Kórnekti ǵalym «Ǵasyrlar murasy», «Ejelgi ádebıet», «Shyǵystyq qıssa-dastandar» atty eńbekterimen ǵylym jolynda óz qoltańbasyn qaldyrdy. Osy jınaqtarynda balanyń boıyna eń aldymen adamgershilik pen kisilik qasıetti qalyptastyrýdy maqsat etken ulaǵatty ustaz Maǵjan Jumabaevtyń «Pedagogıkasy» men Júsipbek Aımaýytulynyń «Jan júıesin» ulttyq tárbıeniń nusqaýlyǵy retinde qarastyrdy. Alma apaı – halqymyzdyń uly muratyn ómirlik maqsatyna aınaldyra bilgen jan. Ǵylym jolynda júrip, ulttyq mekteptiń negizin qalady.
Alǵashqy bolyp sóz alǵan fılologııa ǵylymdarynyń kandıdaty Samal Dáribaev aıtýly ǵalymnyń ómiri men qaıratkerlik jolyna qysqasha toqtaldy.
«Alma Qyraýbaeva ǵylym men pedagogıka salasyna zor úles qosyp, artyna mol mura qaldyrdy. Ǵalymnyń ónegeli ómir joly barshamyzǵa úlgi bolary haq. Professordyń ǵylymı orasan eńbegin keńinen nasıhattaý maqsatynda bul is-shara alǵash ret ótkizilip otyr, keleshekte ony dástúrge aınaldyrý josparda bar», dedi ol. Ǵalymnyń balasy Bulan Táıti anasy týraly jyly esteligimen bólisti.
Alǵash ótip otyrǵan ǵalym oqýlaryna elimizdiń ár óńirindegi joǵary oqý oryndarynan 9 ǵylymı joba men 28 esse qabyldandy. Baıqaýǵa Qazaq ulttyq ýnıversıteti fılologııa fakýltetiniń oqytýshylary qazylyq etti. Ǵalymnyń ejelgi jáne orta ǵasyrlardaǵy ádebı jádigerler, shyǵystyq qıssa-dastandar týraly zertteýleriniń mańyzy men ulttyq mektep tujyrymdamasy atalymynda birinshi oryndy M.Qozybaev atyndaǵy Soltústik Qazaqstan ýnıversıtetiniń 3-kýrs stýdentteri Dınara Abjalova men Aıajan Jaıymbaeva jeńip aldy. Al ǵalymnyń ustazdyq bolmysy, ǵylymı-pedagogıkalyq eńbekteri, rýhanı qundylyqtar týraly tujyrymdaryn saralaýda úzdik essesimen Abaı atyndaǵy Qazaq ulttyq pedagogıkalyq ýnıversıtetiniń stýdenti Ahat Dilnáz top jardy.
Is-shara sońynda baıqaý jeńimpazdaryna Space English oqý ortalyǵynyń sertıfıkaty men «Jádiger» ortalyǵynyń Alma Qyraýbaeva atyndaǵy stıpendııasy tabys etildi.
Láılá NOǴAIBEKQYZY,
Ál-Farabı atyndaǵy Qazaq ulttyq ýnıversıtetiniń magıstranty
