Patrıottar forýmy Memleket basshysynyń quttyqtaýymen bastaldy. Mádenıet jáne sport mınıstri Ashat Oralov Prezıdent Q.Toqaevtyń quttyqtaý hatyn oqyp, jınalǵandardy rámizder kúnimen quttyqtady.
«Erekshe erlik isterimen kópshilikke úlgi bolyp, óz salasynda aıryqsha jetistikke jetip kele jatqan otandastarymyzdyń eńbegin qoǵamǵa, ásirese jastarǵa dáripteý árdaıym nazarymyzda bolýǵa tıis. Biz jańashyl, batyl, eń bastysy patrıot otandastarymyzdy marapattap, esimderi men erlikterin dáripteımiz. Qoǵamdy, óskeleń urpaqty birlikke, tatýlyqqa, Otanǵa adal qyzmet etýge, ıaǵnı patrıot bolýǵa úndeımiz», dedi Ashat Oralov.
Mınıstr patrıot degenimiz, eń aldymen bilimi men darynyn eldiń damý jolyna, halyq ıgiligine arnaý, erinbeı eńbek etý, talmaı izdený ekenin atap ótti. «Búgingi patrıotızmniń úlgisi – qarapaıym eńbek adamdary: dárigerler, ustazdar, erikti jastar taǵy basqa áleýmettik top músheleriniń kúndelikti jumystaryn abyroıly atqaryp, óz isine adaldyq tanytýy. Marapatqa ıe bolyp otyrǵan zamandastardyń otansúıgishtik eńbegin baǵalaýmen qatar, ózgege úlgi etý, sol arqyly patrıotızmniń ozyq obrazyn qalyptastyrý – bárimizdiń azamattyq paryzymyz», dedi Ashat Oralov.
El patrıottary 6 baǵyt boıynsha marapattaldy. Ǵylym jáne bilim baǵyty boıynsha genetık ǵalym, Ulttyq bıotehnologııa ortalyǵynyń Adam genetıkasy zerthanasynyń meńgerýshisi Maqsat Jabaǵın jáne Q.Jubanov atyndaǵy Aqtóbe óńirlik ýnıversıtetiniń rektory Laýra Qarabasova «Jyl patrıoty» atandy. Maqsat Jabaǵın – Ortalyq Azııa halyqtary qalyptasýynyń genetıkalyq ártúrliligi men genetıkalyq tarıhyn zerttegen ǵalym. 75-ten astam ǵylymı eńbektiń avtory. 2019 jyly «Qazaqstannyń eń jas ǵalymy» atanǵan. Al Laýra Qarabasova – elimizdegi eń jas rektor. Eldegi Bolon reformasy, zertteý jobasy úshin bilim berýdegi Eýropalyq zertteýshiler qaýymdastyǵy grantynyń jeńimpazy.
Mádenıet jáne sport baǵyty boıynsha júldege pıanıst, mýzykant Temirlan Beısenbaı jáne Qazaqstannyń eńbek sińirgen jattyqtyrýshysy, halyqaralyq sport sheberi Myrzaǵalı Aıtjanov ıe boldy. Temirlan Beısenbaı – Mılanda, Eýropa kósheleri men qazaq dalasynyń túkpir-túkpirinde Memlekettik gımndi, ulttyq áýender men ártúrli mýzykalardy oryndap, otandastarymyzdy patrıottyq isterge úndep júrgen mýzykant. Myrzaǵalı Aıtjanov – álem chempıony Birjan Jaqypov, Olımpııa oıyndarynyń qola júldegeri Erkebulan Shynalıev, álem chempıonatynyń qola júldegeri Qaırat Eralıevtiń bapkeri.
Medısına jáne volonterlik baǵytyndaǵy atalymdy Medısına salasynyń úzdigi, Prezıdent Is basqarmasy medısınalyq ortalyǵy dırektorynyń hırýrgııa jónindegi orynbasary Myńjylqy Berdihodjaev pen «Kobelek balalar» qaıyrymdylyq qorynyń prezıdenti Sultan Allabergenov jeńip aldy. Myńjylqy Berdihodjaev – otandyq endovaskýlıarlyq neırohırýrgııanyń negizin qalaǵan dáriger. 2013 jyly ol alǵashqy mehanıkalyq trombektomııa jasady. Búginde bas-mı tamyrlaryna 6500-den astam joǵary tehnologııalyq operasııa jasaǵan. Al Sultan Allabergenov sırek kezdesetin genetıkalyq naýqastarǵa kómek kórsetetin qaıyrymdylyq qoryn uıymdastyrǵan. Qor qurylǵan sátten bastap (2017) 16 jasqa deıingi 61 balaǵa, 20 eresek adamnyń emine kómek kórsetken, sondaı-aq 3 balanyń sheteldegi, 2 balanyń Qazaqstandaǵy operasııasyn qarjylandyrǵan. Odan bólek pandemııa kezinde 3 myńnan astam muqtaj adamdy azyq-túlikpen qamtamasyz etken.
О́nerkásip jáne aýyl sharýashylyǵy baǵyty boıynsha júlde agroónerkásip salasynyń mamany Almagúl Aıqan men jas kásipker, aýyl sharýashylyǵy mamany Veronıka Salovaǵa buıyrdy. Almagúl Aıqannyń sútti qaıta óńdeıtin «Aykan» kásiporny 2000 jyldan bastap 8 túrli irimshik óndiredi. Búgingi tańda zaýyt Túrkistan oblysy boıynsha sút ónimderin óńdeıtin iri kásiporynǵa aınalyp otyr. Kompanııa ónimderi elimizdiń barlyq oblysynda suranysqa ıe.
Veronıka Salova aberdın angýs, qazaq aqbas, áýlıekól, dala tuqymdary sııaqty jylqy men iri qara mal ósirýmen aınalysady. 2022 jyldyń mamyr aıynda «Bıznes Ledı Qazaqstan» tizimine kirgen, 2022 jyly «Agro Ledı 2022» músinshesine ıe bolǵan. Sondaı-aq, óz qarajaty esebinen aýylǵa sý qubyryn tartýǵa jobalyq-smetalyq qujattama daıyndaǵan.
Tehnologııa jáne bıznes baǵytyndaǵy júldemen IT salasynyń mamany, mobıldik qosymsha jasaýshy Aıbolat Qulataı jáne IT kásipker, «EasyTap» kompanııasynyń atqarýshy dırektory Maǵzum Tólesh marapattaldy. Aıbolat Qulataı memlekettik tildi damytý maqsatynda 2022 jyly «Aqyl Battle» mobıldik qosymshasyn daıyndap shyǵarǵan. Al Maǵzum Tólesh shyǵarǵan «EasyTap» qosymshasy – saǵattyq jumys izdeý boıynsha onlaın servıs. Onyń jańalyǵy arqasynda 4 myńnan astam adam qosymsha jalaqy alyp otyr.
Al sońǵy baǵyt «Erekshe erlik kórsetken azamattar» dep atalady. Bul marapatqa «Amanat» partııasynyń qyzmetkeri Bekarystan Amanjolov pen kınolog, qutqarýshy Aleksandr Adambaev laıyqty dep tanyldy. Bekarystan Amanjolov Ásııa Ýálıhanqyzyna baýyr donory boldy. Aleksandr Adambaev Túrkııanyń Nurdaǵy qalasyndaǵy jer silkinisi saldaryn joıýǵa kómektesip, úıindi astynan birneshe adamdy aman alyp shyqqan. Bul eki batyrǵa atalymdy Halyq qaharmany, general-leıtenant Baqytjan Ertaev tapsyrdy.
