Olga Tımnen «Tildi qalaı úırendińiz?» dep suraıtyndar kóp. Osakarov aýdany Shuńqyrkól aýylynda ómirge kelgen keıipkerimiz qaradomalaq qazaq balalarymen oınap óskendikten, tildi erkin meńgergenin aıtady. Olganyń mekteptegi eń súıikti páni qazaq tili bolypty. Al 5-synyptan bastap «muǵalim bolamyn» degen asyl armany ony alǵa jeteledi.
Orys mektebin bitirse de, Olga Germanovna bolashaq mamandyǵyn tańdaýda esh múdirgen joq. Senimdi túrde qazaq tili pániniń muǵalimi bolýǵa bel býdy. Qaraǵandydaǵy «Bolashaq» kolledjiniń birinshi kýrsyn aıaqtaǵan soń, alǵashqy pedagogıkalyq tájirıbeden ótýdi Pıonerskoe aýylyndaǵy mektepte bastaıdy. Ol jerde ápkesi men jezdesi (alǵashqy áskerı daıyndyq pániniń muǵalimi) qyzmet etetin. Dál osy jerde jas mamannyń ómiri kúrt ózgeredi.
Mekteptiń sol kezdegi basshylyǵy eki tildi de jetik biletin, bala tilin taba alatyn daryndy, talapty qyzdy birden baıqaıdy. Mektep dırektory Olgaǵa syrttaı bólimge aýysyp, birden jumysqa qalýdy usynady. Osylaısha, nebári 18 jasynda Olga Germanovna óziniń ustazdyq jolyn qazaq tili muǵalimi retinde bastaıdy.
Kolledjdi aıaqtaǵan soń bilimin «Bolashaq» akademııasynda jalǵastyrdy. Onyń izdenimpazdyǵy men qoǵamdyq belsendiligi eleýsiz qalǵan joq. 2012 jyly Qaraǵandy oblysy ákiminiń dástúrli «Qaınar» jastar syılyǵynyń «Jyl stýdenti» atalymyn jeńip aldy. Osy jetistiginen keıin magıstratýraǵa grant usynylsa da, Olga «meniń ornym – joǵary oqý ornynda emes, mekteptegi shákirtterimniń janynda» dep, ǵylym jolynan góri janyna jaqyn ustazdyq joldy tańdaıdy.
Segiz jyl boıy aýyl mektebinde shyńdalǵan ustaz, turmys qurǵannan keıin oblys ortalyǵyna qonys aýdardy. Qaraǵandy qalasyndaǵy №21 orta mektepte muǵalim jáne aǵa tálimger bolyp qyzmet etip, keıinnen biliktiliginiń arqasynda Q.Sátbaev atyndaǵy gımnazııanyń tárbıe isi jónindegi dırektordyń orynbasary laýazymyna deıin kóterildi. Bul jyldar ishinde ol oblystyq jáne respýblıkalyq deńgeıdegi kóptegen baıqaýdyń shyńyn baǵyndyrdy. Ásirese «Til janashyrlary» baıqaýynyń «Til bilgiri» atalymynda úzdik shyǵýy – onyń kópjyldyq eńbeginiń laıyqty baǵasy edi.
Bir qyzyǵy, Olga Germa-novnanyń otbasy da – kópultty. Anasy – ýkraın, ákesi – nemis. Al ómirlik serigi – qazaq azamaty. Tipti enesi de – nemis ultynan.
«Shańyraǵymyzda qazaqtyń barlyq salt-dástúrin ustanamyz. Naýryzkóje ázirlep, jeti shelpek pisiremiz. Qazaq otbasyna kelin bolǵan soń, munymyz – úırenshikti úrdis. Balalarymyzǵa nemis dástúrlerin de úıretemiz. Bilip óskenniń artyqshylyǵy joq», deıdi ol.
Olga Tımniń qoǵamdaǵy qyzmeti tek mekteppen shektelmeıdi. 2019 jyldan bas-tap ol Dostyq úıi janyndaǵy «Mámile» klýbynyń jumysyna belsene aralasyp, memlekettik tildi úırenýge qushtar jandarǵa dáris oqıdy. Klýbtyń ereksheligi – tildi ereje, emleler arqyly emes, halqymyzdyń tarıhy men mádenıeti arqyly meńgertýinde.
Búginde klýbqa kelýshilerdiń qatary kún saıyn kóbeıip keledi. Olardyń arasynda balabaqsha tárbıeshilerinen bastap, zeınetkerlerge, tanymal ártister men qarapaıym taksı júrgizýshilerine deıin bar. Olganyń paıymynsha, Qazaqstanda turatyn árbir azamat memlekettik tildi bilýge mindetti. О́ıtkeni til – halyqtyń jany, dostyqtyń dánekeri.
Qysqasy, Olga Tım sııaqty til janashyrlary barda qazaq tiliniń kósegesi kógerip, kókjıegi keńı túsetinine kámil senemiz.
Qaraǵandy oblysy
