Shymkentte bilim basshysy jol apaty sebebinen qyzmetten ketti

ShYMKENT. 21 mamyr. Sońy qaıǵyly jaǵdaımen aıaqtalǵan jol apatyna baılanysty qala ákimi shuǵyl jıyn ótkizdi. Bul týraly 24.kz aqparyna silteme jasaǵan egemen.kz tilshisi habarlady. Qala ákimi Ǵabıdolla Ábdirahymov oblys ortalyǵyndaǵy aıaldamalardyń birinde turǵan oqýshy balalarǵa kezdeısoq kólik soǵyp, aqyry búldirshin balanyń ólimimen aıaqtalǵan qaıǵyly oqıǵaǵa baılanysty shuǵyl jıyn ótkizdi. Onyń barysynda ákim qashyqtan qatynap oqıtyn oqýshylar tasymalyn durys uıymdastyra almaǵan qalalyq bilim bóliminiń basshysyn qyzmetinen bosatyp jiberdi. Sondaı-aq jolaýshyny toltyryp alyp, kóshede jarys uıymdastyratyn qoǵamdyq kólikterdiń berekesiz tirlikteri men trotýarlardy jónge keltirmegen jaýapty eki mekemeniń basshysy sógis aldy. Jergilikti polısııa basqarmasyna qıylystardaǵy jol qozǵalysyn retteı almaıtyn ınspektorlardy qyzmetten alýdy tapsyrdy. Eske sala keteıik, aıtylyp otyrǵan jol-kólik oqıǵasy saldarynan 4 jasar bala jantásilim etip, taǵy 2 áıel aýrýhananyń jansaqtaý bólimine jatqyzylǵan bolatyn. Oblystyq balalar aýrýhanasyna bas dárigerdiń orynbasarynyń aıtýynsha, 5 bala kelip túsken. Olardyń úsheýi qajetti kómek kórsetilgennen keıin úılerine qaıtarylyp, ekeýi aýrýhanaǵa jatqyzyldy. Taǵy qalalyq balalar aýrýhanasyna jatqyzylǵan taǵy bir balanyń jaǵdaıy aýyr. «Myna jınalysta qanym qaınap otyr. Biz balalarymyzdyń qaýipsizdigin qamtamasyz ete almasaq, myna jerde bárimiz topyrlap ne úshin júrmiz?! Jol qıylysynda nege durys baǵdarsham janbaıdy? Tártip bolý úshin endi qansha adam, qansha bala ólýi kerek?!» - dedi qala ákimi. Oqıǵaǵa qatysty Qylmystyq kodekstiń 345-baby boıynsha sotqa deıingi tergeý amaldary júrgizilýde. Júrgizýshi ýaqytsha ustaý oqshaýlaǵyshqa qamaldy. Saraptama júrgizý barysynda 19 jastaǵy jigittiń ishimdik ishpegeni belgili boldy. Endi budan da basqa saraptamalar jasalyp jatyr. Baqtııar Taıjan. Derek, foto: 24.kz.