Ýnıversıtettiń 30 jyldyǵyna arnalǵan baıqaý «Adam jáne jasandy ıntellekt – jańa kommýnıkasııa formasy» taqyrybyn arqaý etip, sıfrlyq dáýirdegi medıanyń bolashaǵyn, jasandy ıntellektiniń kommýnıkasııa keńistigindegi rólin shyǵarmashylyq turǵyda saralaǵan jastardyń basyn qosty.
Halyqaralyq baıqaýǵa AQSh, Ulybrıtanııa, Ispanııa, Ońtústik Afrıka Respýblıkasy, Jańa Zelandııa, Birikken Arab Ámirligi, Qyrǵyzstan jáne Qazaqstan ýnıversıtetterinen 100-den astam jumys kelip tústi. Jas jýrnalıster men medıa mamandardyń jumystary mazmundyq tereńdigimen, kreatıvti rejıssýrasymen jáne sıfrlyq tehnologııalardy erkin meńgerýimen erekshelendi.
Marapattaý rásimine L.N. Gýmılev atyndaǵy Eýrazııa ulttyq ýnıversıtetiniń Rektory – Basqarma Tóraǵasy Erlan Báttashuly Sydyqov, «Eýrazııa ulttyq ýnıversıteti» KeAQ Dırektorlar keńesiniń tóraǵasy Darhan Qamzabekuly Myńbaı, sondaı-aq elimizdiń medıa salasyna tanymal tulǵalar qatysty.
Baıqaýdyń ıdeıa avtory ári jetekshisi – «Daryn» memlekettik syılyǵynyń ıegeri, kásibı telejýrnalıst, professor Ulbosyn Meıirbekqyzy Esenbekova. Baıqaýdy uıymdastyrý komıtetiniń quramynda Qazaqstan Premer-Mınıstri baspasóz qyzmeti basshysynyń orynbasary Dýman Hamıt, «Qazaqstan» ulttyq telearnasynyń dırektory Jalǵas Altaev, «24KZ» telearnasynyń bas redaktory Nazym Stambekova, «Apta» saraptamalyq baǵdarlamasynyń redaktory Danııar Qaıyrtaı, respýblıkaǵa tanymal medıa-menedjer Ysqaq Egemberdıev jáne medıa salanyń belgili ókilderi boldy.
Baıqaýdyń Gran-Prı júldesin Eýrazııa ulttyq ýnıversıtetiniń stýdenti Eralyqyzy Alınýra ıelense, I oryndy Qyzylordadaǵy «Bolashaq» ýnıversıtetiniń stýdenti Ábdyqalyq Nurasyl jeńip aldy. II oryn Júsip Balasaǵun atyndaǵy Qyrǵyz ulttyq ýnıversıtetiniń stýdenti Malıka Dınıstanova men EUÝ doktoranty Nursultan Aqjolǵa buıyrdy. Al III oryn ıegerleriniń qatarynda University of Chicago stýdenti Ramazan Baharbekov pen Aqtóbe ýnıversıtetiniń stýdenti Gúldáýren Kojagýlova boldy.
«Beısen Quranbek» atyndaǵy arnaıy nomınasııanyń jeńimpazy retinde Stanford University stýdenti Aıvar Abdrashuly marapattaldy. Onyń shyǵarmashylyq jumysy mazmundyq tereńdigimen, zamanaýı medıatilmen jáne kásibı sheshimimen erekshelenip, qazylar alqasynyń joǵary baǵasyna ıe boldy.
Baıqaýdyń arnaıy nomınasııalary da kásibı deńgeıimen erekshelendi. «Úzdik prodıýserlik jumys» nomınasııasyn EUÝ stýdentteri Aımaral Qýatbek pen Jansaıa Tańyrqul ıelendi. Bul marapatty belgili prodıýser, ánshi ári aktrısa Muqan Móldir tabystady. Marapattaý barysynda Muqan Móldir men Aıym Tursynbekqyzy oryndaǵan «Elim de, jerim de» áni qatysýshylardyń yqylasyna bólendi.
Sondaı-aq rásimge «Qazaqstan» ulttyq arnasynyń tanymal júrgizýshisi Ǵalymjan Keńshilik, «Habar» arnasynyń júrgizýshisi Ardaq Saǵıdolla, «Qazaqstan» telearnasynyń «Aqparat» baǵdarlamasynyń júrgizýshisi Alla Gavrına, «24KZ» arnasynyń júrgizýshisi Azamat Ábilqaıyr, telejúrgizýshi Ardaq Qasymhan, «Qazaqstan» UTA júrgizýshisi Muhtar О́mirtaı jáne basqa da medıa keńistiktiń tanymal tulǵalary qatysty.
Marapattaý rásiminde uıymdastyrý komıtetiniń músheleri jeńimpaz jumystardyń erekshelikterine arnaıy toqtaldy. Eýrazııa ulttyq ýnıversıtetiniń prorektory Indıra Rystına halyqaralyq baıqaýdyń jyl saıyn aýqymy keńeıip kele jatqanyn atap ótse, qazylar alqasynyń múshesi Nazym Stambekova qatysýshylardyń kreatıvtiligi men jańa medıanyń tilin meńgerýine joǵary baǵa berdi. Danııar Qaıyrtaı jasandy ıntellektiń kommýnıkasııalyq keńistiktegi róline nazar aýdardy.
Marapattaý rásimi barysynda professor Ulbosyn Esenbekovanyń 55 jas mereıtoıyna da qurmet kórsetildi. «AMANAT» partııasy, «Qazaqstan» jáne «Habar» telearnalarynyń, «Qazcontent» aksıonerlik qoǵamynyń basshylary mereıtoı ıesine arnaıy alǵys hattar men qurmet gramotalaryn joldady. Bul – otandyq telejýrnalıstıka men medıa bilim berý salasyna sińirgen uzaq jylǵy eńbekke degen joǵary qurmet belgisi boldy.
