Kezdesýde Qazaqstan Prezıdentine Ulttyq palatanyń 2016 jylǵy jumysynyń qorytyndylary, respýblıkalyq bıznes qoǵamdastyǵynyń damýy, sondaı-aq aldaǵy kezeńge arnalǵan josparlar týraly tóralqa tóraǵasy T.Qulybaev pen basqarma tóraǵasy A.Myrzahmetov baıandady.
Elbasy bıznesti qoldaý jóninde Úkimet maqsatty túrde turaqty jumys júrgizip otyrǵanyn atap ótti.
– Zańnamalyq aktilerge der kezinde ózgerister engizý baǵytynda júıeli jumystar júrgizilýde, tekserýshi mekemeler sany qysqartyldy, josparly tekserister toqtatyldy. Kásipkerler zańnamalyq úderisterge belsene atsalysyp keledi, bul eldiń ishki jalpy ónimindegi bıznestiń úlesin arttyrýǵa yqpal etýge tıis, – dedi Nursultan Nazarbaev.
Sondaı-aq, Qazaqstan Prezıdenti eldegi kásipkerlikti damytý úshin memleket qabyldap jatqan sharalarǵa bıznes ókilderi tarapynan laıyqty qaıtarym bolýǵa tıis ekenine nazar aýdardy.
– Memleket tarapynan kórsetilgen qamqorlyq pen qoldaýǵa bıznestiń laıyqty jaýap beretin kezi keldi. Azamattardy kásipkerlik salasyna turaqty túrde tartyp, olardyń el ekonomıkasyndaǵy úlesin arttyrý úshin jumys júrgizý qajet, – dedi Memleket basshysy.
Palata basshylyǵy qazirgi ýaqytta shaǵyn jáne orta bıznes úlesi ishki jalpy ónimniń 25%-yn quraıtynyn, onda 3 mıllıonnan astam adam jumys istep jatqanyn málimdedi. 2016 jyly 11,2 trln teńgeniń ónimi óndirilgen, bul – 2015 jylǵy kórsetkishpen salystyrǵanda 6%-ǵa artyq.
Sonymen birge, basqarma tóraǵasy Elbasynyń tapsyrmasy boıynsha ruqsat berý jáne baqylaý-qadaǵalaý salasynda revızııalyq jumys júrgizilip jatqanyn atap ótti. Onyń nátıjesinde ruqsat berý qujattary aıtarlyqtaı azaıtylyp, josparly tekserister toqtatyldy.
– Bas prokýratýramen, Parlament depýtattarymen birlesip, qazir shaǵyn jáne orta bıznes qyzmetiniń túrli salasyndaǵy sanıtarlyq-epıdemıologııalyq talaptardy qaıta qarastyrýdamyz, – dedi A.Myrzahmetov.
Budan bólek, Ulttyq palata basshylyǵy otandyq kásipkerlerdiń jumysyn ońtaılandyrý jáne tıimdirek ete túsý úshin mobıldi qyzmetter qalyptastyrýǵa qatysty júrgizilip jatqan jumystar týraly baıandady.
Nursultan Nazarbaev kezdesý qorytyndysy boıynsha birqatar naqty tapsyrma berdi.
Sýretter Prezıdenttiń baspasóz qyzmetinen alyndy
