- О́tken aptada elimizdiń fýtbolshylary óz jankúıerlerin qýantty. Grekııanyń Solonıkıinde ótip jatqan jastar arasyndaǵy Eýropa chempıonatynyń (U-19) irikteý týrnırinde jerlestermiz Serbııany 3:1 esebimen jeńdi. Básekeniń 9-mınýtynda alǵashqy goldy serbter soqty. Bul jaǵdaı bizdiń jigitterdiń jigerin jasytqan joq. Kóp keshikpeı Tóre Ismaǵulov tarazy basyn teńestirse, Ismaıl Bekbolat dýbl avtory atandy. Buǵan deıin jerlesterimiz Portýgalııamen 1:1 esebimen teń túsken edi. Sóıtip, otandyq fýtbol sheberleri jarys kestesinde kósh bastap, jarystyń kelesi kezeńine ótti.
- Aralas jekpe-jekten Bratıslavada uıymdastyrylǵan «Oktagon 89» týrnıriniń basty básekesinde 37 jastaǵy Jalǵas Jumaǵulov (19-9) 23 jastaǵy brazılııalyq Igor Severınomen (10-1) aıqasty. Kezinde UFC-de óner kórsetken qos sportshynyń arasyndaǵy básekede jeńimpaz anyqtalmady. Sebebi ekinshi raýndta Severıno belden tómen soqqy jasady. Qarsylasynyń ereje buzǵan áreketinen keıin Jalǵas jekpe-jekti jalǵastyra almady. Eger osy jarys-ta jerlesimiz jeńiske jetkende, onda eki salmaqtyń chempıondyq belbeýin ıelenetin edi. Týrnırde taǵy bir jerlesimiz Dastan Amangeldi (10-1) fransııalyq Moktarom Benkasıden (25-10-0-2) basym tústi.
- Anglııanyń Bornmýtynda jalaýy jelbiregen kásipqoı keshinde asa aýyr salmaqtaǵy Ivan Dychko (15-1, 14 KO) alań ıesi Harvı Daıkspen (7-0-1, 0 KO) judyryqtasty. 10 raýndqa eseptelgen kezdesý sońyna deıin sozylyp, tóreshilerdiń sheshimi boıynsha otandasymyz jeńiske jetti.
- Ulan-Batyrda tusaýy kesilgen reıtıngtik týrnırde elimizdiń grek-rım kúresi sheberleri úsh júldege qol jetkizdi. Nurasyl Amanaly (97 kg) kúmis, Erkebulan Ardaqov (63 kg) pen Oljas Syrlybaı (130 kg) qola medal ıelendi. Áıelder kúresinen Nılýfar Raımova (57 kg) men Elmıra Syzdyqova (76 kg) úshinshi orynǵa taban tiredi. Erkin kúresten ótken jarysta jeti jerlesimiz jeńis tuǵyryna kóterildi. Asyl Aıtaqyn (61 kg), Azamat Dáýletbekov (92 kg), Edige Qasymbek (125 kg) kúmis, Meırambek Qartbaı (57 kg), Ádilet Álmuhamedov (61 kg), Shamsat Taıyr (79 kg), Bolat Saqaev (86 kg) qola medal enshiledi.
- Fýtboldan elimizdiń ulttyq quramasy Erevanda Armenııamen joldastyq kezdesý ótkizip, match teń aıaqtaldy – 1:1. 50-mınýtta Maksım Samorodov soqqan dopqa 53-mınýtta Edýard Spersıan jaýap qaıtardy.
- Elimizdiń jas tennısshileri Asyljan Arystanbekova men Ińkár Dúısebaı Túrkııanyń Qaıserisinde shymyldyǵy túrilgen halyqaralyq týrnırdiń juptyq saıysynda bas júldeni jeńip aldy. Fınalda olar jergilikti oıynshylar – Dýrý Soke men Dogo Túrkimennen basym tústi – 6:2, 2:6, 10:5.
- Aralas jekpe-jekten Sankt-Peterbýrgte uıymdastyrylǵan «Fight Nights 138» týrnırinde elimizdiń qos sportshysy kúsh synasty. Baǵashar Qoralasov (4-1) reseılik Mahmýd Akımovti (9-1-1) upaı sanymen utsa, Goıtı Dazaev (12-4-1) sol eldiń taǵy bir ókili Sergeı Romanovqa (26-6) ese jiberdi.
