Taraptar ónerkásip, munaı-gaz, agroónerkásip salalaryndaǵy yntymaqtastyqty damytý jáne ınvestısııa tartý máselesin talqylady. Narıman Tóreǵalıev Aqjaıyq óńirinde ınvestısııalyq ahýal jaqsy ekenin, qazirdiń ózinde birneshe Qytaı ınvestorynyń qatysýymen birqatar iri joba júzege asyp jatqanyn jetkizdi.
Ákimniń aıtýynsha, oblysta ınvestısııalyq jobalardy iske asyrý úshin qolaıly jaǵdaı qalyptasqan, sheteldik ınvestorlarǵa jan-jaqty qoldaý kórsetiledi.
«Prezıdent Qasym-Jomart Kemeluly Toqaevtyń tapsyrmasymen biz óńirdegi ınvestısııalyq ahýaldy odan ári jaqsartyp, qyzyǵýshylyq tanytqan kompanııalarǵa jańa múmkindikter usynyp otyrmyz. Qytaılyq ınvestorlarmen birlesip, suıyq metanol, sement zaýyttary, gaz týrbınaly jáne jel elektr stansalaryn salý jáne ózge de mańyzdy jobalardy iske asyryp jatyrmyz. Jumys oryndaryn ashamyn, óndiristi damytamyn degen ınvestorlar úshin arnaıy ekonomıkalyq aımaq bar», dedi Narıman Tóreǵalıev.
О́z kezeginde Van Sınveı de Qazaqstan men Lıaonın provınsııasy arasyndaǵy ózara tıimdi áriptestikti odan ári nyǵaıtýǵa daıyn ekenin aıtty. Lıaonın provınsııasynyń gýbernatory Qazaqstan men Qytaı arasyndaǵy strategııalyq áriptestik óńiraralyq baılanystyń damýyna serpin berip otyrǵanyn atap ótti.
«QHR Tóraǵasy Sı Szınpın eki el bir-birine senim artatyn strategııalyq seriktes ekenin únemi atap ótedi. Keıingi jyldary Lıaonın ólkesi men Qazaqstan arasyndaǵy baılanys bekı tústi. Byltyr ekijaqty saýda aınalymy 2,7 mıllıard ıýanǵa jetti. Sizderdiń Halyqaralyq baýyrlas qalalar forýmyna kelýińiz ortaq maqsat jolyndaǵy shynaıy yqylasty bildiredi», dedi Van Sınveı.
Aıtqandaı, Batys Qazaqstan oblysynyń delegasııasynyń sapary Halyqaralyq baýyrlas qalalar forýmymen tuspa-tus keldi. Delegasııa quramynda memlekettik organdardyń, bıznes qaýymdastyqtardyń, aýyl sharýashylyǵy, qurylys jáne jol salasynyń ókilderi bar.
Qazaqstannyń jańa ınvestısııalyq sıkli: Ekonomıkalyq logıka jáne jeke kapıtaldyń róli
Batys Qazaqstan oblysynyń Kásipkerlik jáne ındýstrııalyq-ınnovasııalyq damý basqarmasynyń basshysy Nurjan О́tepbaev bul forým óńiraralyq seriktestikti nyǵaıtýǵa jáne jańa ınvestısııalyq múmkindikterdi qarastyrýǵa jol ashatynyn aıtty.
«Biz Lıaonın baýyrlas jáne yntymaqtas óńirimen seriktestikti tereńdetý maqsatynda osy iri forýmǵa qatysyp otyrmyz. Delegasııa quramynda 24 adam bar, olardyń ishinde iri kásipkerler, aýyl sharýashylyǵy, qurylys, jol salasynyń ókilderi bar. Sondaı-aq, aýdan ákimi, basqarma basshylary jáne ákimniń orynbasarlary qatysyp otyr. Bizdiń basty mindetimiz – ınvestısııa tartý, eki óńir arasyndaǵy ekonomıkalyq kópirdi nyǵaıtý. Forým aıasynda biz baýyrlastyq baılanysty kúsheıtip, memorandýmdarǵa qol qoıýǵa nıettimiz. Sonymen birge, Sınchjoý jáne Oral qalalary arasynda jalpy yntymaqtastyq baǵytynda saýda, mádenıet, sport, bilim jáne densaýlyq saqtaý baǵytynda mańyzdy jobalardy iske asyrýdy josparlap otyrmyz», dedi Nurjan О́tepbaev.
Kezdesý qorytyndysynda taraptar óndiristik kooperasııany damytýǵa, ınvestısııalyq jobalardy birlesip júzege asyrýǵa jáne mádenı-gýmanıtarlyq baılanysty keńeıtýge ózara qyzyǵýshylyq bildirdi.
