Elimizdiń jańa kartasy

Joba el Prezıdenti Qasym-Jomart Toqaevtyń jańa oblystar qurý týraly Jarlyǵyn iske asyrý sheńberinde júzege asyryldy. Esterińizge sala keteıik, ótken jyldyń 3 mamyrynda respýblıkada Abaı, Jetisý, Uly­taý oblystary qurylǵan bolatyn. Osylaısha, Qazaqstannyń saıası-ákim­shilik kartasy Almaty, Shyǵys Qa­zaqstan, Qaraǵandy oblystarynyń jańa shekaralaryn, sondaı-aq jańa­dan qurylǵan oblystardyń qalaı ornalasqanyn kórsetedi. Sonymen qa­tar vedomstvo Abaı, Jetisý, Ulytaý, Almaty, Shyǵys Qazaqstan, Qaraǵandy oblystarynyń taqyryptyq kartalaryn, sonymen birge olardyń oblys ortalyqtarynyń jospar-shemalaryn tanystyrdy.

Osylaısha, mınıstrlik masshtaby 1:1 500 000 bolatyn elimizdiń saıası-ákimshilik kartasyn, masshtaby 1:1 000 000 bolatyn Qaraǵandy, Shyǵys Qazaqstan, Almaty oblystarynyń kartalaryn jańartty, al Ulytaý, Abaı, Jetisý oblystarynyń kartalaryn jasady. Sonymen qatar masshtaby 1:25 000 bolatyn Qaraǵandy, Semeı, О́skemen qalalarynyń jospar-shemalaryn, masshtaby 1:10 000 bolatyn Jezqazǵan, Qonaev, Taldyqorǵan qalalarynyń jos­par-shemalaryn ázir­le­di.

«Osydan týra bir jyl buryn el Prezıdentiniń jańa oblystardy qurý týraly Jarlyǵy shyqty. Bul atalǵan óńirlerdiń ekonomıkalyq ósýine serpin bergeni sózsiz. Kartalardy ázirleý – Prezıdenttiń osy sheshimin iske asyrý jolyndaǵy kezekti bir qadam. О́ndirilgen kartografııalyq jáne geodezııalyq materıaldar men derekter memlekettik basqarýda, eldiń ınfraqurylymyn damytýda, memlekettiń qorǵanysy men qa­ýips­izdigin qamtamasyz etýde, navı­ga­sııalyq qyzmetter salasynda jáne adam qyzmetiniń basqa da salalarynda sheshimder qabyldaý kezinde asa mańyzdy ári qajetti geokeńistik negizi bolyp sanalady», dedi Sıfrlyq damý, ınnovasııa­lar jáne aeroǵarysh ónerkásibi vıse-mınıstri Áset Turysov.

Jańa kartalar barlyq múddeli mem­lekettik organǵa berildi. Sony­men qatar kartalarǵa jeke jáne zańdy tulǵa­lar da qol jetkize alady. Ol úshin «Geo­de­zııalyq jáne kartografııalyq qyz­met sýbektilerine jos­parlanyp otyr­ǵan jumys ýchas­ke­lerinde jer­gi­likti jer­ler­diń geodezııalyq jáne kar­to­gra­fııa­lyq ja­ǵy­nan zerde­len­gen­digi týraly tıisti máli­metter berý» memlekettik qyzmetin tańdap, Ulttyq geodezııa jáne keńistiktik aqparat orta­ly­ǵyna ótinim berý qajet. Bar­lyq kartany vızýaldy túrde jáne tań­daý úshin nkgf.kz. saıtynan kórýge bo­lady.

Aıta keteıik, búgingi tańda mem­le­kettik organdardyń suraýy boıynsha 49, jeke jáne zańdy tulǵalardyń óti­nim­deri boıynsha 225 taqyryptyq karta usynylǵan.