Sýretti túsirgender A.Dúısenbaev, E.ÚKIBAEV
– Naýryz – jyl basy, halqymyz ejelden toılaǵan kóktem merekesi. Bul – halyq asyǵa kútetin asa erekshe meıram, qystyń yzǵary qaıtatyn, kóktem shýaǵyn tógetin sát. Tabıǵat túlep, tirshilik jańaratyn mezgil. Elimiz áz Naýryzdy árdaıym yrysty yntymaqtyń bastaýyna balaǵan. Alystaǵan aǵaıyn Ulys kúni tatýlasyp, qaıta qaýyshqan. Jurt bir-birine aqjarma tilekterin aıtqan. Kópshilik ortaq dastarqannan dám tatyp, qarııalar jastarǵa batasyn bergen. Babalarymyz Naýryz toıyn jasampaz eńbektiń meıramy sanaǵan. Bulaqtyń kózin ashyp, aǵash otyrǵyzǵan. Elge paıdasy tıetin ıgi ister atqarǵan. Bir sózben aıtsaq, Ulystyń uly kúni – jańa ómirdiń jarshysy, – dedi Prezıdent.
Memleket basshysy osydan bir jyl buryn tyń bastama kóterip, elimizdi túbegeıli jańǵyrtý úshin aýqymdy reformalar usynǵanyn eske saldy.
– Halyq bul bastamalardy qoldady. Biz josparymyzdy bir jylda tabysty júzege asyrdyq. Referendým arqyly Konstıtýsııaǵa mańyzdy ózgerister engizdik. Bılik júıesin qaıta jasaqtaý úshin mańyzdy saıası sharalar iske asyryldy. Keshe ǵana ótken Májilis pen máslıhattar saılaýy – búkil reformalarymyzdy alǵa bastaıtyn óte mańyzdy qadam. Bul saılaý – aýqymdy ózgeristerdiń laıyqty jalǵasy. Osylaısha, memleketimiz jańa saıası dáýirge qadam basty. Jalpy, elimizdiń jańa saıası kelbeti qalyptasty. Tarıhı sát Ulystyń uly kúnimen tuspa-tus kelip otyr. Munyń zor sımvoldyq máni bar. Jańa Qazaqstannyń búgingi beınesi áz Naýryzben tolyq úndesedi, ıaǵnı Ulystyń uly kúninde qasıetti Otanymyz múlde jańa sıpatqa ıe boldy. Muny dúnıe júziniń kóptegen elderi moıyndap otyr. Endi saıası júıesi tolyq jańǵyrǵan elimiz tyń qarqynmen damıdy. Bul reformalar ekonomıkanyń ósýine, halyq tabysynyń artýyna jol ashady. Reformalarymyz mindetti túrde jalǵasyn tabady. Biz jan-jaqty damyǵan qýatty memleket bolamyz. Bul – negizgi maqsatymyz, – dedi Qasym-Jomart Toqaev.
Sonymen qatar Memleket basshysy jasampaz halqymyzdyń keleshegi jarqyn bolatynyna senim bildiretinin aıtyp, memlekettiń múddesi bárinen bıik ekenine nazar aýdardy. Prezıdent el bolashaǵy óskeleń urpaqtyń qolynda ekenin atap ótip, otandastarymyzdy elimizdiń damýyna úles qosýǵa shaqyrdy.
– «Birlik túbi – bereke» deıdi halqymyz. Qoǵamda kelisim jáne tatýlyq bolsa, elimiz kózdegen maqsatyna jetedi. Bizdiń maqsatymyz – aıqyn. Bul – Ádiletti Qazaqstandy qurý. Osy jolda bárimiz bir kisideı jumylaıyq, ardaqty aǵaıyn! Bıyl qasıetti Ramazan aıy Ulystyń uly kúnimen qatar keldi. Oraza ustaıtyn jamaǵattyń nıeti qabyl bolsyn! Ár shańyraqqa Qydyr qonyp, baq darysyn! Jańa jyl qut-bereke ákelsin! Ulys oń bolsyn! Aq mol bolsyn! – dedi Qasym-Jomart Toqaev.
