Kópbalaly anaǵa qurmet

Ulttyq qorǵanys ýnıversıteti Memlekettik qupııalardy qorǵaý kafedrasynyń meńgerýshisi, buryn osy salada uzaq jyl departament basshysy bolǵan polkovnık Qaınarbek Qojahmetov atalǵan qyzmettiń qalyptasýy men damýyna eleýli úles qosyp keledi. Kásibı mereke qurmetine Qaınarbek Baltabaıuly «El qorǵany» vedomstvolyq medalimen marapattaldy. Al onyń anasyna, «Altyn alqa» jáne «Eleýli eńbegi úshin» medaliniń ıegeri Qyzylkúl Qojahmetovaǵa Qorǵanys mınıstriniń Alǵyshaty tabystaldy. Kópbalaly ana búginde alty ul, tórt qyzdy tárbıelep ósirip, 41 nemere jáne 51 shóbere súıip otyr.

– Otan qorǵaýshy bolyp, abyroıly mamandyqty tańdaǵan balalarymdy qoldaımyn. Balalyq shaǵym soǵys kezimen tuspa-tus keldi, ákelerimiz ben atalarymyz soǵystyń qatal synaǵynan ótti. Olar tabandylyq pen batyldyqtyń arqasynda jeńiske jetti. Meniń baqytym – balalarym. Olardyń babalarynyń jaýyngerlik dástúrin qurmetteıtinin maqtan etemin, – dep atap ótti batyr ana.

Qyzylkúl Qojahmetovanyń bes balasy men on bir nemeresi qazir Qarýly Kúshter qatarynda qyzmet etip júrgenin aıta ketken jón. Olardyń qatarynda memlekettik qupııalardy qorǵaý mamandary, áskerı dárigerler, polıseıler men baılanysshylar bar.