Almatyda qarý-jaraqty arandatýshylar ákelgeni anyqtaldy

ASTANA. 21 mamyr. Almatynyń qaq ortasynda qarý-jaraq saqtaǵandardyń arandatýshylar eken belgili boldy. Bul týraly KTK telearnasynyń aqparyna silteme jasaǵan egemen.kz tilshisi habarlady. «Jerdiń jaıy qyzý talqylanyp jatqan dál qazirgi eń ózekti taqyryp. Biraq sońǵy ýaqyttaǵy jaǵdaıǵa zer salsaq, máseleniń ýshyqqany belgili bir toptarǵa asa qajet syńaıly. Prezıdent jer kodeksine maratorıı jarııalady. Arnaıy komıssııa qurylyp, qujattyń daýly degen tustary jiti talqylanyp jatyr. Biraq arandatýshylar buǵan da qarap jatqan joq», - dedi telearna tilshisi. Keshe Almatyda sondaı pıǵyldylardyń áreketi áshkere bolǵan. Arnaıy qyzmet ókilderi qalanyń qaq ortasynan janarmaı quıylǵan shólmekter, ádeıi yqshamdap kesilgen armatýralar taýyp aldy. Taǵy eki páterge atys qarýlary men aqsha jasyrylǵan. Almatyda keshe tań atpastan Respýblıka alańyna jaqyn ornalasqan Baıseıitova kóshesi qorshaýǵa alyndy. Shektelgen aýmaqqa eshkim jiberilmeı, ol jerdi polısııa qyzmetkerleri qarap shyqty. Nátıjesinde Respýblıka jáne Astana alańynyń mańaıynan janarmaı quıylǵan bótelkeler men armatýra temirler salynǵan paketter tabylǵan. Halyqtyń jerge degen alańdaýshylyǵyn pıǵyly bótender osyndaı quraldar arqyly paıdalanbaq bolǵan syńaıly. El irgesin shaıqaltqysy keletinderdiń endigi áreketi odan da sumdyq. Bostandyq jáne Almaly aýdandarynda ornalasqan eki páterden «Makarov» jáne «TT» markaly tapanshalar, 4 «RGD-5»  granatasy, 1 sholaq myltyq pen 5 mıllıon teńge alynǵan. Osyǵan baılanysty tártip saqshylary turǵyndardy arandatýshylardyń aıtaǵyna ermeýge shaqyryp otyr. «Almaty qalasyndaǵy ahýal qazirgi tańda jiti baqylaý ústinde. Málimetter jalpy qala turǵyndarynan kelip túsken. Sondyqtan túse salysymen, málimetterdi tekserýge barynsha jumyldyryp, mundaı málimetter shyn máninde rastalǵan bolyp shyqty. Bul jaǵdaı zańsyz qarý-jaraq saqtaý deregi retinde tirkelipti. Biraq bul arandatýǵa baǵyttalǵan áreketter ekeni anyq. Qazir osy iske qatysy bar 5 adam ustalǵan. Bireýi Pavlodardan, qalǵandary osy óńirden. Barlyǵy da osyǵan deıin nashaqorlyq, qyz zorlaý, urlyq sekildi qylmystyq isterge belsheden batqan. Olardyń qıturqy áreketterin arnaıy saraptama áli de anyqtaıdy. Osy jáıtterdiń árqaısysy boıynsha qylmystyq is qozǵaldy», - dedi Almaty qalalyq ishki ister departamentiniń resmı ókili Saltanat Ázirbek. Talǵat Raıymbek. Derek, foto: KTK.