Budan keıin Memleket basshysy «Júrek jylýy» qaıyrymdylyq aksııasyna qatysty. Aksııanyń máni – naýryz aıy boıyna halyqtyń áleýmettik osal toptaryna qamqorlyq kórsetip, kópbalaly otbasylardan, múmkindigi shekteýli jandardan, zeınetkerlerden kelip túsken hattarda jazylǵan ótinish-tilekterdi oryndaý.
Astana Jastar resýrstyq ortalyǵynyń eriktileri Memleket basshysynan sandyqtan alǵashqy hatty alyp oqýdy surady.
Qasym-Jomart Toqaev hat ıesiniń tilegi oryndalatynyn jetkizip, osynaý ıgi isti bastaǵan jastarǵa rızashylyǵyn bildirdi.
Sonymen qatar Memleket basshysy «Arǵymaq» at sporty-saýyqtyrý kesheninde uıymdastyrylǵan «Jeti qazyna» mádenı-sport is-sharasyna qatysty.
Aldymen Prezıdent tazy ıtterdiń kórmesin tamashalady. «Nomad» ulttyq saıatshylyq» qoǵamdyq qorynyń tóraǵasy Bolat Qunanbaev tazyny saqtaý, ósirý baǵytynda atqarylyp jatqan jumystar jóninde baıandady.
Memleket basshysy tazyny halyqaralyq deńgeıde dáripteý qajet ekenin aıtty.
– Qumaı tazy – erekshe janýar, qazaqtyń jeti qazynasynyń biri. Biz tazy men tóbet ıtterdi halyqaralyq deńgeıde keńirek dáripteýimiz kerek. Syrtqy ister mınıstrligi de mindetti túrde atsalysýǵa tıis. Tazyǵa erekshe kútim, qamqorlyq qajet. Bul mańyzdy is kásibılikti talap etedi. Sol úshin arnaıy zań qabyldadyq, – dedi Qasym-Jomart Toqaev.
Sondaı-aq Memleket basshysy Nomad Stunts tobynyń ónerin tamashalady. Kaskaderler aýdaryspaq, qyz qýý, teńge ilý, sadaq atý sııaqty ulttyq oıyn túrleri men kóshpendilerdiń áskerı sherýin kórsetti.
Nomad Stunts tobynyń jetekshisi Jaıdarbek Kúnǵojınov Memleket basshysyna 2020 jyly kaskaderlerge beriletin Taurus World Stunt Awards júldesin jeńip alǵanyn aıtty.
Prezıdent qazaqtyń qaısarlyǵy men ulttyq sportymyzdy álemdik kınematografııada dáriptep júrgen Nomad Stunts tobyna sáttilik tilep, Jaıdarbek Kúnǵojınovke er-toqym syılady.
Sonymen qatar Memleket basshysy Shámshi Qaldaıaqovtyń shyǵarmashylyǵyna arnalǵan otandyq óner juldyzdarynyń konsertin tamashalady.
«Qazaqstan» ortalyq konsert zalynda belgili ánshiler Roza Rymbaeva, Maıra Muhamedqyzy, Meırambek Bespaev, Rýhııa Baıdúkenova, Álisher Kárimov, Qanat jáne Svetlana Aıtbaevtar, sondaı-aq Astana qalasynyń estradalyq-sımfonııalyq orkestri, Jas kórermen mýzykalyq teatrynyń solısteri jáne basqa da ónerpazdar án shyrqady. Konsertke kompozıtordyń jubaıy Jámılá Qaldaıaqova da qurmetti qonaq retinde qatysyp, uly Muhtar men nemeresi Aısulý Qaldaıaqovtar óner kórsetti.
