Qoıan ósirip, qoly uzardy

Aýylda turǵan soń alysqa uzamaı, aýlańda kásip qylǵanǵa ne jetsin. Al qala mańyndaǵy aýyldarda tórt túlik mal ustaý qıyndaý ekeni belgili. Jemshóbi, jaıylymy tabylmaıdy. Osyny eskergendikten bolar, sońǵy kezderi Aqtóbe óńirinde túıequs, kúrketaýyq, bódene, balyq, qoıan ósirip, tabys taýyp, turmysyn túzep jatqandar kóbeıip keledi. Ásirese, tez kóbeıetin, baǵym-kútimi jeńildeý – qoıan ósirýge den qoıýshylar jeterlik. Solardyń biri – Marjanbulaq aýylynyń turǵyny Erjan Muhamádı. Ol memlekettik baǵdarlama kómegimen 2 mln. 300 myń teńge nesıe qolǵa tıisimen, ótken jyldyń kúzinde osy isti bastap ketti. Qys boıy qoıan sanyn kóbeıtip, 60-tan asyrdy. Odan qońdy shyqqandaryn ótkizipti. Qoıandar arnaıy úıshikte baǵylady. Jerden bıik ornalasqan úıshik tazalyqqa jaqsy. Jaz mezgiline arnap ashyq qora salmaqshy. Sharýa Erjan Muhamádıdiń aıtýynsha, qoıannyń eti asqazanda 95 paıyzǵa deıin qorytylady eken. Adamnyń ımmýnıtetin kúsheıtip, aǵzadan ýly zattardy shyǵaratyn qasıeti bar. Tańsyq ári ekologııalyq taza etke suranys ta joǵary kórinedi. Memlekettiń kómegimen óz isin bastaǵan qoıan ósirý­shi sharýa­shylyǵyn odan ári keńeıtý­di kózdeýde. – Biz qoıan sanyn kóbeıtip, úlken naryqqa shyqsaq dep oılaımyz. Qazir 30 qoıanymyz ǵana bar. Negizi qoıan ósimtal. Men sııaqty is bastaımyn, eńbek etemin degen jastarǵa memleket qoldaý kórsetip otyr. Osy múmkindikterdi tıimdi paıdalanýdy oılastyrýdamyz, – deıdi ol. Satybaldy SÁÝIRBAI, «Egemen Qazaqstan» Aqtóbe oblysy, Alǵa aýdany