Soǵan qaramastan, onlaın bilim berý salasy birqatar qıyndyqqa tap bolyp otyr. Kóptegen oqý oryndarynda beınesabaqtar qarapaıym veb-kameralar arqyly jazylady. Jaryq pen dybys sapasynyń tómen bolýy aqparatty qabyldaýdy qıyndatyp, oqýshylardyń qyzyǵýshylyǵyn azaıtady. Kásibı beınekýrstar jasaý úshin operatorlar, montaj mamandary men dızaınerlerdi tartý qajettiligi shyǵyndy arttyrady.
Zamanaýı bilim berýdegi osyndaı ózekti máseleler «Bolashaq» túlegi Oljas О́mirseriktiń EdMedia kompanııasyn qurýǵa túrtki bolǵan. Búginde EdMedia ınteraktıvti vıdeostýdııasy bilim berý uıymdaryna zamanaýı kontentti daıyndaýǵa kómektesip, myńnan astam kórermenge tikeleı efırler ótkizýge múmkindik beredi. Stýdııada ınteraktıvti beınesabaqtardy jazýǵa, sıfrlyq kýrstar men prezentasııalar ázirleýge, 3D modeldeýge, telesýfler qoldanýǵa, bilim berý podkasttaryn jasaýǵa, jasandy ıntellekt quraldaryn paıdalanýǵa bolady. Osynyń arqasynda oqytýshylar tehnıka tilin meńgergen kásibı mamandarsyz-aq sapaly kontent daıyndaı alady.
2014 jyldan bastap jumys istep kele jatqan kompanııa sońǵy bes jyldyń ózinde 100-den astam mektep, kolledj, akademııa men ýnıversıtetke óz júıelerin ornatyp úlgergen.
«2014 jyly «Bolashaq» halyqaralyq baǵdarlamasynyń aıasynda Ulybrıtanııada marketıng jáne bıznes menedjmenti baǵytynda bilim aldym. Sol kezeńde bilim berý dástúrli modelden zamanaýı, ıkemdi jáne stýdenttiń qajettilikterine beıimdelgen formatqa aýysa bastaǵan edi. Bul tájirıbe meniń tehnologııalar men bilim berý salasyn biriktiretin jobalarǵa degen qyzyǵýshylyǵymdy arttyrdy. Qazaqstanǵa oralǵannan keıin bizdiń alǵashqy jobamyz joǵary oqý oryndaryna arnalǵan kýrstyq jáne dıplomdyq jumystardy avtomatty túrde tekserý júıesin ázirleý boldy. Alaıda jobany iske asyrý barysynda naryqtaǵy qoldanystaǵy sheshimderdiń kópshiligi jergilikti talaptar men bilim berý júıesiniń erekshelikterine tolyq sáıkes kelmeıtinin anyqtadyq. Osyǵan baılanysty biz Qazaqstan naryǵyna arnaıy beıimdelgen, ózimizdiń tehnologııalyq platformamyzdy ázirleýge sheshim qabyldadyq», deıdi joba avtory Oljas О́mirserik.
Qaterli isikti anyqtaýǵa bes sýret jetkilikti: Jas ǵalym ázirlegen algorıtmniń ereksheligi qandaı?
Osylaısha ınteraktıvti panelder men jasandy ıntellekt elementterin jáne sıfrlyq kontent ázirleý quraldaryn biriktiretin keshendi ekojúıe quryldy. Alaıda joba avtorynyń aıtýynsha, sıfrlyq bilim berý úderisine jasalǵan transformasııalyq qadam alǵashynda aıtarlyqtaı qoldaý taba qoımaǵan.
«Eń úlken qıyndyqtardyń biri – jańa tehnologııanyń qundylyǵyn túsindirý boldy. Bastapqy kezeńde kóptegen uıymdar dástúrli oqytý formatyna úırengen edi. Sondyqtan bizge tek ónimdi kórsetý emes, oqytý tásiliniń ózi ózgerip jatqanyn dáleldeý qajet boldy. Taǵy bir mańyzdy másele – ımporttyq sheshimderdiń jergilikti naryqqa sáıkes kelmeýi. Sheteldik júıelerdi qaıta beıimdeý ýaqytty uzartty jáne tıimdilikti tómendetti. Osy sebepti biz tolyqtaı otandyq ónim ázirleýge sheshim qabyldadyq. Búginde bul sheshim óziniń tıimdiligin dáleldedi. Qazaqstan sıfrlyq bilim berý baǵytynda aıtarlyqtaı progress kórsetip keledi. Eger buryn onlaın oqytý tek dástúrli aýdıtorııany Zoom formatyna kóshirýmen shektelse, qazir bilim berý kontentiniń sapasyna, vızýalızasııaǵa jáne ınteraktıvtilikke úlken kóńil bólinip otyr. Búgingi stýdent jaı aqparatty emes, qyzyqty ári dınamıkalyq formattaǵy bilimdi kútedi. Munyń nátıjesin halyqaralyq kórsetkishterden de kórýge bolady. Coursera platformasynyń derekterine sáıkes, Qazaqstan onlaın oqýǵa qatysý deńgeıi boıynsha álemniń 109 eli arasynda 18-orynǵa kóterildi», deıdi joba avtory.
Onyń aıtýynsha, ınteraktıvti vıdeostýdııany engizý bilim berý sapasyn arttyryp qana qoımaı, sıfrlyq ortany damytýǵa múmkindik beredi. Mundaǵy kásibı jaryqtandyrý, sapaly dybys jáne zamanaýı jazý tehnologııalary beınesabaqtardy tartymdy ári túsinikti etedi. Sabaqtarǵa testter, vıktorınalar, siltemeler, sýretter, 3D nysandar jáne qosymsha tapsyrmalar engizýge bolady. Telesýfler, daıyn shablondar jáne zamanaýı quraldar sabaqqa daıyndyq ýaqytyn aıtarlyqtaı qysqartady.
«Biz qazirdiń ózinde AI tehnologııalaryn ónimderimizge engizýdi bastap kettik. Bolashaqta olar oqý materıaldaryn daıyndaýǵa kómektesip, daıyn sabaqtardy avtomatty túrde qurastyratyn bolady. Kontentti túrli tilderge avtomatty túrde aýdaryp, stýdentterdiń belsendiligi men oqý tıimdiligin taldaıdy. Ár oqýshy úshin jeke beıimdelgen oqý ssenarıılerin jasaýǵa múmkindik beredi», deıdi kásipker.
Oraldyq oqýshylar qant dıabetiniń mólsherin tekseretin qurylǵy oılap tapty
Sarapshylar qazirdiń ózinde jasandy ıntellekt bilim berý júıesiniń mańyzdy bóligine aınalyp kele jatqandyǵyn aıtyp keledi. Sol sebepti joba avtory bul baǵyttaǵy jumystardy ármen qaraı jetildire túsýge nıetti ekendigin jetkizdi.
