«Astana Tazalyq» JShS kommýnaldyq qyzmet sapasyn arttyrý jáne ashyqtyqty qamtamasyz etý maqsatynda aýqymdy sıfrlyq transformasııa júrgizip jatyr. Kásiporynda elektrondy jol paraqtary, GPS-navıgasııa, jasandy ıntellekt kameralary jáne avtomattandyrylǵan medısınalyq tekserý júıeleri engizilip, barlyq óndiristik prosess onlaın rejımde baqylaýǵa kóshirildi.
2025–2026 jylǵy qysqy kezeńde kásiporyn úlken kólemdegi jumystardy atqardy: 2,2 mıllıon tekshe metrden astam qar shyǵaryldy, 475 tonna reagent qoldanyldy. Kúndelikti 600-den astam arnaıy tehnıka men 750-den astam jol jumysshysy jumyldyryldy. Qarqyndy qar jaýǵan kezeńderde (aqpan – naýryz aıynyń basy) jumystar kúsheıtilgen rejımde júrgizildi. Qazir shamamen 200 qyzmetker túngi aýysymda jumysyn jalǵastyryp jatyr.
«Qazir bizde júrgizýshilerdi medısınalyq tekserýden ótkizýge arnalǵan eki avtomattandyrylǵan keshen jumys isteıdi. Jalpy sany – altaý. Sonyń biri – №765 qurylǵysy. Júrgizýshi jumysqa kelgen kezde júıege Face ID arqyly tirkeledi. Sodan keıin ol qajetti tildi tańdaıdy, al júıe onyń jeke basyn avtomatty túrde anyqtaıdy.
Ári qaraı mindetti medısınalyq tekserý júrgiziledi. Ol jumysqa shyǵar aldynda da, aýysymnan keıin de oryndalady. Qurylǵy qan qysymyn, alkogol deńgeıin, kórý reaksııasyn tekseredi. Sonymen qatar júrgizýshiniń densaýlyq jaǵdaıy boıynsha shaǵymdary tirkeledi. Barlyq málimet avtomatty túrde medısınalyq qyzmetkerdiń júıesine túsedi. Degenmen reıske shyǵýǵa ruqsatty tek medısına qyzmetkeri elektrondy túrde rastaıdy. Tekserýden keıin júıe arnaıy chek qalyptastyrady. Júrgizýshi ony jumys barysynda ózimen birge alyp júredi. Eger qan qysymy joǵary nemese alkogol ishý faktileri anyqtalsa, júrgizýshi jumysqa jiberilmeıdi. Bul júıe qaýipsizdikti arttyrýǵa múmkindik berdi. Medısınalyq tekserýden keıin derekter bas mehanıkterdiń júıesine túsedi. Olar tehnıka men júrgizýshilerdiń aýysymdyq jumysyn elektrondy túrde josparlaıdy.
Barlyq júrgizýshilerdiń telefonynda arnaıy qosymsha bar. Jumysqa kelgen kezde QR-kod arqyly tirkelip, jol paraǵy avtomatty túrde ashylady. Barlyq derekter biryńǵaı sıfrlyq júıede onlaın baqylanady», dedi «Astana Tazalyq» JShS IT mamany Jaras Ahmedııa.
Kásiporyn qala aýmaǵynyń shamamen 32%-yna qyzmet kórsetedi, negizgi jáne ortalyq kóshelerdiń tazalyǵyn qamtamasyz etedi. Balansynda 418 birlik tehnıka bar, qajet bolǵan jaǵdaıda merdiger uıymdardyń qosymsha tehnıkasy tartyldy. Barlyq tehnıka táýlik boıy jumys istedi. Jazǵy kezeńde qyzmetkerler sanyn 450–550 adamǵa deıin ońtaılandyrý josparlanǵan.
Modernızasııanyń negizgi baǵyttarynyń biri – prosesterdi sıfrlandyrý boldy. Elektrondy jol paraqtary júıesi engizilip, ol qazirdiń ózinde 393 tehnıka birligin qamtıdy jáne naqty ýaqyt rejıminde qozǵalysty, oryndalǵan jumys kólemin jáne materıaldardyń shyǵynyn baqylaýǵa múmkindik beredi.
Sonymen qatar GPS-navıgasııa, janarmaı deńgeıin baqylaý datchıkteri jáne jasandy ıntellekt negizindegi monıtorıng júıeleri engizilgen. Bul sheshimder marshrýttardy dál baqylaýǵa, janarmaı shyǵynyn esepteýge jáne júrgizýshilerdiń jaǵdaıyn qadaǵalaýǵa múmkindik berip otyr. Keıbir júıeler sharshaý nemese qaýip belgilerin anyqtaǵan jaǵdaıda avtomatty túrde tıisti qyzmetke sıgnal joldaıdy.
Sıfrlandyrý baǵyty «Astana Tazalyq» úshin tek tehnologııalyq jańarý ǵana emes, sonymen qatar qyzmet sapasyn arttyrý men qalalyq ınfraqurylymnyń turaqty jumysyn qamtamasyz etýdiń mańyzdy quralyna aınalǵan. Sondaı-aq elektrondy baqylaý júıeleri men avtomattandyrylǵan prosester tek eńbek ónimdiligin arttyryp qana qoımaı, ashyqtyq pen tártipti kúsheıtýge yqpal etip otyr.
