Eýropa qazaqtarynyń kishi quryltaıy

Jaqynda Qazaqstannyń Germanııadaǵy elshiligi men Eýropa qazaqtary qoǵamdastyǵynyń qoldaýymen Kıoln qalasynda Germanııa, Ulybrıtanııa, Fransııa, Vengrııa, Avstrııa, Shveısarııa, Shvesııa, Danııa, Norvegııa, Nıderland, Túrkııa, AQSh elderindegi etnostyq dıasporanyń eki myńǵa jýyq ókiliniń basyn qosqan Eýropa qazaqtarynyń kezekti kishi quryltaıy ótti. Qazaqstannyń Germanııadaǵy elshisi Bolat Núsipov Qazaqstan Respýblıkasynyń Prezıdenti Nursultan Nazarbaevtyń quttyq­taý joldaýyn oqydy. Elbasy óziniń quttyqtaýynda qazaq dıas­porasyn kele jatqan Qazaqstan Táýelsizdiginiń 25 jyldyq mereıtoıymen quttyqtap, «Máńgilik El» Ulttyq ıdeıasynyń kaǵıdalaryna sáıkes, ana tilin saqtaý jáne damytý, mádenıet jáne ulttyq salt-dástúrdi, tarıhı Otanymen baı­la­nysty nyǵaıtý sııaqty másele­ler­diń mańyzdylyǵyn atap ótken. Qazaqstandyq dıplomat memleket tarapynan qazaq dıasporasyn qoldaý boıynsha úlken jumys júrgizilgenin habarlady. Mysaly, 2014 jyly Berlınde ashylǵan Qazaq mádenı-ekonomı­ka­lyq ortalyǵynda qazaq áde­bıeti­niń klassıkteri, qazirgi zamanǵy qazaq jazýshylarynyń shy­ǵar­malary, qazaqstandyq jýrnaldar men gazetter, oqýlyqtar, sóz­dik­ter, memlekettik tildi oqytý­ǵa ar­nal­ǵan oqý-ádisteme qural­da­ry, so­nymen qatar, elimiz tý­ra­ly ta­nymal elektrondyq ónim­der usynyldy. Osy materıal­dar qazaq dıasporasynyń ókil­deri úshin qoljetimdi jáne úlken su­ranys týǵyzyp otyr. 2010 jyly Berlındegi Gýmbold ýnı­ver­sı­tetiniń janynan ashylǵan «Qazaq­stan jáne qazaq tili» lektoraty qazaq dıasporasynyń jastaryna ana tilin úırenýge, Qazaqstannyń tarı­hy­men tanysýǵa jáne qazirgi zaman­ǵy damýynan aqparat alýǵa múm­kin­dik beredi. Nemis tarapynan Býndestag depýtaty, qandasymyz Genrıh Sertık sóz sóılep, Qazaqstanda turyp jatqan 800 myń etnostyq nemister úshin tarıhı otanymen baılanystardy qoldaý jáne damytýdyń mańyzdylyǵyn atap ótti. Sondaı-aq, ol Germanııada tura­tyn etnos­tyq qazaqtardyń ózindik erek­she­likterine nazar aýdardy. G.Sertık nemis halqy qazaqtardyń olardy óz otbasyna qabyldap, ajaldan arashalap qalǵandaryn eshqashan umytpaıtynyn, qashanda qurmet tutatynyn atap ótti. Eýropa qazaqtary qoǵamdas­tyǵynyń basshysy Abdýl Kaıým Kesıchı óz sózinde eýropalyq otan­dastardyń basqosýlaryn ót­kizý sońǵy on jylda jaqsy dástúrge aınalǵanyn jetkizdi. Onyń basty maqsaty – óz eliniń ulttyq murasy men mádenıetin jastardyń boıyna sińirý. Mundaı kezdesýlerdiń óz tarıhı Otanynan alysta júrgen qazaqtar úshin mańyzy óte zor. Eń bastysy – osyndaı quryltaılar otan­dastar úshin asa ózekti máse­le­lerdi talqylaýǵa, olardy sheshýge múmkindik beredi. A.Kesıchı Eýropada turatyn qazaqtardyń aty­nan ózderin jeke qoldaýy jáne qamqorlyǵy úshin Elbasyna alǵysyn bildirdi. Quryltaı sheńberinde jastar arasynda túrli baıqaýlar, sporttyq saıystar uıymdastyrylyp, sýretter kórmesi ashyldy, sonymen qatar, balalar merekesi ótkizildi. Tany­mal qazaq ánshileriniń oryn­daýyn­daǵy dástúrli jáne zamanaýı mýzy­kalyq shyǵarmalar atalǵan shara­ǵa erekshe ulttyq naqysh berdi. Jalpy, Eýropadaǵy qazaq qaýymdastyǵy 7 myń adamnyń basyn biriktiredi.