Ystambul qalasynda Búkilálemdik túrki forýmy bolyp ótti. Bul halyqaralyq aýqymdy shara “Túrki keńesi, túrki dıasporasy jáne áleýmettik-ekonomıkalyq yntymaqtastyq” dep ataldy.
Forýmdy Túrik-Azııa strategııalyq zertteýler ortalyǵy (TASAM) uıymdastyrdy. Jıynǵa 60-tan astam túrki tildes eldiń ókilderi qatysty. Qazaqstan delegasııasynyń quramynda Parlament Senatynyń depýtaty, akademık Ǵarıfolla Esim, akademık Ábdimálik Nysanbaev, Dúnıejúzi qazaqtary qaýymdastyǵy tóralqasy tóraǵasynyń birinshi orynbasary Talǵat Mamashev, Qazaqstan Jýrnalıster odaǵy basqarmasynyń tóraǵasy Seıitqazy Mataev, Mádenıet mınıstrligi Til komıtetiniń tóraǵasy Baýyrjan Omarov jáne birqatar ǵalymdar boldy.
Jalpy, jıynda TÚRKSOI halyqaralyq uıymynyń bas dırektory Dúısen Qaseıinov baıandama jasady. Ol Qazaqstannyń túrki halyqtarynyń ortaq múddesi turǵysynan atqaryp jatqan jumystary jóninde áńgimeledi. Bul jıynda túrki dúnıesi birligin damytýǵa Qazaq eliniń úlesi jaıynda birneshe ret ataldy. Forýmnyń irgeli seksııalarynyń birine akademık Ǵarıfolla Esim basshylyq etti.
Forýmǵa qatysýshylar búkil túrki tildes elderdiń arasynan shyqqan tuńǵysh ǵaryshker, qazaqtyń qaharman uly Toqtar Áýbákirovti zor qurmetpen qarsy aldy. Ǵaryshkerdiń eldik murattardy alǵa tarta otyryp sóılegen sózine jıylǵan jurt yqylastana qol soqty.
Jıyn jyl saıyn ótkizilip turatyn bolyp kelisildi. Sonymen qatar, búkil túrki jurty ıgiligin kóretin ınternet-portal jasalmaq. Bul forým túrki dúnıesi birligin nyǵaıtýǵa baǵyttalǵan taǵy bir qadam boldy.
Asqar TURǴANBAEV, Mádenıet mınıstrliginiń TÚRKSOI-daǵy ókili.
Ystambul.
