Finprom.kz málimetinshe, elimizde ınternet jyldamdyǵy bir jylda 47,9 paıyzǵa, ıaǵnı 2022 jylǵy sáýirdegi 20,7 Mbıt/s-tan bıylǵy sáýirde 30,62 Mbıt/s deıin ósken. Armenııadaǵy ınternet jyldamdyǵy 26,25 Mbıt/s, Qyrǵyzstanda – 25,83 Mbıt/s, О́zbekstan men Tájikstanda tıisinshe 20,9 Mbıt/s jáne 11,38 Mbıt/s quraǵan.
Ortalyq Azııadaǵy operatorlardyń ishinde 2022 jyldyń tórtinshi toqsanynda «Tele2 Qazaqstan» operatory mobıldi ınternetti júkteýdiń eń joǵary ortasha jyldamdyǵyn kórsetti (27,25 Mbıt/s). Bul 2021 jyldyń sáıkes kezeńindegi ortasha jyldamdyqtan (26,13 Mbıt/s) asyp túsken. «Ookla» sarapshylarynyń pikirinshe, kompanııa úsh jyl boıy kóshbasshylyqty jáne mobıldi ınternet jyldamdyǵy boıynsha úzdik mártebeni saqtap keledi. Ekinshi orynda 23,56 Mbıt/s jyldamdyqpen «MEGA Qyrǵyzstan» operatory tur. Bul rette Tájikstannyń «MegaFon», «ZET-MOBILE» jáne «Tcell» uıaly baılanys operatory eń nashar nátıje kórsetken.
Jekelegen qalalardy qarastyratyn bolsaq, ótken jyldyń tórtinshi toqsanynda Ortalyq Azııadaǵy ınternet jyldamdyǵy boıynsha birinshi oryndy ıelengen shahar – Almaty. Ońtústik astanamyzda ortasha júkteý jyldamdyǵy 25,78 Mbıt/s, al ortasha berý jyldamdyǵy 11,06 Mbıt/s quraǵan.
Qazaqstandaǵy ınternettiń joǵary jyldamdyǵy men sapasyna salaǵa salynǵan turaqty ári qomaqty ınvestısııalar oń áser etip otyr. Máselen, osy jyldyń tórt aıynda ǵana aqparat jáne baılanys sektoryna salynǵan ınvestısııa 30,3 mlrd teńgeni qurady. Kórsetkish ótken jyldyń sáıkes kezeńimen salystyrǵanda 16,6 paıyzǵa joǵary. Jalpy, 2022 jylǵy qańtar-jeltoqsan aralyǵynda ınvestısııalar bir jyl burynǵy deńgeımen salystyrǵanda 39,1 paıyzǵa, ıaǵnı rekordtyq 178,9 mlrd teńgege deıin ulǵaıǵan.
Máselen, mobıldi ınternet jyldamdyǵy boıynsha «Tele2» operatory jyl saıyn kiristiń 15-20 paıyzyn ınfraqurylymǵa jumsaıdy. Bul jańa jobalar men jańa tehnologııalardy iske qosýǵa arnalǵan qomaqty qarajat ekeni túsinikti. Jańa bazalyq stansalardy salýdan bólek, operator qoldanystaǵy saıttardy jaqsartý úshin qajetti jańa jabdyqtardy únemi satyp alyp otyrady. Mańyzdy ınfraqurylym nysandaryna kompanııa tabysynyń edáýir bóligi qaıta ınvestısııalanatynyn da umytpaıyq.
Ulttyq statıstıka bıýrosynyń málimetine súıensek, elimizdiń telekom sektoryndaǵy oıynshylar negizinen eski jabdyqtardy aýystyrý, abonentter sanyn ulǵaıtý maqsatynda óndiristik qýattardy keńeıtý, jańa tehnologııalardy engizý, qoldanystaǵy qyzmetterdi ońtaılandyrý, materıaldyq-tehnıkalyq qamtamasyz etýdi ońtaılandyrý, abonentter sany ózgermegen kezde jańa óndiristik qýattardy engizý sııaqty baǵyttarǵa ınvestısııa salady.
