Bıyl oblys turǵyndaryn jumyspen qamtý men jumysshy mamandyqtardy dáripteýge baǵyttalǵan 122 bos jumys oryndary men óndiris oryndarynda ashyq esik kúnin ótkizý jospary bekitilgen. Bes sala boıynsha bos jumys oryndarynyń 64 jármeńkesi ótti. Olarǵa 1 257 jumys berýshi qatysyp, 6 841 bos jumys ornyn usynǵan. Onyń 71,1%-y, ıaǵnı 4 868-i – jumysshy mamandyqtary. Odan bólek, óńirde jumysshy mamandardy dáripteý maqsatynda óndiris oryndarynda ashyq esik kúni ótti. Sondaı is-sharanyń birinde Túrkistan joǵarǵy kópsalaly qolóner kolledji men kópsalaly ındýstrıaldy-tehnıkalyq kolledjiniń 250 stýdenti «Túrkistan» erkin ekonomıkalyq aımaǵyndaǵy «Grand Miks» mebel qurastyrý, «Kaztor LTD» JShS qorshaý ónimderi óndirisimen tanysty. Stýdentterge óndiris tehnologııasy túsindirilip, ónim túrleri kórsetildi. Jumysshy mamandardyń el ekonomıkasyna qosar úlesi baıandalyp, jastarǵa eńbekqorlyq pen naǵyz maman bolý qundylyǵy nasıhattaldy.
Aıta ketelik, oblystyq jumyspen qamtý jáne áleýmettik baǵdarlamalar basqarmasynyń málimetinshe, ulttyq jobalar aıasynda búginde naqty 297 joba júzege asyp, 3 156 azamat jumyspen qamtyldy. Jeke ınvestısııa tartý arqyly 103 joba júzege asyp, 1 584 jumys orny quryldy. «10 myń turǵynǵa – 100 jańa jumys orny» jobasy aıasynda bıyl 22 595 jańa jumys ornyn qurý mejelense, qazirde 27 617 jumys orny ashylǵan. «О́ńirlik jumyspen qamtý kartasyn» júzege asyrý aıasynda 59 925 azamat turaqty jumysqa ornalasty. Ýaqytsha sýbsıdııalanatyn jumys oryndaryna 27 099 azamat tartyldy. Odan bólek, jańa bıznes-ıdeıalardy júzege asyrý úshin 1 788 azamat memlekettik grant aldy. Sonymen qatar 158 probasııa esebindegi, 10 bas bostandyǵynan aıyrý mekemelerinen bosatylǵan azamat, 5 tul jetim, 146 múgedektigi bar azamat jumysqa ornalasty.
Túrkistan oblysy
