JSDP úmitkerlerin anyqtady

Budan bólek, bir mandatty aımaq­tyq okrýgter boıynsha 6 kandıdat ma­jorıtarlyq ádispen usynylmaq. Kandı­dat­tardyń tizimi fılıal konferensııalarynda anyqtalady. Partııa tóraǵasy Ashat Rahym­janov kandıdattardyń barlyǵy Qazaq­stan zańnamasyndaǵy talaptarǵa tolyq sáıkes keletinin málimdedi. «Jýyrda ǵana qabyldanǵan áıelder men jastardan, múgedektigi bar tulǵalardan turatyn qosymsha tizim usyný talabyn da saqtap otyrmyz. Sondaı-aq majorıtarlyq júıe boıynsha 6 adam usynylady. Ol kandıdattar óz óńirinde aıtarlyqtaı tanymal bolǵandyqtan jeńiske úmit arta alady dep oılaımyz. Qazaqstan aýqymdy saıası transformasııalardy bastan ótkerip jatyr. Halyq úshin mańyzdy kezeńde eldegi jalǵyz oppozısııalyq partııa retinde bul saıası dodadan shet qala almaımyz», dedi Ashat Rahymjanov.

Quryltaıda partııanyń saılaýaldy baǵdarlamasyn ázirleý máselesi pysyqtaldy. Qujatta turǵyndar jıi kóteretin problemalar, qoǵamdaǵy ózekti máselelerdi sheshý joldary qamtylmaq. Máselen, partııa basshylyǵy Qazaqstandaǵy basty másele adal bıznesti tunshyqtyratyn, ekonomıkanyń damýyna jol bermeıtin, halyqtyń ál-aýqatyna keri áser etetin sybaılas jemqorlyq ekenin jıi alǵa tartady. «Elde benefısıarlary qaıta óńdeý salalaryn damytýǵa múddeli emes korporatıvtik, olıgarhııalyq ekonomıka qalyptasty. Sonyń saldarynan jekelegen adamdar baıyp, mıllıondaǵan adam kedeılikte ómir súrip jatyr. Bul rette, jan-jaqty tergeý júrgizip, urlanǵan jáne offshorlarǵa shyǵarylǵan qarjynyń barlyǵyn qazaqstandyqtarǵa qaıtarý qajet. Táýelsizdiktiń alǵashqy kezeńinde, 90-jyldary kóptegen iri kásiporyn kúlkili somaǵa jekeshelendirildi. Osyndaı kompanııalardyń aksııalaryn halyqqa ótkizý týraly másele óte ózekti. Buǵan IPO arqyly qol jetkizýge bolady. Aktıvterdi ulttyq ekonomıkanyń jańa negizine aınalýǵa tıis orta bıznes ókilderi arasynda bólý kerek», dep esepteıdi partııa basshylyǵy.

Turǵyndardy alańdatatyn máselelerdiń biri – tyǵyz qurylys «jyry». Bul – tek Astana men Almaty qalasyna emes, elimizdiń barlyq derlik qalalaryna ortaq másele. Oppozısııalyq partııa músheleriniń pikirinshe, tyǵyz qurylys qala qasiretine aınalyp otyr. Odan bólek toıymsyz qurylys salýshylarǵa eń jaqsy jer telimderiniń beriletini taǵy bar. Qala berdi, ákimdikter ıgerýge bas jos­par boıynsha mektep, balabaqsha men aýrýhanalar salynýǵa tıis jerlerdi úlestirip otyr. Saldarynan turǵyndar áleýmettik ınfraqurylymnyń joqtyǵynan zardap shegedi. Bul problema partııanyń saılaýaldy baǵdarlamasynda qamtylmaq.

Partııa basshylyǵy syrtqy saıasat máse­lelerine kelgende Qazaqstan áskerı blok­tarǵa qatyspaıtyn, qoldamaıtyn memleket retinde berik pozısııasyn saqtaýy kerek dep esepteıdi. Bul – búginde oryn alyp otyrǵan geosaıası jaǵdaıda óte ózekti. Olar­dyń pikirinshe, basqa memleketter bizdiń esebimizden baıyp, adal básekelestik sharttaryn buzyp, óz óndirýshileriniń qyzyǵý­shylyqtaryn qorǵaıtyn jaǵdaılarda qatań oıyn erejelerin ornatý kerek. Bul rette strategııalyq salalarda Qazaqstan proteksıonızm pozısııasyn ustanýy mańyzdy. «Aldymen ekonomıka, keıin saıasat» strategııa­sy tıimsiz bolyp shyqty. Partııalyq-saıası óristi tolyqqandy reformalaý qajet», dep esepteıdi partııa basshylyǵy.