О́lke tarıhyn hattap, shejiresin shynjyrdaı tizbelegen gazet – eskiniń úni, kesheginiń kózi, búginginiń ózi men sózi. Shańyraǵy astynda nebir marǵasqa jýrnalıster eńbek etken, talaı jas jýrnalıst «tarydaı bolyp kirip, taýdaı bolyp» jetilip shyqqan qara shańyraq gazettiń taǵdyry toqyraýǵa da, tolysýǵa da toly. Basylymǵa ár jyldary basshylyq etken R.Mýsın, J.Ospanov, K.Myrzaǵulov, N.Qydyrov, S.Esimov, J.Boshalaq, M.Qosymbaı syndy qaıratker qalamgerlerdiń jansebil tirligi, janqııar erligi arqasynda shaıqalsa da qulamaı, muńaısa da muqalmaı jarty ǵasyrlyq ǵumyrdy artta qaldyrdy. Osy asqaraly asýyna jaı jetken joq – ólke ómirin gazet betinde órnektep, óz oqyrmandaryn qalyptastyryp, jastardy tárbıeleı jetti. A.Súıerov, M.Qıbasov, T.Myńjas, B.Úmbetov, Á.Sárkenov, E.Nárembaeva, G.Naýyrsha, V.Qozybaqova, Ú.Jáleke, ózge de kóptegen qalamy júırik jýrnalıst gazette maqala kórigin qyzdyrdy.
Oblystyq gazettiń mereıtoıyna Aqparat jáne qoǵamdyq damý mınıstri D.Qydyráli, Parlament Senaty men Májilisiniń depýtattary, Mańǵystaý oblysynyń ákimi N.Noǵaev, elimizdiń ózge óńirlerinen medıaholdıng basshylary men jýrnalıster keldi. Rýhanı shara barysynda Aqtaýda «Mańǵystaý» gazetiniń fototilshisi, qyryq jyldan astam ýaqyt ólke ómirin taspaǵa túsirý arqyly óńir fotoshejiresin hattaǵan basylym ardageri T.Qusaıynnyń shyǵarmashylyq kórmesi ótti.
«Bul kórme aldaǵy úlken aýqymdy kórmeniń bastaýy bolǵaly otyr. Uzaq jyldan beri osyndaı týyndylardy kópshiliktiń tamashalaýyna usynýdyń oraıy kelmeı júr edi. Alda ertedegi sarǵaıǵan sýretterdi de jınaqtap, óńir turǵyndary kýá bolady degen senimdemin. Kórmede qoıylǵan sýretterdiń kóbi iriktelip alyndy. Mysaly, keıbir taqyrypta túsirilgen sýretter toptamasynan bólek kórme ótkizýge bolady. Sol arqyly kórermen Mańǵystaýdyń ashyq aspan astyndaǵy murajaı ekenine kóz jetkize túser edi. Ýaqytpen birge túlep kele jatqan munaıly ólkedegi esten ketpes, umytylmas sátterge talaı márte kýá bolyp, taspaladym. Solardyń kórgen jurt ózgeshe áserge bólenedi degen senimdemin», dedi Talant Qusaıyn.
Shara barysynda «Mańǵystaý» gazetiniń 50 jyldyǵyna jáne «Mańǵystaý-Medıa» JShS-nyń qurylǵanyna 10 jyl tolýyna oraı uıymdastyrylǵan shaǵyn murajaı ashyldy.
«Kezinde medıaholdıngtiń quramynda eki oblystyq, eki qalalyq, bes aýdandyq gazet pen «Sherqala» jýrnaly bolatyn. Qazir «Mańǵystaý-Medıa» JShS eki oblystyq gazetti qamtıdy: «Mańǵystaý» jáne «Ognı Mańǵystaý», qalalyq «Jańa ózen» gazeti, bes oblystyq gazet jáne mangystaumedia.kz saıty bar. «Biz árbir basylymdy, onyń tarıhyn, ataýlarynyń qalaı ózgergenin, shyqqan bastaýynda kimder turǵanyn kórsetýge tyrystyq. Murajaıǵa qoıylǵan barlyq jádigerdi redaksııanyń ózderi, jýrnalıstıka ardagerleri nemese olardyń týystary syıǵa tartty», deıdi «Mańǵystaý-Medıa» JShS dırektory Gúlmıra Ábisheva.
Murajaıdaǵy eń kóne jádiger – 1931 jyly shyǵaryla bastaǵan, latyn qarpimen basylǵan «Kolhoz joly» gazetiniń 1934 jylǵy sany, sondaı-aq «Stalın joly» gazetiniń 1942 jylǵy nómiri. Murajaı eksponattary arasynda jazý mashınkalary, ár jyldardaǵy fotoapparattar, magnıtofondar, jýrnalıstıka ardagerleriniń qyzmettik kýálikteri men jeke zattary, túrli is-sharadan, redaksııanyń jumys kúnderi men merekelerinen fotosýretter, ártúrli memleketterdiń konsýldyqtarynyń syılyqtary qoıylǵan jáne kásibı saladaǵy jýrnalısterdiń marapattary, sporttyq jetistikteri úshin kýboktar men medaldar bar.
Keń aýqymda atalyp ótip jatqan shara «Dostyq» úıinde saltanatty jıynmen jalǵasty.
Jıynda aımaq basshysy N.Noǵaev sóz sóılep, basylymnyń qoǵamdaǵy orny men mindeti týraly keń baıandap, gazet ujymyna sáttilik tiledi. Sondaı-aq sóz alǵan Qazaqstan Respýblıkasy Aqparat jáne qoǵamdyq damý mınıstri D.Qydyráli Mańǵystaý jurtshylyǵyn oblys úni bolǵan «Mańǵystaý» gazetiniń 50 jyldyǵymen quttyqtap, búgingi qazaq baspasózi, alǵa qoıǵan mindetter týraly oı bólisti.
Saltanatty jıynda gazet tarıhy jaıly beınefılm kórsetilip, ardager jýrnalısterge qurmet kórsetildi. Qalamy júırik jýrnalıster men gazet qyzmetkerleri oblys ákiminiń, Aqparat jáne qoǵamdyq damý mınıstriniń, Senat jáne Májilis tóraǵalarynyń Qurmet gramotalarymen, alǵyshattarymen marapattalyp, ujymǵa uıymdar men mekemelerdiń quttyqtaý hattary tabystaldy.
Mańǵystaý oblysy
