Ulttyq boıaý men tabıǵattyń tylsym úılesimin toǵystyrǵan «Janymnyń baqtary» kórmesi kórermendi sýretshiniń ishki álemine jeteleıdi. Kenep betinde týǵan jerdiń tumsa tabıǵaty, qazaqy bolmys pen adam janynyń názik ıirimderi kórkem tilmen órnektelgen. Bir uqqanymyz – qylqalam sheberi adam janynyń tazalyǵyna úńilýge shaqyrady.
«Kórmeniń tutas ekspozısııasy sýretshiniń jan dúnıesindegi gúldengen baqtaı áser qaldyrady. Mundaǵy ár kartına ózinshe syr shertip, ár boıaý ózinshe sóıleıdi. Qazaqy dúnıetanym, tabıǵattyń kórkem kelbeti men ulttyq qundylyqtar bir arnaǵa toǵysyp, kórermenge estetıkalyq lázzat syılaıdy, sol arqyly týǵan eldiń rýhanı baılyǵyn tereńirek sezinýge jeteleıdi», deıdi ónertanýshy Baljan Zamanbekova.
Kórme zalyna engen sátten-aq kelýshini alýan boıaýǵa kómkerilgen ózgeshe álem qarsy alady. Qabyrǵaǵa qatar ilingen kartınalarda qazaq dalasynyń tynysy, asqar Alataýdyń aıbyny, ulttyq salt-dástúrdiń máıegi men adam janyndaǵy názik sezimder toǵysqan. Ár týyndy – sýretshiniń ómirden túıgen oıy men júrek syryn boıaý tilimen sóıletken ózinshe bir álem ispetti.
Kórmeniń ashylý saltanatynda Ulttyq ortalyq mýzeıdiń qoǵammen baılanys bóliminiń jetekshisi Anna Kýshenko quttyqtaý sóz sóılep, mýzeıdiń tarıhı-mádenı murany jáne beıneleý ónerin nasıhattaýdaǵy, sondaı-aq jastardy elimizdiń zamanaýı sýretshileriniń shyǵarmashylyǵymen tanystyrýdaǵy rólin atap ótti.
Kórme barysynda sýretshiniń ónerdegi qanattas-qalamdastary sóz alyp, onyń týyndylarynda qazaq etnografııasy men tabıǵat kórinisteri dara mánge ıe ekenin, Rysbek Ysqaqov óz eńbekterinde ana, otbasy, mahabbat taqyryptaryn jyrlaı otyryp, jalpyadamzattyq qundylyqtardy dáripteıtin lırıkalyq obrazdarǵa basymdyq beretini aıtyldy.
О́ner jármeńkesi 19 maýsymǵa deıin jalǵasady.
ALMATY
