Máselen, Ál-Farabı atyndaǵy Qazaq ulttyq ýnıversıtetine – 19, L.N.Gýmılev atyndaǵy Eýrazııa ulttyq ýnıversıtetine – 17, M.Áýezov atyndaǵy Ońtústik Qazaqstan ýnıversıtetine – 15, S.Toraıǵyrov ýnıversıtetine 10 azamat tegin oqýǵa tústi. Aqyly negizdegi UBT-ny esepke almaǵanda A.Myrzahmetov atyndaǵy Kókshetaý ýnıversıtetine – 73, S.Toraıǵyrov ýnıversıtetine – 45, Sh.Murtaza atyndaǵy Taraz halyqaralyq ınnovasııalyq ınstıtýtyna – 51, Qorqyt ata atyndaǵy Qyzylorda ýnıversıtetine 35 adam oqýǵa qabyldandy. Osylardy eskere kele, Qorǵanys mınıstrligi stýdentterdiń bul sanatyn jataqhanamen jáne shákirtaqymen qamtamasyz ete otyryp, granttar berý úderisin zańnamalyq retteý jumystaryn júrgizip jatyr.
Eske sala keteıik, áskerı qyzmetshilerdi tegin oqytýǵa irikteý Qorǵanys mınıstrliginiń portalynda ornalasqan «Srochnıkı 2.0» aqparattyq júıesi arqyly júrgiziledi. Qazirgi ýaqytta bul resýrsta 38 316 merzimdi qyzmet sarbazy tirkelgen. 2022 jyldyń kúzinde áskerge shaqyrylǵan 13 805 áskerı qyzmetshiniń baǵalaý kórsetkishterin engizý boıynsha josparly jumys júrgizilip jatyr. Olar úshin kvotalardy bólý bıylǵy jyldyń qazan-qarasha aılaryna josparlanǵan. Sonymen birge 2023 jyldyń kókteminde áskerge shaqyrylǵan sarbazdardy da tirkeý júrip jatyr. Qazirgi ýaqytta 11 948 adam tirkelgen.
Mınıstrlik jobany odan ári tanymal etýge den qoıyp otyr. Sondyqtan jastardyń jeke josparlary men armııanyń olardyń jeke tulǵa bolyp qalyptasýyndaǵy róli týraly beınerolıkter daıyndalǵan.
Jobanyń ıgiligin kórgen jastardyń qatarynda Astana IT University-niń 1-kýrs stýdentteri Aıdar Naýsha, Ámir Qaıyrov jáne Ádilet Qudashev ta bar. Olar joǵary oqý oryndarynda tegin bilim alý sertıfıkattaryn ıelengen. Aıdar Naýsha Qarýly kúshterdiń Áýe shabýylyna qarsy qorǵanys áskerinde qyzmet etti. Qazirgi ýaqytta «medıa-tehnologııalar» baǵyty boıynsha bilim alyp jatyr. «Oqýǵa túskenderdiń tizimi jarııalanǵan kezde tún ortasynda otbasymdy tegis oıatyp, qýanyshymmen bólistim. Áskerdegi ýaqyt bosqa ótken joq. Dene daıyndyǵy jáne rýhanı jaǵynan damydym dep aıta alamyn. Men Qarýly kúshter qataryna jaýynger bolyp qabyldanyp, úıge efreıtor dárejesinde oraldym. Endi ýnıversıtette leıtenant ataǵyn alýdy josparlap otyrmyn», deıdi ol.
Ýnıversıtet bazasyndaǵy áskerı kafedra eldiń jumyldyrý rezervin tolyqtyrý úshin zapastaǵy ofıserler men serjanttardy daıarlaıdy. Oqý kezinde úsheýi de áskerı kafedrada oqyp, zapastaǵy ofıser bolýǵa nıetti.
Qazirgi ýaqytta Qorǵanys mınıstrliginen basqa bul jobaǵa Ulttyq ulan men Memlekettik kúzet qyzmeti de qatysady. Keleshekte Ulttyq qaýipsizdik komıtetiniń Shekara qyzmeti men Tótenshe jaǵdaılar mınıstrligi de júıege qosylmaq.
