Jaqynda osy aksııa aıasynda tálimbaqqa jańa óskin – qazaq tarıhyndaǵy tanymal tulǵa Jáńgir han Bókeı han ulynyń esimimen baılanysty qaraǵaı kósheti egildi. Naryn qumnyń ortasyna qaraǵaı ormanyn ekken jańashyl handy eske salatyn jas tal sol tarıhı topyraqtan arnaıy ákelingen. Tarıhı terekti egý qurmeti tanymal aqyn, Memlekettik syılyqtyń laýreaty Aqushtap Baqtygereevaǵa tapsyryldy.
«Han ordasynda kezinde Jáńgir han óz qolymen ekken qaraǵaıdyń tuqymy saqtalǵan desedi. Bul aǵash – tek tabıǵat kórki emes. Ata-babamyz qaraǵaıdy beker ekpegen. Bir jaǵynan, ol el shekarasyn aıqyndap, qorǵaýǵa qyzmet etse, ekinshi jaǵynan, qum kóshkinin toqtatyp, jerdi shóleıttenýden saqtaǵan. Búginde qumnyń kóshýi saıabyrsydy. Áıtpese kezinde qanshama aýyl qum astynda qalyp qoıǵany tarıhtan belgili. Sol qasıetti qaraǵaıdyń tuqymyn el ıgiligine jaratýǵa múmkindik jasaǵan Qaırat baýyryma shynaıy rızamyn. Men bul qaraǵaıdy jaı ǵana aǵash emes, bolashaq urpaqqa joldanǵan ún, amanat dep qabyldaımyn» deıdi Aqushtap aqyn.
– Kórshiles Reseıde erekshe baǵdarlama bar: tarıhı oqıǵalarmen nemese belgili tulǵalarmen baılanysy bar terekke arnaıy mártebe berilip, memleket qorǵaýyna alynady. Biraz jyl buryn aqyn Sergeı Esenınniń týǵan jerine, Konstantınovo aýylyna jolymyz túskende, bizge erekshe syı jasady. Aqynnyń ózi 1924 jyly úıiniń aldyna otyrǵyzǵan terektiń kóshetin tabystady. Keıin bul kóshetti týǵan ólkemizge ákelip, baqqa shanshyp qoıdyq. Sondaı-aq Ivan Týrgenev mýzeıinen ákelingen emenniń kósheti de óz ornyn tapty. Búgin qazaqtyń tól tarıhyna qatysty ósimdik – Jáńgir hannan qalǵan tarıhı toǵaıdan ákelingen kóshetti aqyn Aqushtap Baqtygereeva óz qolymen ekti. Osylaısha, biz de týǵan ólkemizde tanymal tulǵalar men tarıhı oryndarǵa qatysty aǵash kóshetterin ákelip, tarıhı alleıa jasasaq, osyny dástúrge aınaldyrsaq degen oıǵa keldik. Bul ótkenge taǵzym etip, keler urpaqqa ónege bolatyn ıgi is qoı, – deıdi joba jetekshisi Qaırat Kárimov.
Belgili baǵban bizben áńgimesinde qazaq tarıhyna qatysty taǵy qandaı tal-terek bolǵanyn surap, kópshilikten usynys kútetinin jetkizdi. Endeshe, qurmetti oqyrman, siz ne aıtasyz?
Batys Qazaqstan oblysy
