25 myń túp gúl

Oqýshylardyń Táýelsizdikke syıy osyndaı Shymkent qalasyndaǵy №89 mektep-lıseıdiń oqýshylary el táýelsizdiginiń 25 jyldyǵyna oraı oblys ortalyǵyna 25 myń túp gúl syılady. Kózdiń jaýyn alatyn jylyjaıda ósirilgen neshe túrli gúlder qalanyń kórkine kórik berip, ajaryn ashty. Mektep janynda jas jetkinshekterge arnalǵan ekologtar úıirmesi bar. Qorshaǵan ortanyń syryn bilý úshin munda bilim alyp jatqan oqýshylar az emes. Jylyjaı osydan tórt jyl buryn demeýshilerdiń kómegimen salynǵan. Sodan beri jasóspirimder osy jerde kóz qyzyqtyratyn túrli gúlder ósirýmen aınalysyp keledi. Solardyń biri – atalǵan bilim oshaǵynyń oqýshysy Jansaıa Mahmudova. Ol jylyjaı ashylǵaly beri shyraıgúl túrin ósirip, onyń jetilýin zerttep júr. Aıtýynsha, ósimdiktiń bul túri ystyqqa tózimdi ári tyńaıtqyshty asa kóp qajet etpeıdi. Tek ýaqytynda sýaryp turý kerek. Sonymen qatar, tozańdandyrý arqyly onyń túrin óz­ger­t­ýge de bolatyn erekshe qyryn atap ótti. – Jumysymyzdyń barysynda bir shaı qasyq kólemine shamamen 25 myń dana tuqym syıatyny anyqtaldy. Erte kóktemde arnaıy jáshikterdi daıyndap, oǵan bıogýmýs pen topyraqty aralastyryp otyrǵyzyp alamyz. Osydan keıin 10-12 kúnde kóshet kúıine jetedi, budan soń sıretý ádisimen stakandarǵa ornalastyramyz. Bul shamamen 1-2 aı ýaqyt alady, – deıdi Jansaıa. Qazir mektep aýlasy kórgen adamnyń nazaryn eriksiz tartady. Oqýshylar jylyjaıda ósirgen gúlderin osy jerge ákelip otyrǵyzady. Shaǵyn ǵana jylyjaıda júzdegen túp gúl ósip tur. Onyń basym bóligin mektepterge, balabaqshalarǵa jáne soǵys ardagerleriniń úıine tegin otyrǵyzyp berý dástúrge aınalǵan. – Oqýshylarymyz tek gúl ósirýmen ǵana shektelip qalmaı, saıaly ósimdikterdi, jemis aǵashtaryn tuqymynan jáne qalamshadan kóbeıtý ádisterin úırenýde. Osy arqyly eńbekke baýlımyz. Qazir oqýshylarymyz sabaqtan tys ýaqyttaryn paıdaly nársege jumsaıdy, – deıdi geografııa pániniń muǵalimi Bazarkúl Jabaeva. Oqýshylardyń endigi maqsaty – qalanyń gúldenýine septigin tıgizý. Qala boıynsha, 1 mıllıonnan astam gúl kóshetin otyrǵyzý josparlansa, №89 mekteptiń jylyjaıynda 30 myń túp gúl daıyn tur. Baqtııar TAIJAN, «Egemen Qazaqstan» ShYMKENT