaqty anyq­­taý qalaı múmkin boldy degen aqyl­ǵa qonymdy suraq týyndaıdy. Onyń ústine tergeıtin komıssııa áli qu­rylmaǵan, barlyq tarap­tyń ókil­de­ri apat ornyna jetip úlger­megen. Osydan soń «QTJ» UK qyz­met­­kerleriniń áreketi jáne obek­tıv­tiligi, atap aıtqanda, vagondardyń joldan shyǵýynyń naqty sebepterin jasyryp jabýy kúmán týdyrady», deıdi depýtat saýalynda.

Jarııa etilgen málimetterge súıen­sek, júk vagondary joldan shyq­qan kúni eksporttaýshy «Novoıshım» bı­daı kompanııasy ókilderi Qarabas stansasyna dereý jetken. Sol kez­diń ózinde temirjol relsindegi aqaý­lar­dy beıne, fotoǵa túsirip alǵan eken. Atap aıtqanda, bekitýlerdiń ál­sizdigi, bolttardyń basy, bal­daq­tardyń, relster túıisetin sańylaý­lar­dyń joqtyǵy, joldardy normadan tys ke­ńeıtý sekildi aqaýlar kózderine tú­sipti.

«Men jaǵdaıdy estisimen oqıǵa ornyna birden jettim. Shashylǵan bıdaı, aýdarylǵan vagondar, isten shyqqan relster. Sol jerde QTJ ju­myskerleri bolýy kerek, rels­ter­di, vagondardy, shpaldardy alyp, qalpyna keltirý jumystaryn júr­gi­zip jatty. Tekseris júrgizgenshe, olardy ornyna qozǵamaýǵa tıis edi. Qozǵaltqan soń apattyń sebepterin anyqtaý qıyndaı túsedi. Al vagondarymyz jańa», deıdi vagon ıesi­niń ókili Serik Qojahmetov. Onyń aıtýyn­­sha, joǵarydaǵy málimdemeden soń vagon zaýyt ókilderin shaqyrtqan. Vagon ıeleri kinárat vagonnan degenge ılanbaıdy.

Osylaısha, kásipkerler vagonnyń relsten shyǵyp ketýin ınfra­qury­lym­nyń tozýy men onyń durys paıdalanbaýynda desedi. Sondyqtan da «Qazaqstan temir joly» eksport­taý­shy­ǵa kelgen shyǵyndy tolyq óteýge tıis dep sanaıdy.

Astyǵy ysyrap bolǵan «No­vo­ıshım» bıdaı kompanııasyna kel­gen zııan bir mıllıard teńge kóle­min­de dep boljanyp otyr. Búginde táýelsiz sarapshylardan quralǵan komıssııa tergeý jumystaryn júrgizip jatyr. Ashyq resýrstaǵy aqparattar onyń nátıjesi otyz kúnnen soń shyǵatynyn aıtady.

Al qaýymdastyq jarııa etken derek­terge júginsek, 2022 jyly eli­miz­de júk vagondarynyń relsten shy­ǵyp ketýi birneshe ret tirkelgen. Máselen, Shyǵys Qazaqstan júk tasymaly bólimshesinde ótken jyly 3 sáýirde 18 vagon relsten shyǵyp ketip, onyń beseýi Buqtyrma ózenine qu­laǵan. Ekinshi ret 18 tamyzda alty júk vagony relsten shyǵyp ketken.

 

Qaraǵandy oblysy 

Sońǵy jańalyqtar

Prezıdent qolónershiler kórmesin aralady

Prezıdent • Búgin, 21:01

Uqsas jańalyqtar