Almatyda dzıýdo akademııasy ashyldy

Almaty qalasynda Kárken Ahmetov atyndaǵy Olımpıada rezervterin daıyndaıtyn respýblıkalyq mamandandyrylǵan mektep-ınternat-kolledjiniń aýmaǵynda salynǵan Qazaqstandaǵy tuńǵysh dzıýdo akademııasy qoldanysqa berildi. Akademııanyń ashylý rásimine Mádenıet jáne sport mınıstri Arystanbek Muhamedıuly, Alma­ty qalasynyń ákimi Baýyrjan Baıbek, Halyqaralyq dzıýdo fe­derasııasynyń prezıdenti Marıýs Vızer, Qazaqstan dzıýdo fede­rasııasynyń prezıdenti Keńes Raqyshev jáne federasııa ókilderi, elge tanymal sportshylar men jas dzıýdoshylar qatysty. Akademııanyń saltanatty ashy­­lýy kezinde Mádenıet jáne sport mınıstri Arystanbek Muha­medıuly men Halyqaralyq dzıýdo federasııasynyń pre­zıdenti Marıýs Vızer jańa sport ǵıma­ratynyń tusaýyn kesti. Budan keıin sheteldik qonaqtar men resmı ókilder álemdik stan­darttarǵa saı etip salynǵan ja­ńa dzıýdo akademııasyn aralap kórdi. Aýqymdy 4 juptyq tatamı tóselgen keń zalda ótken jıyn barysynda Arystanbek Muhamedıuly, Almaty qala­synyń ákimi Baýyrjan Baıbek jáne Halyqaralyq dzıýdo federa­sııa­synyń prezıdenti Marıýs Vızer sóz sóılep, ıgi tilekterin bildirdi. – Bul bizdiń qalamyz úshin ǵana emes, búkil memleketimizdiń mártebesin álemdik deńgeıde pash etetin elimizdiń aıtýly oqıǵasy. Mundaı dzıýdo akademııasy Qazaq­standa tuńǵysh ret shańyraq kóterip otyr. Otandyq jas sportshylardy úlken sportqa bastap, elimizdiń kók týyn halyqaralyq dodalarda bıik jelbiretetin sport mektebin salýǵa jeke qarajatynan 2,5 mıllıon dollardy bólgen Keńes Raqyshevke alǵysymyz shek­siz! Elbasymyz nasıhat etken salamatty ómir saltyn damytý maqsatynda elimizde búgingi tańda memleket jáne jeke tulǵalar tara­pynan barlyq jaǵdaı jasalyp otyrǵandyǵy barshamyzdy qýantady, – dedi qala basshysy Baýyrjan Baıbek. Jıyn sońynda Qazaqstan dzıýdo federasııasynyń prezı­denti, «Qazkommersbank» AQ Dırek­torlar keńesiniń tór­aǵasy Ke­ńes Raqyshev jańa dzıýdo aka­demııasynyń sım­vo­lıkalyq kiltin osy mektep-ın­ternattyń túlegi, 2015 jyly dzıýdodan kadetter arasynda Saraevo qalasynda ótken álem chempıonatynyń altyn júldegeri Aıbolat Ystybaıǵa tapsyrdy. Jıyn sońynda tatamıge shyqqan jas dzıýdoshylar ónerlerin pash etti. Aıta ketelik, dzıýdo akademııa­sy álemdik standarttarǵa saı etip salynǵan.  Onyń 4 jup tatamı tóselgen aýqymdy zalynda bir mezette 200 adamǵa deıin jattyǵý jasaı alady. Sonymen qatar, akademııa aýmaǵynda trenajer zaly, 100 adamǵa shaqtalǵan 2 jáne 4 oryndyq jataqhana, 100 adamǵa arnalǵan ashana, dáriger kabıneti, basseın, saýna, sporttyq kıimderdi jýýǵa jáne sportshylar demalýǵa arnap jabdyqtalǵan bólmeler bar. Dzıýdo akademııasyn salýǵa memlekettik-jekemenshik serik­testik negizinde shamamen  4,5 mıl­lıonnan asa AQSh dollary jumsalǵan.  Sonyń ishinde 2,5 mıllıon AQSh dollary jeke ınvestordyń qarajaty. Qurylys jumystaryn Qazaq­stan dzıýdo federasııasynyń res­mı demeýshisi SAT&Company kompanııasy júrgizdi. Aka­de­mııa aýmaǵy 1 gektarǵa jýyq­taıdy. Al, jalpy akademııa ǵımaratynyń alańy 4,5-5 myń sharshy metrdi quraıdy. Bo­lashaqta bul sporttyq bazada tek Qazaqstannyń ulttyq qu­ramalary ǵana emes, shet el­der­diń ulttyq qurama koman­dalary da kelip, osy jerde tolyqqandy oqý-jattyǵý jıyndaryn ótkizýdi uıǵaryp otyr. Sonymen qatar, munda birlesken oqý-jattyǵý jıyndary, semınarlar uıymdastyrylady. Sondaı-aq akademııadaǵy oqý-jattyǵý jetkinshekter úshin tegin bolady. Bolashaqta bul mekemege halyqaralyq mártebe berilýi de múmkin. Qanat ESKENDIR, «Egemen Qazaqstan» ALMATY