Otyrysqa Saıası keńes pen partııa bıýrosynyń músheleri, Ortalyq apparattyń basshylyǵy, óńirlik fılıaldardyń tóraǵalary men atqarýshy hatshylary qatysty.
О́z sózinde Erlan Qoshanov jýyrda Memleket basshysy Memlekettik tý kóterý rásiminde el damýynyń jańa baǵytyn aıqyndap, barlyq progressıvti qoǵamdyq-saıası kúshterdi jalpyulttyq qundylyqtar men maqsattar tóńiregine toptasýǵa shaqyrǵanyn atap ótti. Osyǵan baılanysty, «Amanat» jaýapty saıası partııa retinde Memleket basshysynyń úndeýin tolyq qoldaıdy, eldi damytýǵa baǵyttalǵan aýqymdy prezıdenttik kún tártibin júzege asyrý jolynda eńbek etýge daıyn barlyq kúshtermen óz áleýetin biriktirýge daıyn.
«Biz osy tarıhı kezeńniń mańyzyn tereń túsinýimiz kerek. Jańa Konstıtýsııanyń qabyldanýymen Táýelsiz Qazaqstannyń jańa dáýiri bastaldy. Eshqandaı asyra silteýsiz aıtar bolsaq, bul – halqymyz qoldaǵan Prezıdentimizdiń asa iri jetistigi ári saıası jeńisi. Endi bizdiń aldymyzda jańa Konstıtýsııada belgilengen barlyq maqsatty júzege asyrý mindeti tur. Bul – jalǵyz atqarýǵa kelmeıtin kúrdeli jumys. Ol bizden judyryqtaı jumylýdy, birlik pen kelisimdi talap etedi. Qoǵamǵa jaýapkershilik pen uıymshyldyqtyń úlgisin kórsetýimiz qajet», dedi E.Qoshanov.
Otyrys barysynda Májilis depýtaty Snejanna Imasheva jańa Konstıtýsııa kúshine enýiniń tarıhı mańyzyn atap ótip, qoǵamdyq-saıası kúshterdi memleketti damytýdyń strategııalyq mindetteri tóńireginde toptasýǵa shaqyrdy. Almaty oblystyq fılıalynyń tóraǵasy Qýat Baıǵodjaev Prezıdent bastamashy bolǵan reformalar óńirlerdiń serpindi damýyna yqpal etip, júrgizilip jatqan ózgeristerge degen azamattar senimin nyǵaıtyp otyrǵanyn aıtty.
Mańǵystaý oblystyq fılıalynyń jetekshisi Nurbek Qarasaev memlekettiń aýqymdy qoǵamdyq-saıası jańǵyrýy jaǵdaıynda qoǵamdyq kelisim men birlikti saqtaýdyń mańyzyna nazar aýdardy. Májilis depýtaty Erlan Saırov Ata zańnyń kúshine enýi jańa saıası kezeńdi ashatynyn aıtyp, el táýelsizdigin nyǵaıtý jolynda kúsh-jigerdi biriktirýge shaqyrdy.
